Kuteja ne Kufundijibwa
1. Mwanda waka pa kuteja ne kufundijibwa ku kitango kya distrike bilomba kulonga bukomo?
1 Bitango bya distrike bya mu 2013 kebisa kushilula. Kudi mingilo mivule ingilwa pa kuteakanya mpangiko ya kuvuija bisakibwa bya bonso kujokoloka ntanda yonso. Le wi mwiteakanye kutanwa ku kitango mu mafuku onso asatu? Ku bitango bikatampe keko kwikala bilabi bivule, o mwanda bilomba kwielela’ko pa kulonda mpangiko na katentekeji. Mpangiko byoikalanga milampe kupita ya mu kupwila kwa pa kipwilo, bilomba kadi kulonga bukomo kutyina kulabikwa. Kadi lwendo ne bikwabo bikokeja kwitupungija. Le bika biketukwasha tuleke kulabikwa, mwanda wa tuteje ne kufundijibwa?—Kup. 31:12.
2. I muswelo’ka otukateakanya mutyima wetu ku kitango?
2 Kumeso kwa Kitango Kushilula: Pa Diteba dyetu dya Entelenete, www.pr418.com, patanwa mpangiko ya kitango, idi’mo mitwe ya myanda ya mashikulu onso, padi ne kisonekwa kimo nansha bibidi bya kyalwilo bya mwisambo ne mwisambo. Shi udi na muswelo utwela pa Entelenete, kutanga ino myanda kukakukwasha uteakanye mutyima obe ku bikanenwa’ko. (Eza. 7:10) Mu Butōtyi bwa Kisaka ku kyolwa, le mubulwe’po kushiya’ko kitatyi kya kwisambila pa mpangiko ya kitango kyafwena’ki?
3. I bika bikakukwasha uteje na katentekeji?
3 Papityijibwa Mpangiko: Shi bikokejika, i biyampe kwenda kufula kumeso kwa mpangiko kushilula. Funga telefone, kutyina kulabikwa na bantu bakwita nansha bakutumina misapu, nansha abe mwine kutuminañana misapu mu kitatyi kya mpangiko. Shi bikulomba kushiya telefone pululu, tūla’yo mu ngikadilo yokeikokejapo kupuakanya bakwabo shi abakwite. Shi udi na kingidilwa kikwabo kya bulungu kyoingidija kitatyi kya mpangiko, longa bukomo kutyina’mba kyakapuakanya bakwabo. Ke biyampepo kudya nansha kutoma kitatyi kya mpangiko. (Mus. 3:1) Meso obe akatadidila kudi muneni. Kitatyi kitangwa kisonekwa, londa mu Bible obe. Lemba mu kīpi myanda mikatampe.
4. Bambutwile babwanya kukwasha namani babo bana nabo bateje ne kufundijibwa?
4 Kadi tusakanga bana batyetye nabo bateje ne kufundijibwa. Nkindi 29:15 unena’mba: “Mwana mulekelelwe bitupu ufwija inandi bumvu.” Nanshi, i biyampe bisaka bishikatyile pamo mwanda kino kikakwasha bambutwile bayuke shi babo bana balondanga mpangiko pa kyaba kya kwisamba, kutuma misapu nansha kunangakana. Nansha shi bakidi banuke kebabwanya kwivwanija byonso binenwa’ko, bana bakafundijibwa kulonda na katentekeji, ne kushikata bya bulēme.
5. Mwanda waka kidi na mvubu kwivuluja mu mpangiko, ne tukalonga kino namani?
5 Pa Kupwa kwa Mpangiko ya Difuku ne Difuku: Kokeija bipitepite. Kalāle kumeso kwa kitatyi mwa kukōkolokelwa senene. Kulangulukila pa myanda yowaivwananga, kukakukwasha wiivuluke mu kitatyi kilampe. Nanshi kidi na kamweno kwisambila’yo mu kisaka kyolwa ne kyolwa, nansha’tu mu minite mityetye. Kitatyi kyomudya na bakwenu, ubulwe’po kwisambila pa mwanda umo nansha ibidi yowalembanga kadi yowasangelanga kutabuka? Pa kujokela ku njibo kupwa kitango, ukokeja kwitūdila’ko kitatyi mu Butōtyi bwa Kisaka bwa kyolwa, kya kwisambila pa muswelo wa kwingidija ino myanda mu kisaka. Kadi yenga ne yenga ukokeja kwitudila’ko kitatyi kya kubandaula mabuku mapya omwatambwile.
6. Le kutanwa’tu ku kitango konkakonka i kubwane? Shintulula.
6 Masobo atobalanga enka shi bitekelwe’bya bibadibwa, bibaikutwa ne kuboleja’byo senene. Ne masobo a ku mushipiditu aketusobelwa ku kitango kya distrike nao mo’monka. Twimulomba mumwene’mo ne pa mfulo na kutanwa ku mpangiko yonso, na kuteja na katentekeji, ne na kwingidija byomukefunda’ko.