Ingidija Musapwilo Muyampe
1. Misapwilo palapala ya Bene Kidishitu babajinji itufundija bika?
1 Bene Kidishitu babajinji bādi basapwila bantu ba bibidiji ne bipwilo byonso myanda miyampe. (Kol. 1:23) Nansha byobādi na musapu umo onka—wa Bulopwe bwa Leza—ino bādi bengidija misapwilo palapala mungya bobasapwila. Kimfwa Petelo pa kusapwila Bayuda bādi balēmekele Bisonekwa, wāshilwile na kutela bupolofeto bwa Yoela. (Bil. 2:14-17) Ino tala Polo mwaālangulukile na Bangidiki mungya bisonekelwe mu Bilongwa 17:22-31. Dyalelo, bantu ba mu mitamba imo balēmekele Bisonekwa, ne potwenda ku njibo ne njibo, tukokeja kwibasapwila na kutela bisonekwa pampikwa mwanda. Inoko tufwaninwe kusapula na manwa potwisamba na bantu kebasangelangapo Bible ne myanda ya kipwilo nansha boba kebadipo mu bipwilo bya Bwine Kidishitu.
2. Le tukengidija namani mabuku a kupāna pa kukwasha boba betabije Bible ne boba kebamwitabijepo?
2 Ingidija Senene Mabuku a Kupāna: Mabuku a kupāna mu uno mwaka wa mingilo akekala ashinta kupwa kwa myeji ibidi kadi akemanina nakampata pa mapepala, matrakte, ne maboloshile. Nansha shi bantu ba mu mwaba wetu kebasenswepo Bible, tukokeja kwibapa kintu kyonso kikwatañene na mwanda obasangela. Padi mu kwitana kubajinji twadi ketutangilepo mu Bible nansha kukumuna’ko, ino muntu byasangedile musapu, tukamujokela na kitungo kya kumukwasha amone kwitabija Umpangi ne kukulupila mu Kinenwa kyandi kya ku bukomo bwa mushipiditu sandu. Pakwabo kadi, shi botusapwila betabijanga Bible, tukokeja kukebapa ne mabuku ne kwingidija musapwilo ukumuna ku Bible. Eyo, tubwanya kwibapa dibuku Bifundija Bible nansha boloshile Teja Leza nansha Teja Leza Amba Wikale Mūmi Nyeke kitatyi kyo-kyonso nansha shi kebitelelwepo mu mulongo wa bya kupāna mu kweji’wa. Kyotusaka kine i kwingidija musapwilo muyampe.
3. Le mityima ya bantu ba mu mwaba wetu idi bwa nshi muswelo’ka?
3 Sengela Nshi: Mutyima wa muntu udi bwa nshi. (Luka 8:15) Nshi imo ilomba bidi kusengela pa kusaka’mba bubinebine bwa mu Bible bwale’po miji ne kumena. Basapudi babajinji bābwenye kukuna mu nshi ya miswelo yonso, ne kino kyēbaletele nsangaji ne kuloelelwa. (Bil. 13:48, 52) Netu tukokeja kukemwena nsangaji ya muswelo umo shi tute mutyima ku musapwilo wetu.