Mwa Kwingidijija Le I Bāni Balonga Kiswa-Mutyima kya Yehova Dyalelo?
Boloshile Mupya Ulupwilwe Mwanda wa Kwitukwasha Tuludikile Befundi ba Bible ku Bulongolodi
1. I bubinga’ka busatu bulupwidilwe boloshile Kiswa-mutyima kya Yehova?
1 Le kodi mutompe kwingidija boloshile mupya Le i Bāni Balonga Kiswa-Mutyima kya Yehova Dyalelo? I mulupulwe mwanda wa (1) kukwasha befundi ba Bible betuyuke, batwe Batumoni, (2) bayuke mwingilo wetu ne (3) bayuke mwingidila bulongolodi bwetu. Kifundwa ne kifundwa mu boloshile Kiswa-mutyima kya Yehova kidi pa paje umo kete, kadi i kipēla kwifunda mu minite itano kutūla ku dikumi.
2. Lombola muteankanibwe uno boloshile.
2 Muteakanibwe Uno Boloshile: Uno boloshile i mwabanibwe mu bipindi bisatu, kipindi ne kipindi kisambilanga pa mwanda umo utala Bulongolodi bwa Yehova, monka mokilombwedilwe kūlu’ku. Mitwe ya myanda ya bifundwa byonso 28 i bipangujo, ne malondololo abyo i tumitwe twa myanda tudi mu bilembwa bityite. Bifwatulo bitamba mu mantanda 50 byelelwe’mo mwanda wa kulombola mwikadile mwingilo wetu ntanda yonso. Kifundwa ne kifundwa kidi na kapango “Yukila’ko Bikwabo” mudi milangwe ya kukankamika nayo mwifundi endelele.
3. Imuswelo’ka otukengidija boloshile Kiswa-Mutyima kya Yehova?
3 Mwa Kwingidijija Uno Boloshile: Shilula na kwibalombola kipangujo kiselele mutwe wa mwanda wa kifundwa. Ebiya, kitatyi kitangwa misango pamo, komeneja tumitwe twa myanda tudi mu bityite. Kupwa, bandaula nandi bipangujo bya kupituluka bidi kunshi kwa paje. Ukokeja kutanga kifundwa kyonso kituntulu nansha kubandaula musango umoumo. Ufwaninwe kukwata butyibi na manwa kitatyi kyotonga bisonekwa bya kutanga. Kokilwa kubandaula nandi bifwatulo ne tupango “Yukila’ko Bikwabo.” Divule dine bifundwa bifwaninwe kubandaulwa mobilondela. Inoko udi na bwanapabo bwa kutonga kifundwa kyo-kyonso shi ubamone’mba mwifundi usakilwa myanda idimo bukidibukidi. Kimfwa, shi kudi kitango kisakulongeka mafuku matyetye kumeso, ukokeja kwenda nandi mu kifundwa 11.
4. Mwanda waka ubasangala pa kutambula kino kingilwa kipya?
4 Kitatyi kyotwifunda Bible na muntu, tumukwashanga ayuke Tata wetu wa mūlu. Ino kadi, tusakanga ne kumufundija ayuke bulongolodi bwa Yehova. (Nk. 6:20) Bine, tudi na nsangaji mikatampe kashā pa kutambula kino kingidilwa kipya kitukwasha tufikile pa kino kitungo!