Tubungakenei Pamo Mwanda wa Kutendela Yehova
1. Mutwe wa mwanda wa kitango i mutwe wa mwanda’ka, ne mwanda waka Yehova ye otufwaninwe kutendela?
1 Yehova ye mwinē bukomo bonso, wa tunangu ketudi mpwilo, mubwaninine mu boloke, kifwa kīsokwele kya buswe. Byadi Umpangi, Mwine Upāna Būmi, Mubikadi Mūlu ne Panshi, i aye umo kete otufwaninwe kutōta. (Mit. 36:9; Kus. 4:11; 15:3, 4) Uno mwaka Kitango kya Distrike “Tumbijai Leza Ntumbo” kisa kukankamika mutyima wetu wa kusumininwa kotusumininwe kutendela Leza umo kete wabine.—Mit. 86:8-10.
2, 3. Lelo kwalwila’ko kwiteakanya kuketumweja namani byabuyabuya bivule?
2 Kwiteakanya Kuyampe Kudi na Mvubu: Pa kusaka amba tumwene byabinebine mu masobo a ku mushipiditu asa kwitusobela Yehova, i kipite buya kwiteakanya biyampe. (Ef. 5:15, 16) Lelo kodi mupwe kuteakanya myanda yonso ya kwa kufikila, ya lwendo, ne ya kulomba kushikilwa ku kaji nansha ku masomo? Mu myanda ya bulēme nenki, kokakunga’nka nzovu wimene kolamba bulembe. Shi ulejeleje kulomba mafuku a kushikilwa, ukokeja kubulwa kipindi kimo mu uno mukenga uleta nsangaji. Ketusakilepo shi tubalonga bukomo bukatampe bwa kutanwa ku kitango kya distrike kadi ketushila kintu kampanda kyaba kya kwitubudija kumwena byabuyabuya mu mpangiko yonso mituntulu. Kudi bintu bibidi bikokeja kwitulabika tubulwe kulonda mpangiko na kusumininwa konso. Kimo bidi i kushikata padi pululu, pampikwa kintu kya kwitukinga ku dyuba. Kikwabo i mvula ukokeja kyaba kimo kwiya mu kitulumukila. Byobidi namino, tubalombe bisaka bisele’ko mimvudi ya kwipūta mwa kulondela mpangiko nansha shi kubaikala bino bintu. Batwe bonso tufwaninwe kutanwa ku kipimpo ne kipimpo.
3 Witungile kitungo kya kufika difuku ne difuku kumeso kwa kitatyi pa kipaka. Kino kikakupa muswelo wa kutanwa pa kifuko kyobe kitatyi kishilula lwimbo lubajinji ne kukupa ñeni mijalale senene mwa kutambwila bufundiji bufundijibwa. Bibelo bikashitulwa difuku ne difuku na 8:00 ya lubanga. Bine, kokalamina bantu byaba, poso enka ba mu kisaka kyobe nansha boba bomwiile nabo lumo.
4. Mwanda waka batwe bonso tunenwe kusela bidibwa bya midi bya kukadila ku kitango?
4 Batwe bonso tunenwe kusela bidibwa byetu bya midi kupita’ko kutaluka ku kipaka ke kwenda kukakimba bidibwa pa kukōkolokwa kwa midi. Kulonda biyampe ino mpangiko kukaleta ndoe ne kukupa kitatyi kivule kya kwisamba na banabetu betabije. (Mit. 133:1-3) Ino yuka amba matyupa aladika ne bitomibwa bikolwañana kebifwaninwepo kuselelwa kotulongela kitango.
5. Tukokeja namani kushilula kuteakanya mityima yetu pa mwanda wa kitango?
5 Ivwana ne kufunda: Ezela wāteakenye mutyima wandi mu milombelo mwa kutambwila mwanda wa Leza. (Eza. 7:10) Wāelele mutyima wandi ku bufundiji bwa Yehova. (Nk. 2:2) Tukokeja kwalwila’ko kuteakanya mityima yetu pa mwanda wa kitango na kulanguluka pa mutwe wa mwanda wa kitango ne kwisambila’po na kisaka kumeso kwa ne kutaluka ku njibo kwine.
6. I bika bikokeja kwitukwasha tute mutyima ku mpangiko? (Tala kapango.)
6 Mu byaba byungwila bantu bavule kemo kwikala bintu bivule bya kutala ne mawi mavule akokeja kwitupuakanya. Bino bilabi bikokeja kulumbakanya ñeni yetu kudi muneni. Shi ibalumbakana namino, tukajimija milangwe ya mvubu. Madingi atanwa mu kapango kadi pano akokeja kwitukwasha tuyuke kujadika milangwe pamo ku kitango kyetu.
7, 8. I muswelo’ka otukokeja kulombola amba tubangile bakwetu?
7 Banga Bakwenu: Mafoto ne makamera akokeja kwingidijibwa papityijibwa mpangiko, ino kwatyila’o enka poshikete kutyina amba wakalabika bakwenu. Matelesele ne mamotorola bifwaninwe kubulwa kutyina amba byakakambakanya bakwenu. I kutupu kintu nansha kimo kikatyomekwa ku nshinga ya mudilo nansha ku binanda bya kitango.
8 Bine tudi na kipyupyu kya kusaka kukabungakena pamo mwanda wa kutendela Yehova! Tusumininwei kumutumbija na kutanwa ku kipimpo ne kipimpo, na kwivwana na katentekeji, ne na kwingidija myanda yotufunda.—Kup. 31:12.
[Kapango pa paje 3]
Kwivwana ku Bitango
▪ Languluka pa mitwe ya myanda
▪ Tanga bisonekwa
▪ Lemba myanda mīpimīpi
▪ Tonga’ko myanda ya kwingidija
▪ Pituluka mu byowifunda