Bubinga Dikumi na Bubidi bwa Kusapwila

Mwanda waka tusapulanga ne kufundija myanda miyampe? Le dibajinji bidi i pa mwanda wa kukwasha bantu ba mityima myoloke batwele mu kashinda ka būmi? (Mat. 7:14) Shako buno i bubinga bumo mu butelelwe kunshi’ku, ino ke bubajinjipo. Mu buno bubinga 12 bwa kwipānina mu mwingilo butelelwe kunshi’ku, molangila le bwa mvubu mpata i bwepi?

1. Bupandijanga bantu.—Yoa. 17:3.

2. Budyumunanga babi.—Ezek. 3:18, 19.

3. Bufikidijanga bupolofeto bwa mu Bible.—Mat. 24:14.

4. I kilomboji kya boloke bwa Leza. Ke kudi mwa kutopekela Leza amba waonakenye babi kwampikwa kwibapa mukenga wa kwisāsa.—Bil. 17:30, 31; 1 Tem. 2:3, 4.

5. Uno mwingilo witukwashanga tuvuije kiselwa kyetu wa kukwasha bantu ku mushipiditu bāpotelwe na mashi a Yesu.—Loma 1:14, 15.

6. Bwitukwashanga twepuke kulambikwa mashi.—Bil. 20:26, 27.

7. Kino i kisakibwa pa kusaka amba tukapande.—Ezek. 3:19; Loma 10:9, 10.

8. Kino kilombolanga amba tusenswe bakwetu.—Mat. 22:39.

9. Kino kilombolanga’mba tukōkele Yehova ne wandi mwana.—Mat. 28:19, 20.

10. I kipindi kya mu butōtyi bwetu.—Bah. 13:15.

11. Kilombolanga buswe botuswele Leza.—1 Yoa. 5:3.

12. Bulombolanga buujila bwa dijina dya Yehova.—Is. 43:10-12; Mat. 6:9.

Na bubine, kudi kadi ne bubinga bukwabo bo twipānina mu mwingilo. Kimfwa, Kusapula kukankamikanga lwitabijo lwetu ne kwitupa kyepelo kya pa bula kya kwikala bakwingila pamo na Leza. (1 Kod. 3:9) Inoko, bubinga bwa 12 bo bwine bwa mvubu mpata bwa kwipānina mu mwingilo. Nansha shi bantu bemvwane nansha bapele, mwingilo wetu ulombolanga bu ujila bwa dijina dya Leza ne kupa Yehova mukenga wa kulondolola yewa umupunika. (Nk. 27:11) Na bubine, tudi na bubinga buvule bwa kwendelela “kuleka’byo kufundija mpika, ne kusapula” myanda miyampe.—Bil. 5:42.