‘Imvwanijai ne Kuvudijija’ko Bufundiji’
1 Mukanda wa Nkindi i mulombole tunangu pamo bwa muntu wela lubila’mba: “Umvwanai, mwanda nsa kwisamba bintu bitabukile kunengela; kadi kumumununa kwa milomo yami kukesamba bintu byoloke. Ñeni i yami, ne kuyukidija kutuntulu kwine; . . . tejai ko ndi; mwanda i bakatōkwe balama mashinda ami. Mwanda yewa untana, shi ani shi ani, aye utana būmi. Kadi ukamona biyampe kudi Yehova.” (Nk. 8:6, 14, 32, 35) Bino bishima bilombolanga senene mwikadile bufundiji buketufundijibwa ku Kitango kya Distrike “Bafundiji ba Kinenwa kya Leza.”
2 Bisakibwa bya banabetu kujokoloka ntanda yonso byaikele kubandaulwa, o mwanda i kuteakanibwe mpangiko ya kwisambila pa bino bisakibwa. Bufundiji bwa ku mushipiditu ne madingi mafike’po akaletwa’ko, shi wialonde akokeja kukuletela ndoe, kuningisha kipwano kilumbuluke kyopwene na Yehova ne kukulama nyeke mu dishinda ditwala ku būmi bwa nyeke. Bine tudi na buluji bwendele’mo bwa ‘kwimvwanija ne kuvudija’ko bufundiji’ bwetu.—Nk. 1:5.
3 Kumeso kwa Mpangiko: Pa kusaka tukamwene byabinebine mu byobaketufundija, tufwaninwe kushikata pamo, ne kujadika ñeni senene pashilula mpangiko. Kino kilomba umo ne umo ekale kwiteakanya senene. Kisakwa pano i kwalwila’ko. Lāla kumeso kwa kitatyi bufuku bonso bukya ke kitango. Languka lubanga na futwi mwa kupela umo ne umo mu kisumpi kyenu kitatyi kya kwiteakanya ne kwibanga tudibwa. Fika kumeso kwa kitatyi pa kifuko palongelwa kitango mwa kumwena bishikatwa ne kulonga tumyanda tonso twa mvubu kepashilwile mpangiko. Bibelo bikashitulwa na nsaa ya 8:00 lubanga, ebiya mpangiko ikashilula difuku ne difuku na 9:30 lubanga lonka.
4 Kitungo kyetu kibajinji kyotubungakena i kutōta Yehova “mu bitango,” o mwanda kipimpo ne kipimpo kifwaninwe kushilulwa mu muswelo okitumbija Leza wetu. (Mit. 26:12, BB) Pa kino, bonso i bakankamikwe kushikata pamo kumeso kwa lwimbo lubajinji kutelwa. Kino i kikwatañane na kidyumu kitudyumuna Bisonekwa amba: ‘Bintu byonsololo bilongibwe mobifwaninwe ne mu ndudi.’ (1 Kod. 14:40) Le kino kishintulula bika ku umo ne umo umbukata mwetu? Kishintulula amba shi ubamone mwimaniji wa kipimpo ushikete ku lukala kitatyi kyombwa minjiki ya ñanjilo, peja ukashikate. Kino kikakupa kyaba kya kwimbila Yehova mitendelo na mutyima umo na bemba ñimbo ishilula kipimpo ne kipimpo.—Mit. 149:1.
5 Papityijibwa Mpangiko: Ezela “wādi ut[eakanya] mutyima wandi kukimba mukanda-wabijila wa Yehova, ne kulonga’o.” (Eza. 7:10) I muswelo’ka netu otukokeja kuteakanya mityima yetu mwa kutambwila bufundiji bwa Yehova? Potala mitwe ya myanda mishileshile itandikilwe pa kakanda ka mpangiko, wiipangule amba, ‘I bika binombola Yehova kupityila ku ino mpangiko? Nsa kwingidija’byo namani bikale na kamweno kondi ne ku kisaka kyami?’ (Is. 30:21; Ef. 5:17) Wiipangule bino bipangujo mu bula bwa kitango kyonso. Soneka myanda yolanga kukengidija. Witūdile’ko kitatyi kya kwisambila’po ku mfulo kwa kipimpo kya difuku ne difuku. Kino kikakukwasha utentekele myanda’ya ne kulongela moinenena.
6 Kujadika milangwe pamo mu bula bwa nsaa mivule kubwanya kukoma. Ino i bika bikokeja kwitukwasha tuleke kupuakanibwa mu ñeni? Kwatakanya bukomo budi na diso dyobe. Divule, kokwa kwenda meso ko kwenda ne mutyima mwine. (Mat. 6:22) Nanshi lwa na mutyima ukulombola kunyengela nshingo konso koivwana lunwa nansha ku kamwanda konso kalongeka. Bambila meso obe padi muneni. Shi kebatange kisonekwa, nobe londa’kyo mu Bible obe ne kumushiya mupūtule pashintululwa kisonekwa’kya.
7 Buswe bwa bwine Kidishitu buketutonona tuleke kukambakanya bakwetu kitatyi kipityijibwa mpangiko. (1 Kod. 13:5) Mwanda kino i “kitatyi kya kwikala talala nyā” ne kuteja. (Mus. 3:7) Nanshi leka kwisambasamba ne kuselakana. I kiyampe walwile’ko kwenda kufula mwa kutyepejeja’ko bya kutambatamba. Kadi kokadya nansha kutoma kufika ne bibwana kitatyi kitungilwe, poso enka kudi myanda ya misongo ilomba kudya ne kutoma. Boba bakapaya matelesele, bikolo biselwa ku makasa, makamera ne mafoto bafwaninwe kwingidija’byo kwakubulwa kukambakanya bakwabo. Bambutwile bafwaninwe kukwata mpangiko ya kisaka kyonso kituntulu—ne babo bana bansongwanzele bene—bakashikatyile pamo mwa kulamina babo bana.—Nk. 29:15.
8 Mwaka wapityile’u, mukulumpe umo utanwanga ku bitango pano ke myaka makumi mavule wanene amba: “Namwene amba kino kitango kyadi kitabuke bitango bikwabo pa buluji bukwabo. Kubwipi kwa bonso badi mu kitango badi basoneka byadi binenwa, ne bana bankasampe bene. Kino kyadi kisangaja bininge pa kumona. Bantu badi bapūtula Mabible kitatyi kyadi kinena baneni pa bisonekwa bimobimo amba tutangei.” Bine, kwivwanika na katentekeji uno muswelo i kintu kya kutendelwa. Mwanda kekuletangapo byabuyabuya enka kudi batwe ne kudi bakwetu botwiile nabo kete, mhm, ino kutabukidila kutumbijanga Yehova Leza, Mufundiji wetu Mukatakata.—Is. 30:20.