‘Dijina dya Leza Dijile Kijila’
1. Lelo mpangiko ya kubungakana kwa kipindi kwa mwaka wa mingilo wa 2012 idi na mutwe wa mwanda’ka, ne wimanine pa bika?
1 Twi ba dyese pa kwitwa pa dijina dya Yehova, mubikadi wa diulu ne ntanda! I Leza aye mwine witupele dyandi dijina, nakampata tamba mu mwaka wa 1931, batwe batumoni ba Yehova twityilwanga pa dijina dya Yehova dya bunka. (Is. 43:10) Yesu Mwana wa bunka wa Leza, wādi ukwete dijina dya Leza na mutyika mukatampe ne kwiditūla pa kifuko kibajinji mu lulombelo lwandi lwa kulondela’po. (Mat. 6:9) Mutwe wa mwanda mukatampe wa mpangiko ya kubungakana kwetu kwa kipindi kwa mwaka wa mingilo wa 2012, wimanine pa binenwa bya Yesu. Unena’mba ‘Dijina dya Leza dijile kijila.’
2. Lelo i myanda’ka yotufwaninwe kala kutengela?
2 Byotukevwana’ko: Mu Dya Mposo, dishikulu dinena’mba “Yukanyai Dijina dya Leza na Kwingila Mwingilo wa Kitatyi Kyonso,” dikalombola kine kikadile mwingilo wa kitatyi kyonso bu mwingilo wa nsangaji mu būmi. Kadi tukevwana’ko dishikulu dya mapingu dinena’mba “Dyumuka Wakafutulwija Dijina dya Yehova,” dine diketukwasha twepuke kupya mu makinga aná. Bipangujo pamo bwa bino: I bika biketukwasha tusapule na bupyasakane kitatyi kilombola bantu kusangela kutyetye? ne i bika biketukwasha tuvuije mwingilo wetu biyampe? bikalondololwa mu dishikulu dinena’mba “Kine Kifwaninwe Kwikadila Dijina dya Leza bu Dijila.” Dya Yenga tukevwana dishikulu dya mapingu aná disambila pa muswelo otubwanya kuyukanya buujila bwa dijina dya Leza na milangwe yetu, muneneno wetu, butyibi botukwata, ne mwiendelejo wetu. Nakampata Bapya bakasangela dishikulu dya bantu bonso, dinena’mba “Yehova Ukayukanya Buujila bwa Dijina Dyandi Dikatakata pa Amakedona.”
3. Le i dyese’ka dyotudi nadyo, ne i muswelo’ka uketukwasha ino mpangiko?
3 Panopano ponka Yehova usa kulonga kintu kampanda mwanda wa kuyukanya buujila bwa dijina dyandi. (Ezek. 36:23) Pano’ko bidi tudi na dyese dya kutendelwa dya kukwatakanya byonso bilombola’mba dijina dya Yehova i dikola. Tukulupile amba ino mpangiko ya kubungakana kya kipindi ikakwasha umo ne umo motudi avuije kiselwa kyandi kikatampe kya kwityilwa pa dijina dya Leza.