Mwa Kusapwila na Kaditempa ka Mabuku

Kusapula na kaditempa nansha meza kwenda kulumbulula mwingilo wa kwita bantu ba mityima myoloke ku bubinebine. (Yoano 6:44) O mwanda, bakulumpe bakankamikilwe kuteakanya’ko busapudi bwa kumeso a bantu bonso mu mwaba wa kipwilo mudi bavule benda lwanshi. Shi tumatempa tutundululwa tundululwanga, nabya divule ketusakilwapo kulomba ku balupusa. Le i baani babwanya kusapula namino? Basapudi bonso badi na bujalale, badi na mwiendelejo mulumbuluke, kadi ba bwino mu kufundija. Tala kunshi’ku bya kulonga, ne bya kuleka kulonga musapudi mwanda wa kulupuke bipa biyampe.

Bya kulonga:

Kwikala bya bulunda, wa kizaji, wa mutyima wa kukwasha bapityeshinda. Basapudi bamo balombolanga nsangaji, mimungomungo ya bine ne lwimu lwa nsangaji. Shi muntu watale ku kaditempa, padi ubwanya kunena’mba, “Shi usakile ubwanya kusela’po kikusangaja.”
Imanina kulampe bityetye na ku kaditempa. Mu bifuko bimo basapudi balupulanga bipa bilumbuluke na kwimanina pepi bininge na kaditempa. Ino bakwabo bamwene’mba kulonga namino kutuyulanga bapityeshinda ke bekaka pa kwimana, o mwanda basonsolokanga’ko bityetye bakungila, kufika ne bimana muntu ku kaditempa. Shi wafwena, tompa kushilula mīsambo nandi, padi na kumwipangula’mba, “Le kashā, kodi mwiipangule kino kipangujo?”
Ingidija Bible ponso pobibwanika.
Lombola mulongelwanga kifundwa kya Bible kudi yewa usela dibuku dyetu dya kwifunda kimfwa dibuku Bifundija Bible. Mutadije video Mwanda Waka Twifunde Bible? mu telefone nansha mu tabulete.
Shi bibwanika, lemba adelese ya boba basangela musapu. Shi muntu kadipo mu mwaba wa kyenu kipwilo, yuja fomu Veuillez suivre l’intérêt (S-43) upe’ye mulembi pambulwa kwija.