Lelo Wi Mwiteakanye Mwanda wa Masobo a ku Mushipiditu?
1. Lelo kusoba masobo kulombanga kulongolola bika ne bika?
1 Masobo alombanga kwiteakanya senene. Kukimba byakudya, kwibitēka na munsonso, kupwa ke kutūdila’byo bantu. I biyampe kulongolola mwa kutūdila byakudya pa masobo. Kadi, kifuko kya kudīla’po kifwaninwe kuteakanibwa. Beni nabo bafwaninwe kwilongolola, nakampata shi bikebalomba kukatanwa ku masobo adi kulampe. Nansha byo bilombanga mingilo mivule, kudya bidibwa bya munsonso byubaka ngitu pamo na balunda ne ba mu kisaka i kintu kya nsangaji. Panopano ponka Batumoni ba Yehova kujokoloka ntanda yonso basa kubungakana mu bitango bikatampe ne bityetye mwanda wa kutanwa ku masobo a ku mushipiditu—Kitango kya Distrike kidi na mutwe wa mwanda unena amba: “Tengelai”! Mingilo mivule ingilwanga kala mwanda wa kuteakanya mpangiko ne bintu bikwabo. Batwe bonso twi betwe’ko. Pa kusaka amba tukatanwe’ko ne kumwena’mo ne pa mfulo, netu tufwaninwe umo ne umo kwilongolola.—Nk. 21:5.
2. Kutanwa ku bipimpo byonso bya masobo etu a ku mushipiditu kulomba bika ne bika?
2 Mwena’mo ne pa Mfulo: Lelo kodi mwiteakanye kala mwa kukataninwa ku kipimpo ne kipimpo kya ano masobo a ku mushipiditu? Shi bibwanika, wisambe na mukulumpe wa kaji umulombole amba usa kukatanwa ku bipimpo byonso bya kitango, kubadila’mo ne difuku dibajinji dine. Lelo kodi mulongolole kala byendwa nabyo ne kwa kukafikila? Bakulumpe bakata mutyima mwa kukwashisha banunu, balemane ne bakwabo basakilwa bukwashi.—Yel. 23:4; Ngat. 6:10.
3. Mwanda waka ketufwaninwepo kutanwa ku kitango koketwityilwepo?
3 Kudi mu bifuko bikwabo mukalongelwa bitango bya matanda. Vulukai amba kudi bipwilo ne banabetu kampanda ba mu matanda angi betyilwe’ko. Pa kuteakanya bino bitango, bilo ya musambo i mipikule kala bungi bwa bantu ba kwita’ko mungya buvule bwa bishikatwa ne byumba bya mobo a beni. Shi basapudi bakatanwe ku kitango kya matanda kokebetyilwepo, bantu babwanya kuvula kutabuka.
4. Lelo i bivulujo’ka biketukwasha twiteakanye mwa kushilwila mpangiko ya difuku ne difuku?
4 Wilongolole mwa kufikila ku kitango kumeso kwa kitatyi mwa kusokwela pa kushikata kumeso kwa mpangiko kushilula. Ela meso pa mpangiko mu minite ibala inga kumeso kwa kushilula kipimpo. Kulonga namino kukakukwasha ute mutyima obe ku myanda isa kunenwa. (Eza. 7:10) Shi mwimaniji wa kipimpo washilula kwimbija minjiki ya ñanjilo, wiiteje ne kwiteakanya mwa kwimbila lwimbo lubajinji ne kuteja milombelo.
5. Lelo kisaka kyetu kikokeja kumwena namani ne pa mfulo mu mpangiko?
5 Shi bantu ba mu kisaka bashikata pamo ku kitango, bambutwile bakapēlelwa kujingulula shi babo bana batejanga na katentekeji papita mpangiko. (Kup. 31:12) Bonso i bakankamikwe kulonda mu abo ma Bible patangwa bisonekwa. Kulemba myanda mu kīpi kukakukwasha wikale kulonda na katentekeji. Byosonekele bikakukwashanga mwenda mafuku uvuluke myanda mikatampe ya mu mashikulu. Epuka dikinga dya kwisambasamba bya bitupubitupu nansha kutalukataluka papita kitango. Shi udi na telefone ya ku makasa, kokaleka ikupuñanye nansha kupuñanya bakwabo kitatyi kilondwa mpangiko. Ku mfulo ya bipimpo bya difuku, ubulwe’po kwisamba na bakwabo pangala pa myanda ya kusangajanga mu mpangiko ya difuku’dya?
6. Lelo i kintu’ka kisangajanga mpata ku bitango byetu, ne i muswelo’ka otukamwena’mo ne pa mfulo?
6 Ku kitango kya distrike, tudi na mukenga wa kusangela kipwano kyetu kya pa bula na batutu ne bakaka, kintu kisakene mu ino ntanda. (Mit. 133:1-3; Mako 10:29, 30) Lelo ubulwe’po kwimuna ne kwiyuka na boshikete nabo pabwipi ne kubanga nabo kitatyi kya kukōkolokwa pa midi? E po panengele kusela byakudya bipēla ne kushala ku kifuko kya kitango pa kyaba kya kwenda panja ku leshitola. Tadija kutyina kubulwa mukenga nansha umo udi namino wa kwikankamika mu lwitabijo.—Loma 1:11, 12.
