Ta Mutyima ku Binenwa Bikola
1 Ke myanda yonsopo inena muntu ifwaninwe kuta’ko mutyima. Ino shi Leza kanena, i biyampe kuteja. (Kup. 28:1, 2) Tudi na dyese mwanda balembi bādi batononwa na mushipiditu bālembele ‘binenwa bikola bya Leza’ bya kamweno kotudi. (Loma 3:2) Kitango kya distrike kīya’ko’ki kisa kwitupa mikenga ya kwivwana bino binenwa kitatyi kyobitangwa ne kyobishintululwa. Le i muswelo’ka okokeja kuta’ko mutyima byabinebine?
2 Fika Kumeso kwa Kitatyi Lubanga ne Lubanga: Langa’po mwādi mwisakenya bene Isalela pobādi bebasapwila kuketana na Yehova ku Lūlu lwa Shinai mwanda wa kwivwana Bijila byandi! (Div. 19:10, 11, 16-19) Shi nobe wisakanyanga uno muswelo mwa kukalombwelwa bulombodi bwa Yehova ku kitango kya distrike, kukabulwepo kukwata mpangiko ya kufika’ko kumeso kwa kitatyi difuku ne difuku. Shi tulondela, ketubwanyapo kulonda myanda yonso, mwanda tusa kunangakana ne kukambakanya bakwetu kotukimba pa kushikata. Bibelo bya ku kipaka kulongelwa kitango bikashitulwa na 8:00 ya lubanga, ebiya mpangiko ikashilula na 9:30 difuku ne difuku.
3 Kudi bamo bafikanga lubanga, ino kipimpo kyashilula ne kushilula abo kebashikete. Mwanda waka? Mwanda belaijanga’nka shi abaivwana mwimaniji watela lwimbo lubajinji ye kwanza kebaleka kwisamba na balunda nabo kebenda pa bifuko byabo. Tuyukei amba mwimaniji ukashikata ku lukala minite mivule kumeso kwa kutela lwimbo lubajinji lwa kipimpo ne kipimpo, pakivuma minjiki ya Bulopwe mileululwe. Kino kyo kya kuyukila’po amba ke kitatyi kya kushikata! Penepo shi lwimbo lubajinji lubatelwa, tukekala kala beteakanye mwa kupūkijija pamo buimba bwa kutendela Yehova.
4 Twikalei bwa Kisaka Kimo Potuteja: Pādi patangwa binenwa bikola ku meso a kitango kya bene Isalela, bisaka, ne “twana” twine kumo, bonso bādi bateja ne kufunda myanda. (Kup. 31:12) O mwanda ke biyampepo kutala bana ‘balekelelwe bitupu’ ku bitango byetu. (Nk. 29:15) Bambutwile, shikatyilai pamo na kisaka kyenu kyonso—ne na bansongwanzele bene. Kudi bambutwile bamo belaijanga enka shi lwimbo lwa ñanjilo lubashilula ye kutwala kebakatwala bana kwa kwendalela. Ke biyampepo, mwanda kebifundijangapo bana kuyuka mvubu mikatampe idi na ñimbo ne milombelo mu butōtyi bwetu. Nanshi i kipite buya kuvuluka kukendalala kumeso kwa kushilula kipimpo ne kipimpo, shi bibwanika!
5 Shi tukōkolokwa bininge bufuku bonso ne kwepuka kudya bidibwa bileta mekuta mu dyuba, tukateja myanda biyampe. Jadika milangwe pamo mwa kulondela myanda inena muneni. Kokapuakanya ñeni yobe. Londa butangi bwa bisonekwa mu Bible obe. Lemba myanda mu kīpi. Kyaba kinenwa kishinte, pituluka mundamunda mu myanda inena muneni, langa muswelo okengidija’yo mu būmi bobe. Shi difuku dibapu, pitulukai mu mpangiko na kisaka kyonso pamo. Le i myanda’ka yasangaja umo ne umo? Kisaka kyenu kikengidija’yo namani?
6 Kwata Kinenwa kya Leza na Bulēme: Bitango bitupanga mikenga miyampe ya kwisamba na balunda netu ne kwikala mu kisense kya kwiubaka. Shi tufika kumeso kwa kitatyi, tukekala na kitatyi kya kwisamba kumeso kwa mpangiko kushilula. Ino kudi bamo bekwatanga’ko na mīsambo ayo mpangiko papo yendelela, balanga amba byobesamba kebilabikapo bakwabo mwanda bantu i bavule. Kulanga namino i kwidimba. Nansha shi kupwila kulongelwa pa kifuko kikatampe, tuyukei amba i kitatyi kya kuteja, pamo’nka na motutejejanga ku kupwila ku Njibo ya Bulopwe. Matelesele, bikolo biselwa ku makasa, makamera, ne mafoto kebifwaninwepo kulabika nabyo bemvwaniki papityijibwa mpangiko.
7 Mosesa, paādi utambula Bijila bya Yehova, kādipo udya “byakudya nansha kutoma mema.” (Div. 34:28) Ne batwe netu mo monka, ke biyampepo kudya nansha kutoma papityijibwa mpangiko. Ponso enka kudi myanda ya misongo ilomba kudya ne kutoma, shi bitupu i biyampe kwilaija ‘kitatyi kifwaninwe.’—Mus. 3:1.
8 Ku bitango bimobimo batutu, bakaka ne bankasampe banangakananga mu mapitapita, ayo mpangiko papo yendelela. Banabetu batundaila bāya bakapebwa misoñanya ya kulombola bano banangakana amba jokelai pa byaba byenu. Banabetu bengila ku mingilo mishileshile bafwaninwe kushikata na bemvwaniki kinondanonda’tu na pobapwa mingilo yabo. Bafwaninwe kushikata pa byaba byabo bemvwana bishinte. Ke biyampepo kwibamona basankakana ku mabilo, benangila mu kyaba kipityijibwa mpangiko, poso shi enka kudi mwingilo kampanda wibapelwe ulomba kulonga namino.
9 Ketusakilepo nansha dimo kwikala bantu ba “kapukutwi” potuteja Kinenwa kya Leza. (Bah. 5:11) Nanshi twikalei na mutyima wa kulombola bulēme bufwaninwe bwa kuteja na katentekeji kitatyi kikesambwa binenwa bikola bya Yehova ku kitango kya distrike kīya’ko’ki.