Tulondei Kidishitu na Kumwekeja Bulēmantu
1. Lelo mutwe wa mwanda wa kitango kya uno mwaka ukwatañene namani na kumwekeja bulēmantu?
1 Bible unena’mba Yehova, Mubikadi wa diulu ne ntanda, uvwele bulēme. (Mit. 104:1) Yesu wādi nyeke unena ne kulonga bintu mu muswelo upeja Shandi ne mpangiko ya Shandi bulēme. (Yoa. 17:4) Umo ne umo motudi usa kwikala na mikenga ya kwiula Yesu ne kupeja Yehova ntumbo ku Kitango kya Distrike “Tulondei Kidishitu!” kīya’ko’ki.
2. Lelo kwiteakanya kwetu mwa kukataninwa ku kipimpo ne kipimpo kupejanga Yehova bulēme namani?
2 Butōtyi Bulēme: Tukokeja kupeja Yehova bulēme na kutanwa ku masobo a ku mushipiditu awitutekēle. Lelo kodi mwisambe na mukulumpe obe wa kaji ne kulongolola bintu byonso mwa kutaninwa ku difuku ne difuku dya kitango, ne Dya Butano dine kumo? Le wi mwilongolole mwa kufikila kumeso kwa kitatyi mwa kumwena pa kushikata ne kutanwa ku lwimbo ne ku milombelo ya ñanjilo? Le kodi muteakanye bidibwa bya midi mwa kudila’byo pamo na banabenu pa kifuko kya kitango? Ku ngalwilo kwa kipimpo ne kipimpo, shi mwimaniji wetwite na kanye konso kushikata pa byaba byetu kumeso kwa minjiki kushilula, tufwaninwe bukidi bonka kutyiba mīsambo yetu ne kushikata mwa kushilwila mpangiko.
3. Lelo kuta mutyima mpata ku mpangiko kupejanga butōtyi bwetu bulēme namani?
3 Kadi kuta mutyima mpata ku mpangiko nako kupejanga Tata wetu wa mūlu bulēme. Mubangi umo, pa kupwa kutala mwapityile kitango kya distrike kya kwabo, walembele amba bantu batala badi batendela “mwiendelejo muyampe wa boba badi’ko, pa kwibamona balonda talala nyā na bulēme byobya binenwa’ko kadi balamete bimwekelele ku bintu bya ku mushipiditu.” Kadi wesambile ne pa “bana bavule beshile na bakwabo bonso . . . , abo bonso beendeja biyampe senene, ne kadi kasha bekwata’ko na kutala mavese mu Mukanda Ukola.” Shi mpangiko ipita, ke kitatyipo kya kwisambasamba, kya kwitumina misapu mu matelefone, kya kudya, nansha kya kunangakana mu mapitapita. Bankasampe bafwaninwe kushikata na bambutwile babo mwanda wa bambutwile bebakwashe nabo bamwene mu mpangiko. (Kup. 31:12; Nk. 29:15) Kulonga buno bukomo i kulēmeka bakwetu ne kufwija’ko pangala pa bidibwa bya ku mushipiditu bya kamweno byotutambula.
4. Mwanda waka tufwaninwe kwikala na mumwekelo wa bulēmantu potudi ku kitango?
4 Mumwekelo wa Bulēmantu: Bavule bafwijije’ko pangala pa myanda yobetuvulwije mu dishikulu “Twikalei na Bulēmantu bwa Bwine Kidishitu Kitatyi Kyonso” dyanenwe ku kitango kya distrike kya mwaka wadi’mo’u, dyanene dikoma amba bengidi ba Leza bafwaninwe kulonga buninge bwa kumwekeja bulēmantu bwa Bwine Kidishitu mu muvwadilo ne mu mwidyangwilo wabo. Uno mwaka nao tufwaninwe kuta mutyima mpata ku uno mwanda. Mumwekelo wetu ulombolanga motumwenine Yehova ne madyese a kwikala Batumoni bandi. Tufwaninwe nyeke kuvwala bu bantu “bakwitela bu-bwine-Leza.”—1 Tem. 2:9, 10.
5. I muswelo’ka otukokeja kulama mumwekelo wa bulēmantu kitatyi kyotwiolola mu kibundi mulongelwa kitango?
5 Lelo tufwaninwe kwikala na mumwekelo wa bulēmantu enka kitatyi kyotulonda mpangiko? Vuluka’mba bavule baketutala potuvwele tuyukeno twa kitango mu kibundi motulongela kitango. Pa kino, mumwekelo wetu ufwaninwe kwishila na wa bantu bonso. Nanshi, nansha ke potwiolola, kimfwa potwenda kudya panja kupwa kwa mpangiko, tufwaninwe kuvwala bu bengidi baile mu kibundi mwanda wa kutanwa ku kitango kya Bwine Kidishitu kadi ketufwaninwepo kuvwala bivwalwa pamo bwa bino: satana (jeans), tuputula, nansha masengele. Bivwalwa byenzankane, ke bya katutupo, abyo’ko bibwane kadi bidyangule, bimwekejanga bulēmantu. Bine, kino kikaleta bukamoni buyampe’po kashā mu kibundi! Yehova usangalanga shi mumwekelo wetu umwekeja mwingilo wetu wa bu bengidi.