7. Lelo i bika byotufwaninwe kuteakanya pa bitala bisandi byotukavwala?
7 Bivwalwa: I biyampe kuvuluka amba Yehova wāsoñenye Bene Isalela balonge manyamvwa ku milomo ya mitwelo yabo, ne lupambo lufituluka dya ku mulomo ku mulomo. (Umb. 15:37-41) Kino kyādi kintu kimweka kibavuluja amba bādi bantu batūlwe pa bula mwanda wa kutōta Yehova. Dyalelo nadyo, muvwadilo wetu wa bulēme ne butūkanye potudi ku kitango witusansanyanga na ino ntanda. Muvwadilo i bukamoni bukatampe ku betutala nansha ke potwenda panja ku kadya pa kupwa mpangiko. Nanshi, langulukila kumeso kwa kitatyi pa byokavwala’ko.
8. Le i muswelo’ka otukokeja kusapula bukamoni ku bakwabo kitatyi kyotudi mu kibundi mudi kitango?
8 Sapula Bukamoni: Shi twilongolole, tukamona muswelo wa kusapwila bantu mu kibundi mudi kitango. Tutu umo waendele ku leshitola na wandi mukaji mpangiko pa kufula, wafunka munwe pa kayukeno ka kitango kavwele ne kwipangula muntu wadi wilaije amba: “Lelo ubamonanga bantu bavule bavwele tuno tuyukeno?” Muntu’wa amba webamonanga ino wiipangulanga kine kyobavwadile’to i kika. Mīsambo yashilula, kadi tutu waita yewa muntu ku kitango.
9. Le tukalombola namani mutyima wa kufwija’ko Yehova, Mwine wetwita ku masobo?
9 Nansha batutu byobakanena mashikulu, bwipangudi ne bya kumwena’ko, i Tata wetu wa mūlu, Yehova, witupa na buswe ano masobo a ku mushipiditu a mwaka ne mwaka. (Is. 65:13, 14) Tukalombola mutyima wa kufwija’ko Mwine witwityile’ko na kutanwa’ko mafuku onso ne kwitomonya kipindi ne kipindi kya kidibwa kya ku mushipiditu kyotukapebwa’ko. Lelo kodi kala mwiteakanye pa kino?
[Kapango pa paje 6]
Bivulujo Bitala Kitango kya Distrike
◼ Bitatyi bya Kupwila: Mpangiko ikashilula na 9:20 lubanga mafuku onso asatu. Bibelo bikashitulwa na 8:00 lubanga. Batwe bonso tufwaninwe kushikata mwa kushilwila mpangiko yetu na bulēmantu kitatyi kyobanena amba ke kushilula minjiki ya ñanjilo. Mpangiko ikafula na 4:55 kyolwa mu Dya Butano ne Dya Mposo, ino mu Dya Yenga ikafula na 4:00 kyolwa. Ku bitango bya matanda, mpangiko ya Dya Buná ikashilula na 1:20 kyolwa ne kufula na 4:55 kyolwa.
◼ Kukwatyila Byaba: Byaba pa kushikata bikakwatyilwa enka boba bomwiile nabo pamo, mu motoka umo nansha bomushikatanga nabo njibo imo.
◼ Bidibwa bya pa Midi: Tubemupe mulangwe wa kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bayanga kupoteja bidibwa. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kubungakana nansha dimo.—Yoa. 2:13-17.)
◼ Byabuntu: Pa kino tufwijanga’ko na kutūla byabuntu byetu bya na mutyima tō mwa kukwashisha mwingilo wingilwa ntanda yonso na kutūla’byo ku Njibo ya Bulopwe nansha ku kitango.
◼ Maakishida ne Bundapi bwa Bukidibukidi: Batutu bengila mu mwingilo wa kundapa bya bukidibukidi batompolanga amba betyilwanga enka ne tumyanda tutyetutye. Shi bine usaka kundapibwa bukidibukidi ku kifuko kya kitango, i biyampe kumona tutu utundaila bāya, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.
◼ Kukwata Mawi: Kintu kyo-kyonso kikwata mawi nansha bifwatulo kekifwaninwepo kusomekwa ku nshinga ya mudilo wa pa kitango nansha ku nshinga ya binanda bya mawi, ne bikokeja kwingidijibwa enka shi kebijikakanyangapo bakwabo.
◼ Kukwata Mafoto: Shi usaka kukwata mafoto kitatyi kipityijibwa kipimpo, nabya kokengidija mudilo wa foto. Koketa muntu wa kwiya kukukwata mafoto ku kitango. Shi ubamumone wāiya’ko, koketabija akukwate.—Yoa. 2:13-17.
◼ Matelefone a ku Makasa: Afwaninwe kushita diwi nansha kutyepeja’dyo kutyina kulabika bantu.
◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tumapalashitike, bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa’po kitango kikale kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pet. 1:15, 16; Div. 19:10; Kup. 23:14.
◼ Bifikilo: (1) Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa. (2) Shi ubapele kukafikila mu kyumba kyowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu Bene Kidishitu bomufikile nabo pa kifuko kimo.—Ngat. 5:22, 23.