Fwija’ko Yehova mu Kipwilo Kikatakata

1, 2. I mukenga’ka witupa kitango kya distrike, ne i muswelo’ka otubwanya kwikilonga?

¹ Kitango kyetu kya Distrike mwaka ne mwaka kitupanga mukenga wa kutendelwa wa kutumbija Yehova. Twiivwananga pamo na mwēivwanine Davida wāimbile amba: “Nkakufwijangako mu kipwilo kikatakata; nkakutōtanga umbukata mwa bantu bavule bene.” (Mit. 35:18) Ku Kitango kya Distrike “Kikōkeji kya Bwine Leza” kīya’ki, le tukokeja kuyuka namani amba tukatendelanga Yehova bu bantu bekute umbumo?

² Muswelo umo bidi i kupityila ku mwiendelejo wetu. Kapita umo wa pa kifuko palongelwe kitango wānene amba: “Pa mwanda wa byenu bitango, twalombwele ba bipwilo bikwabo byadi bisaka kuluwa kino kifuko amba bāye bamone Batumoni ba Yehova mobateakenyanga kitango, mwanda balongololanga bintu senene.” Na mumwekelo wetu, kwingidila pamo, ne mwiendelejo wetu, umo ne umo ukatuntwila ku bino binenwa bya lutendelo, na bubine, bitendelwa Leza wetu.​—1 Pet. 2:12.

3, 4. Lelo bumvubumvu buketukwasha namani tuvwale bu bantu betela bu bengidi bene Kidishitu, ku kitango ne pa kupwa kwa bipimpo?

³ Mumwekelo wa Muntu ne Muntu: Shi tusaka kuvwala ne kwiumbika mu muswelo uletela Yehova mitendelo, nabya twikalei ba bumvubumvu nansha batūkanye. (1 Tem. 2:9) Dibuku Masomo a Mwingilo, pa paje 132, dinena’mba: “Muntu mutūkanye ulangilanga bakwabo, upelanga kwibafityija mutyima, kadi kakokelangapo milangwe padi aye mwine byampikilwa kwendela’mo.” Mu matanda mavule, muvwadilo wambulwa butūkanye o ke mutumbe. Inoko, Yehova usangelanga bukomo botulonga mwanda wa kumwimanina mobyendele. (Bil. 15:14) Eyo, pavule kitango kilongelwanga mu kifuko kya makayo nansha mu mobo a kwipwija mukose, ino kubungakana kwetu i “kipwilo kikatakata” mu bula bwa mafuku onso asatu a kitango. O mwanda potukongakana ku meso a Yehova, tufwaninwe kuvwala na bulēmantu bufwaninwe Mukatakata Mwine wa diulu ne ntanda.​—1 Bil. 29:11.

⁴ Kadi tufwaninwe kuta mutyima ku mumwekelo wetu kunyuma kwa bipimpo difuku ne difuku. Nansha byotufwaninwe kuvwala bisandi bikwatañene na bitatyi bya kwipwija mukose, nansha potudya mu leshitola, ino i kya kamweno kuvwala ne kwiumbika bu bantu “bakwitela bu-bwine-Leza.” (1 Tem. 2:10) Muvwadilo mwitabijibwe keuyukenangapo ku owa utumbile mu ino ntanda. (1 Yoa. 2:​16, 17) Mabuku etu a bwine Kidishitu adi na bifwatulo bivule bya muvwadilo wa bumvubumvu, wa dyangi unenwe kuvwala bana-balume ne bana-bakaji mu bifuko bishileshile. Kuvwala kayukeno ketu mu kibundi kilongelwa’mo kitango nako kuketuvuluja amba twi bengidi bene Kidishitu kitatyi kyonso.​—2 Kod. 6:​3, 4.

5, 6. I muswelo’ka otukalombola bulēme ku meza a ku mushipiditu a Yehova?

⁵ Lēmeka Meza a Yehova: Mfumu Mubikadi wa diulu ne ntanda wetutekela masobo makata. (Is. 25:6; 1 Kod. 10:21) Shi tukwete na mutyima kudya ku meza a ku mushipiditu a Yehova nabya tukekala na kitungo kya kutanwa ku kitango mafuku onso asatu. Le kodi kala muteakanye kwa kukafikila, mwa kwendela, ne kodi mulombe konje ku kaji? Lelo kodi kala mupange kitatyi kya kwiteakanya ne kya kukuta lwendo mwa kukafikila pa kifuko kya kitango kumeso kwa kitatyi mwa kusokwela pa kushikata, mwa kwisambila na banabenu, ne mwa kwilungila nabo mu kutendela Yehova na lwimbo lwa ñanjilo ne milombelo?​—Mit. 147:1.

⁶ Shi tulēmekele meza a Yehova nabya tukateja na katentekeji mpangiko yonso ne kwepuka bya kwisambasamba na bakwetu, kudya, nansha kunanga mu byaba bishele pululu. Yehova, kupityila kudi kabumbo ka umpika wa binebine ne wa manwa, i mwitupe bidibwa bya ku mushipiditu byotusakilwa pano. (Mat. 24:45) Kekukekala wa kushala ne wa kubulwa’byo mwine. Bambutwile bafwaninwe kushikata pamo na babo bana ne kwibakwasha bamwene’mo ne pa mfulo.​—Kup. 31:12.