6. I bipa’ka biyampe bilupuka ku kumwekeja bulēmantu bwa Bwine Kidishitu?
6 Bipa Bisangaja: Kumwekeja bulēmantu bwa Bwine Kidishitu ku bitango byetu kuletanga mikenga ya kusapula bya kiponka na ponka kadi kushilanga boba betutala milangwe miyampe potudi. Ku mfulo kwa kitango kimo, mulungu umo wanene amba: “Ketwamwene kashā bantu badi na mwikadilo muyampe na banwe. Banwe mudi kala byobya bitusakila Leza kwikala.” Kumwekeja bulēmantu kulombola amba twilēmekele ne kwiswa batwe bene na bene kadi kutumbijanga Yehova. (1 Pet. 2:12) Kulombolanga’mba twakaminwe Leza ne amba tufwijanga’ko pangala pa madyese a kufundijibwa na Tata wetu. (Bah. 12:28) Shi ke pano, twielelei’ko kumwekeja bulēmantu pano potutengele Kitango kya Distrike “Tulondei Kidishitu!” kisa kulongwa uno mwaka.
[Kapango pa paje 5]
Bivulujo Bitala Kitango kya Distrike
◼ Bitatyi bya Mpangiko: Mpangiko ikashilula na 9:20 lubanga mafuku onso asatu. Bibelo bikashitulwa na 8:00 lubanga. Shi minjiki ya Bulopwe ya ñanjilo ibashilula, batwe bonso tufwaninwe kushikata mwa kushilwila mpangiko yetu na bulēmantu. Mpangiko ikafula na 5:05 kyolwa mu Dya Butano ne mu Dya Mposo, ino Dya Yenga ikafula na 4:10 kyolwa.
◼ Kulama Bishikatwa: Ba kulamina bishikatwa i enka boba bomwiya nabo lumo mu motoka nansha bomushikata nabo ku njibo imo.
◼ Bidibwa bya Midi: I biyampe muntu ne muntu asele byakudya bipēla inoko abyo bileta bumeni, kimfwa: mikate (myende umbula nansha tumpompo), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka byaka. Ke biyampepo kusela bitomibwa bikolwañana ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bāyanga kupoteja bidibwa. (Tai mutyima: Bantu bāya kupoteja byakudya kebafwaninwepo nansha dimo kulekwa batwela mu kifuko kya kubungakena’mo. (Yoa. 2:13-17) Boba batekela ku mbabula wa makala ku kipaka, bafwaninwe kulomba bidi lupusa ku batutu badi na kiselwa kya kitango bebalombole kobabwanya kutūdila kyoto. Bifwaninwe kudyumuka kutyina kuleta byaka.—Luka 10:38-42.
◼ Byabuntu: Kulupulwanga lupeto luvule pa kuteakanya kitango kya distrike. Pa kino tufwijanga’ko na kutūla byabuntu byetu bya na mutyima tō ku Njibo ya Bulopwe nansha ku kitango mwa kukwatakenya mwingilo wingilwa ntanda yonso.
◼ Byaka ne Myanda ya Kupēlakana Nayo: Batutu ba mingilo itala myanda ya kupēlakana nayo batompolanga’mba bebetyilanga ne tumyanda tutyetutye’tu. Shi kubaikala misongo ya kupēlakana nayo ku kipaka, nabya lombola mutundaiji udi nobe kubwipi, nandi ukayukija ponka na ponka mwingilo wa Bundapi Bubajinji mwanda wa boba batongelwe ku uno mwingilo ku kitango batale bukata bwa misongo ne kuleta’po bukwashi.
◼ Kukwata Myanda: Kintu kyo-kyonso kikwata mawi nansha bifwatulo kekifwaninwepo kusomekwa ku binanda bya mawi nansha ku nshinga ya mudilo ingidijibwa ku kitango, ne bikokeja kwingidijibwa enka shi kebipuakanyapo bakwabo.
◼ Kukwata Mafoto: Shi ukwata mafoto papita mpangiko, kokadyemuna mudilo wa foto.
◼ Matelefone a ku Makasa: Afwaninwe kushita diwi nansha kutyepeja’dyo kutyina dyakalabika bantu.
◼ Bukundwe: Pavule pene kimwekanga amba, boba bapota bidibwa ku bapoteja kebo kwela panshi byobya bivungilwa’mo bidibwa. Mfulo mfulō kifuko kyayula mapapye, tubudimbo (masashe), bijiko bya matyupa, ne bikwabokwabo. Shi muntu usaka kupota bidibwa ku boba bapoteja panja (kimfwa: lubombo, kitumbula, kampompo, kyaleo nansha shi kika shi kika), ufwaninwe kutadija amba kine kyadi kivungilwe’mo bidibwa’kya kyelwe ku kyala, ke panshipo, mhm. Shi tubamone papye nansha kabudimbo kobaponeje panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama tō kifuko kilongelwa’po kitango. Bukundwe i mwanda unenwe kuta’ko bonso mutyima. Shi umo ne umo avuije kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pet. 1:15, 16; Div. 19:10; Kup. 23:14.
◼ Ku Bifikilo: (1) Kemwakishikatai bavule mu kyumba kimo nansha buvule butabukile pa bobwa bwitabije nansha busaka mufikilwa. (2) Shi ubapele kukafikila kowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle muyuke i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdīlwe beni. Kyotusaka i kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu Bene Kidishitu bomufikile nabo pa kifuko kimo.—Ngat. 5:22, 23.