Tukungilei Yehova

1. Le kitango kikekala na mutwe wa mwanda’ka ne mwanda waka kibaiya pa kitatyi kifwaninwe?

¹ Isaya wāsonekele amba: “Yehova i Leza wa mundudi; beselwe dyese bonso bamukungilanga.” (Is. 30:18b) Mu Bible mudi nsekununi mivule ya butyibi bwāletele Yehova pa balwana nandi ne ya bunyongolodi bwa bengidi bandi ba kikōkeji. Lelo i ñeni’ka iboila’ko bengidi ba Yehova ba mu ano mafuku? Le tukalonga bika pano mwa kwiteakenya ku “difuku dikatakata dya kitenteji dya Yehova”? (Yoe. 2:31, 32) Kitango kyetu kya Distrike kinena’mba “Kukūlwa Kubafwena!” kiya’ko’ki kisa kwitukwasha tulangulukile pa bino bipangujo ne kwibandaula. Bine, kiketukwasha tutengele Yehova.

2. I muswelo’ka otukafwija’ko pangala pa kitango kyetu kya distrike?

² Lelo kodi mukwate mpangiko amba ukamwene’mo mafuku onso asatu a kitango? Kimfwa, le kodi mufwene mukulumpe obe wa kaji ne kumulomba konje mwa kukataninwa’ko? Kokilanga amba uno i mwanda wa makayo. Ufwaninwe kwiutula mu milombelo, kubajinji kwa kukalomba mukulu wa mingilo. (Neh. 2:4, 5) Mo monka ne myanda ya kufutyila lwendo, kwa kukafikila, ne bintu bikwabo bya kamweno, kokilaija nzovu wimene kolamba bulembe. Kuteakanya kumeso kwa kitatyi kulombola amba tufwijanga’ko Yehova pangala pa bidibwa bya ku mushipiditu byaetupa. Bakulumpe bafwaninwe kutadija bonso basakilwa bukwashi mwa kwendela ku kitango, nakampata banunu ba pa kipwilo.​—Ngat. 6:10.

3. I ngikadilo’ka ifwaninwe kumweka mu bantu ba Yehova mu kibundi mulongelwa kitango?

³ Mwiendelejo Muyampe Upejanga Leza Bulēme: Kitatyi kyotubungakena pamo ku kitango, mwiendelejo wetu i bukamoni bulumbuluke ku bantu ba mu kibundi. Lelo kino kilomba bika kotudi? Potudi pa kifuko kilongelwa kitango, tutūkijei mityima ya bantu na ngikadilo yetu ya Bwine Kidishitu, kimfwa kitūkijetyima, butalale, kwīfula, ne mutyima unekena. (Ngat. 5:22, 23; Fid. 4:5) Batwe bonso twikale na buswe “kebuloñangapo byampikwa kwendela’mo, kebukimbangapo tumweno twa abo bwine, kebukwatwangapo nsungu.” Nansha shi kubaikala bitukoleja, twikankilei kulonga ‘byonsololo monka mu ntumbo ya Leza.’​—1 Kod. 10:31; 13:5, NW.

4. Bambutwile bakakwasha namani babo bana beendeje mu muswelo uletela Yehova mitendelo?

⁴ Kapita umo wa hotela watendele mwiendelejo ne mumwekelo wa bankasampe papwile kitango kimo amba “ngabilanga nyeke kutambula Batumoni ba Yehova ku hotela yami.” Bine, uno i mwanda uleta nsangaji! Kino kilombola amba bambutwile bafundijanga ne kukengelela babo bana. Nanshi kikekala kibi bambutwile shi bashiya babo bana mu njibo yobafikile wa kwibatala mpika. Bana bafwaninwe nyeke kukengelelwa na batame. (Nk. 29:15) Tulomba mwiendelejo wabo muyampe upeje Yehova mitendelo ne kusangaja mutyima wandi!​—Nk. 27:11.

5. Lelo tukapeja namani Yehova bulēme na muvwadilo ne mwidyangwilo wetu?

⁵ Kuvwala ne Kwidyangula na Bumvubumvu: Batwe bonso tukokeja kutuntwila ku maya anenenwanga kitango kyetu na kwepuka myondele ya mbwija yampikwa kwendela’mo ne bya kwidyangula bikobakane, bipitepite, byampikwa kwendela’mo, ne bya busekwesekwe. Tukepuka kino potwenda ne potujoka ku kibundi kukalongelwa kitango, potukwasha ku mingilo ya ku kitango, ne potutanwa ku bipindi byonso bya kupwila. Batwe bengidi ba Leza tukambakenanga dibajinji ntumbo ne dijina dya Yehova pa kyaba kya byotusaka ne byotuloelelwe. Banwe mitwe ya bisaka mudi na kiselwa kya kutadija shi bisaka byenu bilombolanga buno bumvubumvu ne bujalale bitatyi byonso.​—1 Tem. 2:9.

