“Tutulwile Dijina Dyandi Pamo”
1. I mukenga’ka otusa kwikala nao wa kutulwila dijina dya Yehova pamo, ne i kika kyotufwaninwe kulonga tamba pano?
1 “Yo! tumbijai Yehova pamo nami, kadi tutulwile dijina dyandi pamo ponka,” mo mwāimbile kaimba wa mitōto. (Mit. 34:3) Kitango kyetu kya Distrike “Tunangei ne Leza” kyafwena’ki kiketupa mukenga wa kutulwila dijina dya Yehova pamo na batutu ne bakaka ba mu bipwilo bivule. Lelo kodi mupwe kuteakanya myanda yonso ya kwa kufikila, ya lwendo, ne ya kulomba konje ku kaji? I kiyampe kuta mutyima ku bino bintu kubajinji kwa kitatyi.—Nk. 21:5.
2. Mwanda waka i kya kamweno kufika ku kitango kumeso kwa kitatyi?
2 Kwenda ku Kifuko kya Kitango: Kudi bintu bivule bya kuta’ko mutyima shi tubaenda ku kitango. Kufika kumeso kwa kitatyi kuketukwasha tuleke kutyelewa bya bitupu, kadi kuketukwasha tusokole pa kushikata mwa kutaninwa ku lwimbo ne milombelo imbajinji. (Mit. 69:30) Kumeso kwa kushilula kipimpo, mwimaniji ukashikata ku lukala, papo minjiki ya ñanjilo imba. Penepa umo ne umo umbukata mwetu unenwe kushikata mwa kwanjila mpangiko na bulēmantu.—1 Kod. 14:33, 40.
3. Le i muswelo’ka otukalombola kalēmo ku bakwetu potukimba pa kushikata?
3 Kinenwa kya Leza kitusoñanya amba ‘byonsololo byo tulonga tulongele’byo mu buswe.’ (1 Kod. 16:14) Kitatyi kikashitulwa bibelo na 8:00 ya lubanga, kalēmo kotulēmekele bakwetu kaketukankaja tuleke kwipangila lubilo, kwiyumbila, kwitakika, nansha kwikunkula kotufwila bityi nansha bifuko byotusaka. Bishikatwa bikokeja kukwatyilwa’nka boba bomwiile nabo mu motoka umo nansha bomwikalanga nabo njibo imo.—1 Kod. 13:5; Fid. 2:4.
4. I mpangiko’ka ifwaninwe kukwatwa pa bidibwa bya midi, ne mwanda waka i kya kamweno?
4 I biyampe kusela bidibwa bya midi kupita’ko kutaluka pa kifuko kya kitango ke kwenda kukakimba bidibwa pa kukōkolokwa kwa midi. Kino kiketukwasha batwe bonso tusangele mīsambo yūbaka ne kutanwa ku ngalwilo kwa kipimpo kya kyolwa. Shi musaka kusela bintu bitalaja mema, i kiyampe kusela bityebitye bibwanya kukujibwa munshi mwa kityi kyomushikete. Bintu bikatakata bilaminwa’mo bidibwa bya kisaka, tulabye nansha matyupa aladika, ne bitomibwa bikolwañana kebifwaninwepo kuselelwa kotulongela kitango.
5. Le i mpangiko’ka ikwetwe’ko pa mwanda wa banunu ne boba badi na bulema?
5 Kukekala kyaba kikalaminwa banunu ne boba badi na bulema mwanda wa nabo bamwene’ko. Kino kikebakwasha nabo bashikate senene ne kukingwa ku bintu pamo bwa mvula ne dyuba, shi bikokejika. Musapu utala pa uno mwanda ukelwa lubila ku ngalwilo kwa kipimpo kibajinji.
6. I muswelo’ka otubwanya kuteakanya mityima yetu pa mwanda wa bufundiji botusa kukafundijibwa?
6 Masobo a ku Mushipiditu Etutengele: Mulopwe Yehoshafata ‘wāteakenye mutyima wandi kukimba Leza wa bine.’ (2 Bil. 19:3) Le i muswelo’ka otubwanya netu kuteakanya mutyima wetu kumeso kwa kitango? Bishinte bidi pa nyuma pa Réveillez-vous ! wa 22 Kweji 5 ne wa 8 Kweji 6 i bibadikile kala kusungulula mata pa bino bidibwa bya ku mushipiditu byotusa kukadya. Le wabulwa’po kwitūdila’ko kitatyi kya kubandaula bino bishinte, mwa kwikadila na ndyoko ya byobya bitusobele Yehova? Kuteakanya mityima yetu i ne kulomba Yehova etukwashe twivwanije buluji bwa bufundiji botukafundijibwa ne kumona mwa kwibwingidijija.—Mit. 25:4, 5.
7. Lelo i kika kyotutengele, ne mwanda waka?
7 Batwe bonso tutengele kufundijibwa bivule mu Kinenwa kya Leza, amba tutamine konka ku lupandilo. (1 Pet. 2:2) Nanshi, twendei tukatanwe ku Kitango kyetu kya Distrike “Tunangei ne Leza” ne ‘kutulwila dijina dya Yehova pamo.’—Mit. 34:3.
[Kapango pa paje 3]
Miswelo ya Kutulula Dijina dya Leza
◼ Badikila kwiteakanya
◼ Lombola buswe ku bakwenu
◼ Teakanya mutyima obe