Malondololo ku Bipangujo Byenu

◼ Lelo tukalama namani kitatyi kya kupwila kwa pa kipwilo?

Nsaa yendanga lubilo shi twisamba myanda miyampe na balunda. O mwanda i bikomo kunena bipindi bya ku kupwila mu kitatyi kitungilwe. Lelo i bika biketukwasha tulame kitatyi?

Shilulai pa kitatyi. Shi kipwilo kituntulu ke kipwila, i biyampe kunena bemvwaniki bashikate munite umo nansha ibidi kumeso kwa kupwila kushilula kusaka amba byonso bilonde mungya ndudi. (Mus. 3:1) Kupwila kwa bisumpi bityetye, kifwa kupwila kwa kwenda mu mwingilo wa budimi, kekufwaninwepo kulejaleja ko mukungila boba baya kunyuma kwa kitatyi.

Mwiteakanyei senene. Lufungulo lwa kulama nsaa i kwiteakanya kumeso kwa kitatyi. I biyampe kuyukidija kitungo kya kipindi kyobe mu ñeni yobe. Yuka myanda mikatampe, ne kwiilupwila patōka. Tyina kusasukila pafula mu tumyanda tutyetutye. Pēleja mwisambo obe. Shi i kipindi kilomba bya kumwena’ko nansha bwipangudi, pituluka na bakalonga’byo kumeso kwa kitatyi. Shi bibwanika, tala nsaa yolonga ku kipindi ne kipindi kitatyi kyopituluka’mo na diwi ditunduke.

Abanya myanda yokesamba. Nansha shi kipindi kyobe kikale i dishikulu nansha i kya mīsambo na bemvwaniki, bikekala biyampe shi wabanye myanda yokesamba mu bipindi. Yuka buvule bwa nsaa yokanena kipindi ne kipindi, kadi soneka’bo mu misebo ishele pululu. Kupwa londa nsaa kitatyi kyopityija kipindi. Mu mwisambo na bemvwaniki, epuka dikinga dya kwipangula bipangujo bivule ku ntwelelo ino ku mfulo pa myanda mikatampe ke kupita’yo lubilo. Bendeji ba Kifundwa kya Kiteba kya Mulami bafwaninwe kushiya kitatyi kya kubandaula kapango ka bipangujo bya kupituluka’mo ku mfulo. Bafwaninwe kuta mutyima wa kuleka kudya minite itungīlwe lwimbo ne milombelo ya mfulo.

Vuya pa kitatyi. Shi kupwila i kwa bipindi bivule, kimfwa Kupwila kwa Mingilo, muneni ne muneni ufwaninwe kuyuka nsaa ishilula ne ifula kipindi kyandi. Le shi kupwila kubamweka bu kupityija kitatyi napo? Papo tutu umo nansha bavule bakokeja kukūla kitatyi na kwimanina enka pa myanda mikatampe ne kuleka myanda mityemitye. Kulonga namino i kayukeno kalombola amba kodi muneni wa bwino.

Batwe bemvwaniki netu tukokeja kukwasha banabetu bendeja na kulondolola myanda mu kīpi ne itengelela pa mwanda. Batwe bonso tukokeja kulunga kuboko ku kulonga byonso “monka mo byendele biyampe ne mo bīkadile.”​—1 Kod. 14:40.