7. I bika byotwanenwe pa mwanda utala bidibwa bya pa midi ne mwanda waka?

⁷ Twanenwe kusela bidibwa bya pa midi pa kyaba kya kutaluka pa kifuko kya kitango mwanda wa kukakimba’byo pa kukōkolokwa. Tubafwija’ko batenwe ku kitango kya mwaka wadi’mo mwanda balondele buno buludiki. Bine, kikekala kipite buya shi batwe bonso tulongele monka ne uno mwaka! (Bah. 13:17) Ino mpangiko itupanga mukenga wa kuloelelwa mu kisense kya bu bana na bana bwetu ne kutuntwila ku mushipiditu wa bumo ne ndoe, bintu biletela Yehova wetu bulēme.​—Mit. 133:1.

8, 9. I mikenga’ka mikwabo ya kutendela Yehova yotukamona ku kitango?

⁸ Busapudi bwa Kiponka na Ponka: Pa kwenda ku kitango ne pa kujoka’ko, twikalanga na mikenga mivule ya kutendela Yehova na milomo yetu. (Bah. 13:15) Potudya mu leshitola nansha potwisamba na bengidi ba ku hotela, tukimbei miswelo ya kusapula bukamoni. Ñeni yetu ne mityima yetu ikekala miyule bupeta bwa ku mushipiditu botukatambula ku kitango. Tupei boba botwitana nabo bya kiponka na ponka bino bintu bilumbuluke.​—1 Pet. 3:15.

⁹ Tutengele na nsangaji ino mikenga ya kwesela Yehova “mu bipwilo.” (Mit. 26:12) Tufwijei’ko Yehova pa kimo ku Kitango kya Distrike “Kikōkeji kya Bwine Leza.”

[Kapango pa paje 5]

Bivulujo Bitala Kitango kya Distrike

◼ Bitatyi bya Mpangiko: Mpangiko ikashilula na 9:30 lubanga mafuku onso asatu. Bibelo bikashitulwa na 8:00 lubanga. Minite ibala-inga kumeso kwa kushilula kipimpo, mwimaniji ukemana kala ku lukala papo minjiki ya Bulopwe ya kushilula nayo imba. Batwe bonso tufwaninwe kushikata kine kitatyi’kya mwa kushilwila mpangiko yetu na bulēmantu. Mpangiko ikafula na 5:05 kyolwa mu Dya Butano ne Dya Mposo, ino Dya Yenga ikafula na 4:10 kyolwa.

◼ Byabuntu: Kukalupulwa lupeto luvule pa kuteakanya kitango kya distrike. Pa kino tufwijanga’ko na kutūla byabuntu byetu bya na mutyima tō mwa kukwashisha mwingilo wingilwa ntanda yonso na kutūla’byo ku Njibo ya Bulopwe nansha ku kitango.

◼ Bidibwa bya pa Midi: Mulangwe waletelwe amba muntu ubwanya kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida (masaku). Ke biyampepo kusela bitomibwa bikolwañana ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bayanga kupoteja bidibwa. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kubungakana nansha dimo.​—Yoa. 2:​13-17.) Boba batekela ku mbabula wa makala ku kipaka, bafwaninwe kulomba bidi lupusa ku batutu badi na kiselwa kya kitango bebalombole kobabwanya kwelela kyoto. Bifwaninwe kudyumuka kutyina kuleta byaka.​—Luka 10:​38-42.

◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulo kifuko kyayula mapapye, tubudimbo (tumapalashitike), bijiko bya matyupa, ne bikwabo kwabo. Shi muntu usaka kupota bidibwa ku boba bapoteja pa tumameza (kimfwa: lubombo, kitumbula, kampompo, kyaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa kitango kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.​—1 Pet. 1:​15, 16; Div. 19:10; Kup. 23:14.

◼ Bambutwile ne Bana: Boba betubandila batulumukanga pa kumona betu bana bashikete bateja na katentekeji mpangiko, basoneka myanda, ne kulonda butangi bwa Bisonekwa mu Mabible abo. Bana kebafwaninwepo kulekwa kwampikwa wibatala. Shi ke basake kwenda ku misalani, mbutwile umo nansha mwanabo mutame ufwaninwe kukebatwala. Kadi i biyampe kwilamija mema; kino kikakwasha kwepuka bya kutalukataluka pashiketwe mwanda wa kukakimba mema mu bula bwa kipimpo. Mu kitatyi kya kukōkolokwa namo i biyampe kutadija betu bana kutyina bakekala bapitakana lubilo mu bukata bwa bityi, ku mfulo bapona nansha kuponeja bakwabo. Impupa ya bana ifityijanga ba mityima ne kuleteja kafutululo pa dijina dya Yehova. Mwiendelejo muyampe ao uletelanga Yehova mitendelo ne ntumbo, mwanda aye i Leza wa buluji.​—1 Kodinda 14:40.

◼ Kukwata: Kintu kyo-kyonso kikwata mawi nansha bifwatulo kekifwaninwepo kusomekwa ku nshinga ya mudilo wa pa kitango nansha ku nshinga ya binanda bya mawi, ne bikokeja kwingidijibwa enka shi kebijikakanyangapo bakwabo.

◼ Matelefone a ku Makasa: Afwaninwe kushita diwi nansha kutyepeja’dyo kutyina dyakalabika bantu.

◼ Ku Bifikilo: (1) Kemwakishikatai bavule mu kyumba kimo nansha buvule butabukile pa bobwa bwitabije nansha busaka mufikilwa. (2) Shi ubapele kukafikila kowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikile i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdilwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikile’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu bene Kidishitu bomufikile nabo pa kifuko kimo.​—Ngat. 5:22, 23.