Mwisambo Ulonda Kitatyi, Mwenzankane Senene

EYO, abe muneni ufwaninwe kutadija bininge buya bwa bufundiji bobe, ino kitatyi kya mīsambo yobe nakyo kifwaninwe kutebwa mutyima. Kupwila kwetu i kutungilwe kitatyi kya kushilula ne kya kufula’ko. Pa kubwanya kino, i biyampe bonso badi na bipindi ku mpangiko bengidile pamo.

Mu myaka isekunwinwe mu Bible, muswelo wādi umona bantu būmi i mwishile na obumonwa mu bifuko bivule dyalelo. Kitatyi kyādi kitelwa na bishima bya kudingakanya amba “dyuba misanya” nansha amba “sā yadi pa bwipi na kufika ku dikumi.” (Mat. 20:3-6; Yoa. 1:39) Kekwādipo kikimbilwa kuyuka nsaa mibwane ya kulonga mwingilo kampanda mu difuku. Mo mokikadile ne dyalelo mu bifuko bimo bya ntanda.

Inoko, nansha shi bibidiji bya kwenu nansha masakila a muntu byobikokeja kumupa bwanapabo mu kulonda kitatyi, tukokeja kumwena bivule mu kuta’ko mutyima. Shi bantu bavule i bapebwe bipindi ku mpangiko, i kipite buya kwilangila na kulama kitatyi kipelwe umo ne umo. Musoñanya unena amba “bintu byonsololo bilongibwe monka mo byendele biyampe ne mo bīkadile” ubwanya kulondwa mu mwanda utala kulama kitatyi kya bipindi byotupebwa ku kupwila.​—1 Kod. 14:40.

Kulama Kitatyi Senene. Kwiteakanya bo bwanga. Divule, baneni bakomenwanga kulama kitatyi mwanda wa kubulwa kwiteakanya senene. Padi bekulupilanga bipitepite. Nansha padi beteakanyanga bya mbó wimene kolamba bulembe. Kulama kitatyi kushilulanga na kusangela bidi kipindi kyopelwe ne kwikala na mutyima wa kuteakanya’kyo biyampe.

Le kipindi kyobe i kya butangi? Nabya dibajinji pituluka mu Kifundwa kya 4 kutūla ku kya 7, bilombola mwa kunenena pampikwa kushishikita, na kwitūkija, kukoma buluji, ne kutyityija milangwe mikatampe. Kupwa londa ano madingi potanga na diwi ditunduke kipindi kikupelwe. Tala kitatyi abe mwine. Le bikulomba kutanga lubilo mwa kupwila kipindi’kya mu kitatyi kikupelwe? Nankyo bweja’ko matabula pa bipindi byambulwa mvubu, ino kokilwa kwitūkija ne kwenda matadi pa milangwe mikatampe ilomba kutyityija. Wiibidije’mo divulevule. Shi kotange pampikwa kushishikita, ukapēlelwa kulama kitatyi kyobe.

Le ukesamba na kwela diso bitupu pa byoandikile? Nankyo kokasoneka bivule, kamwanda ne kamwanda​—ulanga’mba i mwisambo wa kutanga​—mofwila kulonda kitatyi senene. Powaingidile pa Kifundwa kya 25, wefundile mwa kulongela’byo biyampe. Lama ino myanda itano mu ñeni: (1) Teakanya myanda miyampe, ino keyakivula. (2) Lama biyampe milangwe mikatampe, ino kokakwatyila misemwa mituntulu ku mutwe. (3) Lemba pa mwadijo obe buvule bwa kitatyi kyokapityija ku kipindi ne kipindi kya mwisambo obe nansha minite ifwaninwe kupita’po pa kufika pa mwanda kampanda. (4) Powiteakanya, tala i tumyanda’ka tokokeja kutabuka shi ubamone amba kitatyi kibatyepa. (5) Wiibidije mu mwisambo obe.

Kupituluka’mo kudi na mvubu. Popituluka’mo tala nsaa yolonga ku kipindi ne kipindi kya mwisambo obe. Pita’mo divulevule, enka ne byobwanya kupwa mwisambo onso mu kitatyi kikupelwe. Kokisaka kufinikila myanda mivule pamo. Shiya’ko ne kakitatyi kampanda mwanda kunena mwisambo ku meso a bemvwaniki kulombanga kitatyi kilampe’ko kupita kyopityija pa kwiibidija kobe kwa bunka.

Kyenzankanya Bipindi Byonso. Kulonda kitatyi senene i kukwatañane na kwenzankanya bipindi bya mwisambo senene. Kitatyi kivule kifwaninwe kupityijibwa mu kilu kya mwisambo. Mwanda mo amo mwikalanga myanda mikatampe ya bufundiji. Ntwelelo ifwaninwe kwikala na bula bufwaninwe mwa kufikila pa bitungo bisatu bitelelwe mu Kifundwa kya 38. Ino kilu nakyo kekifwaninwepo kulepa bipitepite uyuka ne kitatyi kya kuleta mvuyo miyampe kyabulwa, na munenena Kifundwa kya 39.

Bukomo bwa kulonda kitatyi senene bolonga bukabutula mwisambo mulumbuluke ne kulombola amba ulēmekele bakwenu bomudi nabo ku mpangiko ne kipwilo kyonso kituntulu.