Ingidija Senene Mapepala a Kala

Kubīka’nka lotwabīkile mapepala a kala nansha kwela’o, kekukakwashapo muntu nansha umo, o mwanda i biyampe twabanye’o. Dipepala’tu dimo dibwanya kutonona muntu asangele bubinebine ne kumulengeja ashilule kwita dijina dya Yehova. (Loma 10:13, 14) Ino myanda ilonda’ko i bulombodi bwa mwa kwingidijija senene mapepala a kala.

• Kitatyi kyosapula mu myaba kemusapulwangapo divule, padi ubwanya kushiya dipepala ku njibo kwampikwa muntu pa kifuko pakokeja kumona.

• Kitatyi kyodi mu busapudi bwa mu kitango kya bantu mu kifuko kya kikungilo, kimfwa mu bishīko bya myotoka nansha mu ngāla, ipangula bantu shi badi na buya bwa kutanga kintu kampanda, wibalombole manimelo mavule a mapepala, ne kwibaleka batonge.

• Kitatyi kyopempula kokwa kufudilwanga bisandi, mobo a kilelo, mpitalo, nansha bifuko bikwabo bidi namino bya mu mwaba wa kyenu kipwilo, shiya mapepala matyetye mu kifuko kya kikungilo. Kumeso kwa kushiya’o, divule dine i biyampe kulomba lupusa kudi mwimaniji shi udi’ko. Shi ubatana’ko kala mapepala makwabo, ke biyampepo kushiya mavule.

• Kitatyi kyowiteakanya mwanda wa kulonga kujokela’mo, langulukila pa byobya bibwanya kusangela muntu ne muntu okapempula. Le udi na kisaka? Lelo i muntu usenswe ñendo? Lelo i kidimye? Tala mu mapepala a kala shi mudi kishinte kyabwanya kusangela kutanga, nabya kamulombole’kyo kitatyi kyokamujokela.

• Shi ubatana muntu usangela ku njibo kowadi upempula’nka kupempula ino kumutana mpika, mulombole mapepala kampanda a kala akadipo nao.