“Bino Binenwa . . . Bikekala pa Mutyima Obe”

Bambutwile badi pamo bwa bakumbi. Bafwaninwe kuta babo bana mutyima, bene babwanya kupēlelwa kusāsuka ne kukwatwa. (Nki. 27:23) Le i muswelo’ka ubwanya bambutwile kuvuija kino kiselwa? Bafwaninwe difuku ne difuku kupityija kitatyi na kwisamba na babo bana mwanda wa kuyuka byobya bidi mu ñeni ne mu mityima yabo. (Nki. 20:5) Kadi, bambutwile bafwaninwe kūbaka na bingidilwa kebipi mudilo mwanda wa kukomeja lwitabijo lwa babo bana. (1 Ko. 3:10-15) Butōtyi bwa kisaka bwa kitatyi kyonso byobukwashanga kufikila pa kino kitungo, talai mu kisaka video inena’mba, “Bino binenwa . . . Bikekala pa Mutyima Obe” (Falanse) ne kwisambila pa bino bipangujo bilonda’ko.

(1) Lelo i bika byalengeje kisaka kya tutu Roman kileke kuta mutyima ku bintu bya ku mushipiditu? (2) Mwanda waka mpangiko mibajinji ya tutu Roman ya butōtyi bwa kisaka keyaendekelepo? (3) Lelo i musoñanya’ka wa mu Bisonekwa ukwasha kutamija bana biyampe? (Kup. 6:6, 7) (4) Le i bika bikatuntwila ku mīsambo miyampe mu kisaka? (5) Le bana basakanga bambutwile babo balonge kwipāna’ka? (6) Le ba Tutu Barrow ne wandi mukaji baikele namani na lupusa luyampe pa kisaka kya Roman? (Nki. 27:17) (7) Lelo i kwiteakanya’ka kwa kumeso kwa kitatyi kufwaninwe mutwe wa kisaka kulonga mwanda wa butōtyi bwa kisaka bwikale bwa kamweno? (8) Le i muswelo’ka washilwile Tutu Roman kushinta bintu mu kisaka kyandi? (9) Mwanda waka kulēmeka mpangiko ya butōtyi bwa kisaka kudi na mvubu? (Ef. 6:4) (10) Lelo i myanda’ka imo ya kamweno ya kwifunda mu butōtyi bwa kisaka? (11) Le Tutu Roman wadi namani utalala ino musumininwe paadi ukwasha Marcus amone kamweno kadi mu kulonga byoloke? (Yel. 17:9) (12) Le ba Tutu Roman ne wandi mukaji balangulukile namani na Rebecca mwanda wa kumukwasha akwate butyibi buyampe mu kipwano kyandi na Justin? (Mako 12:30; 2 Tm. 2:22) (13) Lelo ba Tutu Roman ne wandi mukaji balombwele namani lwitabijo kitatyi kyobajadikile bintu mu būmi bwabo? (Mat. 6:33) (14) Le ino video ilombola namani’mba kidi na mvubu mitwe ya bisaka imanine butōtyi? (1 Tm. 5:8) (15) Shi wi mutwe wa kisaka, lelo ubasuminwa kulonga bika?

KUDI MITWE YA BISAKA: Ino video ya myanda ya mu ano etu mafuku yatadilwe ku bitango bya ntanda bya mu 2011. Mu kino kitatyi, le wamwene amba bikulomba kulonga bujadiki mu butōtyi bwenu bwa kisaka? Lelo pano bidi namani? Shi bikulomba kulonga bujadiki buvule, tubakwisāshila ushinte pa mwanda wa kamweno ka nyeke ka kyobe kisaka.​—Ef. 5:15-17.