6. Mwanda waka i biyampe kwikala na mumwekelo wa bulēme mu bitatyi bya kwipwija mukose enka na batwe badi ku kitango?

⁶ Nansha ke mu bitatyi bya kwipwija mukose, ke biyampepo kwilekelela mu mumwekelo wetu. I biyampe kuvwala biyampe senene bwa batwe badi ku kitango potukadya kuntu kampanda shi kupwila kubapu. Kuvwala kayukeno ka kitango nako kuletanga mikenga ya kusapula bukamoni bwa kiponka na ponka.​—2 Kod. 6:3, 4. 

7. I muswelo’ka otukabweja’ko ndudi ne nsangaji ya ku kitango? (Tala “Bivulujo Bitala Kitango kya Distrike.”)

⁷ Isaya wālaile amba: “Yehova wakakungila, amba emufwile lusa; kadi o mwanda wakazunzulwa, amba emukwatyilwe kanye.” (Is. 30:18a) Mutyima wa kufwija’ko Yehova pa kanye ne buntu bwandi bifwaninwe kwitutonona tumupe bulēme mu mwiendelejo ne mu mumwekelo wetu potwibungila pamo ku bitango. Bine, tulomba Kitango kya Distrike “Kukūlwa Kubafwena” kitumbije Leza wetu ne kwitukwasha twikale kumutengela!

[Kapango pa paje 5]

Bivulujo Bitala Kitango kya Distrike

◼ Bitatyi bya Kupwila: Mpangiko ikashilula na 9:30 lubanga mafuku onso asatu. Bibelo bikashitulwa na 8:00 lubanga. Minite ibala-inga kumeso kwa kushilula kipimpo, mwimaniji ukemana kala ku lukala papo minjiki ya Bulopwe ya kushilula nayo imba. Batwe bonso tufwaninwe kushikata kine kitatyi’kya mwa kushilwila mpangiko yetu na bulēmantu. Mpangiko ikafula na 5:15 kyolwa mu Dya Butano, Dya Mposo na 5:05, ino Dya Yenga ikafula na 4:10 kyolwa.

◼ Kukwatyila Byaba: Byaba pa kushikata bikakwatyilwa enka boba bomwiile nabo pamo, mu motoka umo nansha bomushikatanga nabo njibo imo.

◼ Bidibwa bya pa Midi: Mulangwe waletelwe amba muntu ubwanya kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida (masaku). Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bayanga kupoteja bidibwa. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kubungakana nansha dimo.​—Yoa. 2:13-17.) Boba batekela ku mbabula wa makala ku kipaka, bafwaninwe kulomba bidi lupusa ku batutu badi na kiselwa kya kitango bebalombole kobabwanya kwelela kyoto. Bifwaninwe kudyumuka kutyina kuleta byaka.​—Luka 10:38-42.

◼ Byabuntu: Kukalupulwa lupeto luvule pa kuteakanya kitango kya distrike. Pa kino tufwijanga’ko na kutūla byabuntu byetu bya na mutyima tō mwa kukwashisha mwingilo wingilwa ntanda yonso na kutūla’byo ku Njibo ya Bulopwe nansha ku kitango.

◼ Maakishida ne Bundapi bwa Bukidibukidi: Batutu bengila mu mwingilo wa kundapa bya bukidibukidi batompolanga amba betyilwanga enka ne tumyanda tutyetutye. Shi bine usaka kundapibwa bukidibukidi ku kifuko kya kitango, i biyampe kumona tutu utundaila bāya, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.

◼ Kukwata Mawi: Kintu kyo-kyonso kikwata mawi nansha bifwatulo kekifwaninwepo kusomekwa ku nshinga ya mudilo wa pa kitango nansha ku nshinga ya binanda bya mawi, ne bikokeja kwingidijibwa enka shi kebijikakanyangapo bakwabo.

◼ Kukwata Mafoto: Shi usaka kukwata mafoto kitatyi kipityijibwa kipimpo, nabya kokengidija mudilo wa foto.

◼ Matelefone a ku Makasa: Afwaninwe kushita diwi nansha kutyepeja’dyo kutyina kulabika bantu.

◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tubudimbo (tumapalashitike), bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa kitango kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.​—1 Pet. 1:15, 16; Div. 19:10; Kup. 23:14.

◼ Ku Bifikilo: (1) Kemwakishikatai bavule mu kyumba nansha mu njibo momufikile na bantu bakwabo bavule kutabuka pa buvule bwitabije nansha busaka mufikilwa. (2) Shi ubapele kukafikila mu kyumba kyowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikile i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdilwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikile’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu bene Kidishitu bomufikile nabo pa kifuko kimo.​—Ngat. 5:22, 23.