Kinenwa kya Leza I kya Kamweno pa Kufundija
1. Le kitango kya kipindi kya mwaka wa mingilo wa 2014 kidi na mutwe wa mwanda’ka, ne i kipangujo’ka kikalondololwa ku mpangiko?
1 Yehova ‘Mufundiji wetu Mukatampe,’ i mufundiji muyampe mūlu ne pano panshi. (Is. 30:20, 21) Ino, le Yehova witufundijanga muswelo’ka? I mwitupe dibuku ditabukile mabuku makwabo onso—Bible Kinenwa kyandi kya ku bukomo bwa mushipiditu. Le bufundiji bwa Leza bubwanya kwitukwasha namani ku ngitu, mu ñeni, mu malango ne ku mushipiditu? Malondololo a kino kipangujo akaletwa ku mpangiko ya kintango kya kipindi kya mwaka wa mingilo wa 2014. Ino mpangiko idi na mutwe wa mwanda unena’mba, ‘Kinenwa kya Leza I kya Kamweno pa Kufundija,’ wimanine pa 2 Temote 3:16.
2. Le myanda mikatampe ikaleta malondololo ku bipangujo’ka?
2 Tala ino Myanda Mikatampe: Myanda mikatampe ya mu mpangiko ikaleta malondololo ku bipangujo bilonda’ko:
• Le bufundiji bwa Leza budi na lupusa’ka pa bwetu būmi? (Is. 48:17, 18)
• Shi tukimba kushinta ngikadilo yetu mwanda wa kwingidila Yehova kitatyi kyonso, le i bika byotubwanya kukulupila? (Mal. 3:10)
• Le tufwaninwe kulonga namani shi tubatana ‘mfundijo ingi’? (Bah. 13:9)
• Le i muswelo’ka otubwanya kwiula ‘mufundijijo’ wa Yesu? (Mat. 7:28, 29)
• Mwanda waka boba bafundijanga mu kipwilo bafwaninwe kwifundija bidi abo bene? (Loma 2:21)
• Lelo Kinenwa kya Leza i kya kamweno mu bika? (2 Tem. 3:16)
• Le ‘kutenkana’ kwa mizo kudi na lupusa’ka pa bantu? (Hak. 2:6, 7)
• Le i kikulupiji’ka kidi na Yehova motudi? (Ef. 5:1)
• Mwanda waka tufwaninwe kulonga bukomo pa kwikala nyeke na bufundiji bwa Yehova? (Luka 13:24)
3. Mwanda waka i biyampe kutanwa ne kulonda na katentekeji ino mpangiko miteakanibwe pa kitatyi?
3 Ku ngalwilo kwa 2 Temote shapita 3, kumeso’tu kwa Polo kulemba binenwa bimanine’po mutwe wa mwanda wa ino mpangiko, wātelele bitatyi bya malwa bya mu mafuku a mfulo. Wāsonekele amba: “Babi, ne banzazangi, basa kwenda bavula ne kuvula ku kubipa, ne kongojana, ne kwiongola abo bene.” (2 Tem. 3:13) Pa kuleka kongolwa, i biyampe tuteje ne kwingidija bufundiji bwa Leza! Nanshi, tusumininwei kukatanwa’ko ne kulonda na katentekeji ino mpangiko miteakanibwe pa kitatyi.