Mawi Makwatwe—Mwa Kwiengidijija

1. Kutentekela pa bitabo byetu, i mpangiko’ka mikwabo ya kamweno yotudi nayo?

¹ Bavule basangelanga kwingidija jw.org pa kutanga binenwa bya bubine bifwaninwe kadi bya bine. (Mus. 12:10) Ino le kodi mwingidije mawi makwatwe? Akwashanga kuteja myanda mivule idi pa diteba dyetu. Le tumwenanga namani mu ano mawi makwatwe?

2. I muswelo’ka otubwanya kwingidija mawi makwatwe mu kifundwa kyetu kya pa kasuku nansha kya kisaka?

² Mu Kifundwa Kyetu kya pa Kasuku Nansha kya Kisaka: Kuteja Bible, mapepala, nansha dibuku dikwatwe mu mawi potwenda nansha potwingila mingilo yetu ya difuku ne difuku kuketukwasha twingidije biyampe kitatyi kyetu. (Ef. 5:15, 16) Tubwanya kutobaja butōtyi bwetu bwa kisaka na kuteja butangi koku tulonda mu mabuku etu. Kwingidija mawi makwatwe mu kifundwa kya pa kasuku kuketukwasha tulumbulule mutangilo wetu nansha kwifunda ludimi lweni.

3. Le i bāni mu wetu mwaba bakamwena mu mawi makwatwe?

³ Mu Mwingilo: Bantu badi mu wetu mwaba bemona bu kebadipo na kitatyi kya kutanga bakokeja kusangela kuteja mawi makwatwe. Kadi tukokeja kutana boba banena ludimi lungi, abo’ko babwanya kwitaba biyampe shi abaivwana musapu wa Bulopwe mu ‘ludimi lwabo lobabutwidilwe’mo.’ (Bil. 2:6-8) Mu bipindi bimo, kwivwana i kwa kamweno mungya kibidiji kyabo. Kimfwa, mungya kibidiji kya bene Hmong, bantu basekununanga ku kanwa mānga yabo ku lukongo lukwabo kadi balamanga ino myanda yobevwana mu mityima yabo. Bibidiji bivule bya mu Afrika bisangelanga mānga īsambwa ku kanwa.

4. Le i bipangujo’ka byotukokeja kwiipangula pa kukwasha bantu mu wetu mwaba?

⁴ Le mu wenu mwaba bikalanga biyampe kwivwanija mwinē njibo mawi makwatwe mu lwandi ludimi? Lelo muntu kampanda ukokeja kumwena mu dibuku dikwatwe dyotumutumina ku bingidilwa bya nshinga? Le tukokeja kutentwila dibuku dikwatwe pa CD ne kupa dishike’dya muntu usangedile musapu, padi kumupa’dyo pamo ne dibuku ditampwe? Dibuku, boloshile, dipepala nansha trakte ye-yense otutumina muntu kupityila ku bingidilwa bya nshinga mu mwingilo wetu ukabalwa bu mabuku otupēne ku kweji. Mawi makwatwe i metulupwilwe mwanda wa twiengidije mu kifundwa kya kasuku ne mwanda wa kukuna nkunwa ya bubine bwa Bulopwe.—1 Ko. 3:6.