‘Bungakanya Bantu’

1. Le i kwiifwana’ka kwiifwene bitango bya distrike ne bya matanda na kwibunga kwa kasekuseku kwēbungile bene Isalela kitatyi kityetye pa kupwa’tu kutamba mu Edipito?

¹ Kitatyi kityetye pa kupwa kutamba mu Edipito, Yehova wāsoñenye Mosesa ‘abungakanye bantu’ ku Lūlu lwa Shinai mwanda wa bevwane binenwa Byandi amba Bamutyine kadi bamone mwa kufundijija babo bana mashinda Andi. (Kup. 4:10-13) Bine, kino kyādi kitatyi kya kasekuseku ne kya kwikankamika mu lwitabijo! Mu myeji’tu mityetye īya’ko’i, bantu ba Yehova basa kwibungila pamo ku bitango bya distrike ne bya matanda mwanda wa kufundijibwa na Yehova. Le i bika byotufwaninwe kulonga pa kusaka’mba tukamwene’mo ne pa mfulo?

2. Le i bika byotufwaninwe kulonga pa ‘kutengela’ kitango?

² ‘Tengela’: Yehova wāsoñenye bene Isalela bekale ‘batengele’ kuno kubungakana kwa kasekuseku kwa pa Lūlu lwa Shinai. (Div. 19:10, 11) Muswelo umo onka, boba bonso basa kukatanwa ku bitango, banenwe nabo kwiteakanya senene, ke enkapo boba bakekala’ko na bipindi. Kimfwa, bavule bafwaninwe kwiteakanya mwa kukalombela konje ku kaji. Padi ngikadilo yodi’mo ikwatañene na yoya yādi’mo Nehemia. Wāitabije kushiya kandi kaji ka bu kaseya wa Mulopwe Alatazelekishishi mwanda wa ende ku Yelusalema akakwashe ku kubakululwa kwa mpembwe ya kibundi, inoko wādi uyukile amba padi mulopwe kaketabijapo. Nehemia wālombela, kupwa na bukankamane bonso, wākanena kulomba kwandi na binenwa biyampe. Mulopwe wāmwitabijija ende kadi wāmupa ne bintu bya kukakwasha ku luno lubako! (Neh. 2:1-9) Kutentekela pa kulomba konje kudi mukulumpe obe wa kaji, lelo kodi kala mwiteakanye mwa kwendela ne kuyuka kwa kukafikila? Bakulumpe bakasangela kukwasha muntu ense usakilwa bukwashi. Witungile kitungo kya kufika kumeso kwa kitatyi ku mpangiko ne mpangiko, ne kwiadija mwanda wa ‘kuta mutyima mpata’ ku byosa kwivwana.—Bah. 2:1.

3. Le i bika biketukwasha tuteakanye mutyima wetu pangala pa kitango?

³ Muswelo mukwabo wa mvubu ukalombola’mba tutengele i wa kuteakanya mutyima wetu mwanda wa kwivwana ne kufundijibwa. (Eza. 7:10) Mpangiko ya kitango ikatūlwa kumeso kwa kitatyi pa Diteba dya jw.org kadi pakekala ne mitwe ya myanda ya mashikulu pamo ne kisonekwa kimo nansha bibidi bine biselele myanda mikatampe ya dishikulu ne dishikulu. Ino ikekala myanda miyampe ya kubandaula mu bwetu Butōtyi bwa Kisaka bwa kyolwa mu mayenga alondakana na kitango. Basapudi bamo batampanga ino mpangiko ne kwiingidija bu pa kusoneka myanda kampanda kitatyi kya kitango.

4. Lelo bambutwile bakengidija kitango namani mwanda wa kufundija babo bana?

⁴ ‘Fundija Bobe Bana’: Kitungo kimo bidi kya kitango kyālongēlwe pa Lūlu lwa Shinai, kyādi kya kukankamika bambutwile bene Isalela ‘bafundije babo bana.’ (Kup. 4:10) Kitango kipanga bambutwile mukenga wa pa bula wa kufundija babo bana. Babutwile bafwaninwe kushikata pamo na babo bana kitatyi kipita mpangiko ne kwibakwasha beilonde na katentekeji. Bisaka bifwaninwe kwisambila pa ino mpangiko kya pamo kyolwa ne kyolwa kyonso nansha kitatyi kyobakalonga butōtyi bwabo bwa kisaka.

5. Le i bika byotukamwena mu kutanwa ku kitango?

⁵ Kitango kya kasekuseku kya pa Lūlu lwa Shinai kyākweshe bene Isalela basangele dyese dyabo dya pa bula dya kwikala bantu ba Leza. (Kup. 4:7, 8) Kitango kyetu i kilongololwe mwanda wa kwitukwasha netu tusangele dyese dya kwikala bantu ba Leza. Mu ano mafuku asatu tukabwanya kukomena ntanda mibi ya Satana, tukatūkijibwa mutyima ku mushipiditu kadi tukatamija bu bana na bana bwa mu paladisa yetu ya ku mushipiditu. (Isa. 35:7-9) Pano pafwena difuku dya Yehova, po pene poketufwaninwepo kuleka uno mukenga wa kwibungila pamo mwanda wa kwikankamika umo ku mukwabo!—Bah. 10:24, 25.