Kinenwa Kitupele Leza Kupityila Kudi Yelemia
1. Le i dibuku’ka dyalupwilwe mu 2010 ku kitango kya distrike, ne i bika byotukalonga nadyo?
1 Bine twasangele pa kulupulwa kwa dino dibuku ku Kitango kya Distrike kya mu 2010 kinena’mba, “Ikalai Nyeke Pabwipi na Yehova!” Dino dibuku dilombola ñeni yotuboila mu mukanda wa Yelemia ne wa Madilo mu būmi bwetu bwa difuku ne difuku. (Loma 15:4) Byoditongelwe kukefundwa mu Kifundwa kya Bible kya Kipwilo, tukashilula kwifunda’dyo mu yenga ushilula 5 Kweji 11, 2012.
2. Mwanda waka tukamwena mu kubandaula mukanda wa Yelemia ne wa Madilo udi mu Bible?
2 Dya Kamweno Dyalelo: Yelemia, mulembi wa uno mukanda wa mu Bible wa ku bukomo bwa mushipiditu, wāingile bu mupolofeto mu bitatyi bya tuvutakanya mu Yuda. Dibajinji, wēmwene amba kabwanyapo uno mwingilo. (Yel. 1:6) Kadi wāpangilwepangilwe na balunda padi’nka ne na babutule bandi ba mu kibundi kyabo kya Anatote. (Yel. 11:21, 22) Byādi byendele’mo, Yelemia atyumukwe mutyima kitatyi kimo. (Yel. 20:14) Kitatyi kyotwingila mwingilo wetu wa kulonga “mizo yonso ya bantu nabo ke bāna-babwanga,” tutanwanga na makambakano ne kwiimvwana pamo’nka na bantu ba mu mafuku a Yelemia. (Mat. 28:19) Kubandaula bilembwa byandi kuketukwasha tuvuije mwingilo wetu na kininga ne bupyasakane.
3. I muswelo’ka otukengidija myanda imoimo idi mu dibuku dya Yelemia?
3 Bidi’mo: Bisonekwa bikatampe bya kutanga ne kwisambila’po potwifunda i bisendekwe. Ku mfulo kwa kifundwa kya yenga ne yenga kudi kipangujo kimo nansha bibidi bidi mu bilembwa bityite bilombola ñeni mikatampe idi mu kifundwa’kya. Bino bipangujo bikepangulwa bemvwaniki pa kupituluka’mo. Mu dino dibuku mudi bifwatulo bilumbuluke kebikabulwepo bipwilo kwisambila’po.
4. I muswelo’ka otukokeja kumwena ne pa mfulo mu kubandaula dibuku dya Yelemia?
4 Pa kumwena’mo ne pa mfulo, teakanya kifundwa kumeso kwa kitatyi. Kimba’mo myanda yokokeja kwingidija mu būmi bobe ne mu busapudi. Londolola bininge ku kupwila. Yelemia wāvuije mwingilo wandi na nsangaji ne kuloelelwa ponka, mwanda Yehova wāmwesele. (Yel. 15:16) Netu tusaka kubandaula kotukabandaula dino dibuku dipya kwitukwashe tuvuije mwingilo wetu muswelo umo.