Mwingilo wa Mvubu Mpata
1. Lelo mutyima wetu wa kufwija’ko pa mwingilo witutonona tupāne bika?
1 Mwanda waka tukankamikwanga nyeke kupāna kitatyi, bukomo, ne byabulēme byetu mu mwingilo? Mwanda kekudipo mwingilo utabukile mvubu uno! Kulangulukila bininge pa lupusa lukatampe lwao kukatamija mutyima wetu wa kwingila uno mwingilo keukapitulukwa’mopo dikwabo.—Bil. 20:24.
2. Lelo mwingilo wetu wa busapudi ukwashanga namani mu kuyukanya buujila bwa dijina dikatakata dya Yehova?
2 Uyukanya Buujila bwa Dijina Yehova: Mwingilo wa busapudi unena ukoma amba Bulopwe bwa Yehova, kupityila kudi Kidishitu Yesu, bukapingakena malopwe onso a bantu ne kupwija makambakano abo. (Mat. 6:9, 10) Uno mwingilo utumbijanga Yehova amba ye umo kete ubwanya kwitunyongolola ku misongo ne lufu. (Is. 25:8; 33:24) Byotuselele dijina dyandi, bantu batala mwiendelejo wetu muyampe ne bupyasakane babwanya kumutumbija. (1 Pet. 2:12) Bine tudi na nsangaji ya kuyukanya dijina dya Mfumu Mubikadi Yehova ntanda yonso!—Mit. 83:18.
3. Lelo i madyese’ka emwenanga boba betabija musapu wa Bulopwe?
3 Upandija Būmi: Yehova “kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” (2 Pet. 3:9) Inoko shi kekudipo muntu wa kwibafundija, lelo bantu bakayuka namani mumwenine Yehova mwiendelejo muyampe ne mubi? (Yona 4:11; Loma 10:13-15) Kitatyi kitabija bantu myanda miyampe, būmi bwabo bulumbulukanga pobaleka bibidiji bibi. (Mika 4:1-4) Pakwabo kadi, bakekala na lukulupilo lwa nsangaji lwa būmi bwa nyeke. Kusapula ne kufundija na bukomo kwitupandijanga batwe, ne boba betwivwana. (1 Tem. 4:16) Bine, kino i kiselwa kya kutendelwa kyotudi nakyo mu uno mwingilo wa mvubu!
4. Mwanda waka tufwaninwe kwingila na bukomo mwingilo wa kusapula Bulopwe ne kulonga bana ba bwanga?
4 Panopano ponka kyamalwa kibūke kisa kufudija mu kitulumukila ino ntanda yambulwa koloka. Boba badi ku mutamba wa Yehova basa kupanda. Nanshi, kusapula ne kulonga bana ba bwanga i mwingilo wa kampeja-bukidi, wa mvubu, kadi wa kamweno wingilwa dyalelo. Twiutūlei pa kifuko kibajinji mu bwetu būmi!—Mat. 6:33.