Les merveilles de la création révèlent la gloire de Dieu
Bavule basangelanga kubandila bupangi. Ino batyetye kete bayukile amba kubandila’byo kwibakwasha bayuke milangwe ne malango a Umpangi Mukatampe. (Loma 1:20) Myaka kunyuma, Davida wēfundile myanda itala padi Yehova kupityila ku Kinenwa kyandi kya ku bukomo bwa mushipiditu. Ino kadi wādi ‘ulanga’ pa bupangi ne kufwena Leza. (Mit. 8:3, 4) Dishike dya video dinena’mba Les merveilles de la création révèlent la gloire de Dieu (Bipangwa bya Kutendelwa Bisokola Ntumbo ya Leza) ditukwasha batwe, betu bana, ne befundi ba Bible tutadije senene bipangwa bya Yehova, ne kumona bumuntu ne ngikadilo ya Umpangi wetu Mukatampe, ne kwitulengeja tumufwene mpata. Pa kupwa kubandila’dyo, tala shi ubwanya kulondolola bino bipangujo.
(1) Bukata ne ndudi ya bipangwa bya mu lwelele bitamija namani mutyima obe wa kufwija’ko Yehova? (Is. 40:26) (2) Potubandila mwikadile mema, i bika byotwifunda padi mwine wēapangile? (Kus. 14:7) (3) Le bukata bwa umbuo wa ntanda ne bula bwao na ku dyuba bulombola namani tunangu twa Yehova? (4) Lelo kweji udi na mwingilo’ka? (Mit. 89:37) (5) I kika kinenenwa’mba Yehova usakanga bantu basangele būmi? (6) ADN i bika? (Mit. 139:16) (7) Mu bipangwa byonsololo bya Yehova, bya pano pa ntanda, mwanda waka bantu i beshile nabyo? (Ngal. 1:26) (8) I bika byotengele mu ntanda mipya?
Bya Ntentekelo: (9) Le misombelo i mitambe kwepi? (10) Lelo mema abwanyanga namani kukanda ne ku nsongo ya mutyi? (11) Mema adi na kaji’ka mu ngitu yetu? (12) Leta bimfwa bya kukwatañana kudi mu bintu byūmi. (13) Lelo bipangwa biyukile namani kupwana abyo bine? (14) Lelo “angle d’or” i bika, ne i mimweke namani mu bupangi? Tala Réveillez-vous ! wa 2006 Kweji 9 paje 24.
‘Talai’po na Katentekeji’ ku Mingilo ya Yehova: Yesu i mwitukankamike tutale “bidi ne ku byoni bya mūlu,” ne kuboila “ñeni bidi ku byamaluba bya muntanda.” (Mat. 6:26, 28) Kulonga namino kukakomeja lwitabijo lwetu, kuningija kikulupiji kyetu mudi Umpangi, ne kutamija mutyima wa kufwija’ko Yehova pa tunangu, bukomo bwandi bwa kupandija, ne pa buswe bwandi. Pa kyaba kya kulabikwa bitupu na mingilo ya ntanda, wilamije’ko kitatyi ne bukomo bwa kubandila bipangwa bya kutendelwa bya Yehova, ne kulangulukila pa byobitufundija padi Leza wetu.—Mit. 19:1.