‘Kiswa-Mutyima kya Leza Kilongeke’
1. Le kubungakana kwa kipindi kwa mwaka mwa mingilo wa 2012 kudi na mutwe wa mwanda’ka, ne mwanda waka kubandaula uno mutwe wa mwanda kudi na mvubu?
1 Twapangilwe mungya kiswa-mutyima kya Yehova. (Kus. 4:11) O mwanda, kebikabwanikapo kufikila pa kitungo kya būmi bwetu shi ketwifundilepo kiswa-mutyima kya Leza ne kwikilonga. Kekipelangapo na motubwanya kwikimwena, nakampata shi ketulongelepo bukomo bwa kulwa na bibidiji bibi bya kulonga ‘bikimbakimba ngitu ne mutyima’ nansha kulonga “kiswa-mutyima kya baJentaila.” (Ef. 2:3; 1 Pet. 4:3; 2 Pet. 2:10) Kwampikwa bukwashi bwa Leza, tubwanya kwikala mu kyaka kya kuponena mu “dikinga dya dyabola, pa kukwatwa . . . monka muswidile mutyima” wandi. (2 Tem. 2:26) Mpangiko ya kubungakana kwetu kwa pa bula kwa difuku dimo kwa mwaka wa mingilo wa 2012, kuketukwasha batwe bonso twiendeje mungya bintu bisatu bibajinji bya kwisāshila bitelelwe mu lulombelo lwa kimfwa lulombelwa’mba, ‘kiswa-mutyima kyobe kilongeke.’—Mat. 6:10.
2. Le i bipangujo’ka bikalondololwa ku ino mpangiko?
2 Bipangujo Bikalondololwa: Polonda ino mpangiko, kimba malondololo a bino bipangujo: Le i kamweno’ka kadi mu kwivwana Kinenwa kya Leza? Le tukayuka monka mwikadile kiswa-mutyima wa Leza kotudi namani? Mwanda waka tufwaninwe kwitabija kukwasha bantu bonso? I muswelo’ka otubwanya kutana būmi buyampe kadi bwa nsangaji? Bankasampe, i bika byomufwaninwe kulonga pa kwiyukanya kudi Yehova? I mpalo’ka itambanga ku kulonga kiswa-mutyima kya Leza? Mwanda waka tufwaninwe kutamija ne kukankamika bakwetu na kampeja-bukidi?
3. I muswelo’ka otubwanya kumwena ne pa mfulo mu ino mpangiko ya ku mushipiditu?
3 Katanwe ku ino mpangiko ne kwiilonda na katentekeji. Ntunguluji wa Betele nansha mutadi wendakana ukaya bu muneni mupempudi. Ku ngalwilo ne ku mfulo kwa mpangiko kokekaka kwisamba nandi nansha na wandi mukaji, shi i musonge. Kitatyi kyokajokela ku njibo, kokekala “wakwivwana wavulaminwa,” ino bandaula monka ino mpangiko pamo na kisaka ne kwisambila pa muswelo omukokeja kwiendeja ne pa mfulo mungya kiswa-mutyima kya Leza.—Yak. 1:25.
4. Mwanda waka i kya mvubu tutangidije kumeso kulonga kiswa-mutyima kya Leza?
4 Panopano ponka boba balondalonda bilokoloko bya abo bene ne boba bapela kukōkelela kiswa-mutyima kya Yehova basa konakanibwa. (1 Yoa. 2:17) Tufwijanga’ko Yehova pa kuteakanya pa kitatyi ino myanda itukwasha tutangidije kumeso kulonga kiswa-mutyima kya Leza.