Le Wingidijanga Biyampe Butangi Bukwate bwa Bible?

Le butangi bukwate bwa Bible i bika? Butangi bukwate bwa Bible i butangi bukwatwe bwa Bwalamuni Bwa Ntanda Mipya. Buno butangi bwa Bible bukwatwanga bityebitye mu ndimi mivule. Kintu kisangajanga mu buno butangi i mwanda mwingidijibwanga mawi meshileshile kukwatañana na muntu obesambila’po mu Bible. Kadi mu buno butangi bishima bitañwanga na kutyityija ne kwiela’mo mwanda wa kunena’mba, musapu wa bubine wa mu Bible utambe enka mowikadile.

Le bamo bamwenanga namani mu butangi bukwate bwa Bible? Bamo batejanga butangi bwa Bible bukwate, basangelanga byobateja mwanda bamonanga’nka na abyo bilongeka dyalelo. Pobateja batangi beshileshile belekeja bantu ba mu Bible, bamonanga mu ñeni myanda ya mu Bible mu muswelo muyampe, kadi bevwanijanga byobya bine bilembelwe’mo mu muswelo upēla. (Nki 4:5) Bavule nabo batalajibwanga mutyima nansha shi badi bazumbija mutyima na butangi bukwate bwa Bible.—Ñi 94:19.

Kuteja Kinenwa kya Leza kitange na diwi ditunduke kubwanya kwikala na lupusa luyampe pa bwetu būmi. (2Bi 34:19-21) Shi mudi na Bible mutangwe kipindi nansha mutuntulu mu lwenu ludimi, le ubulwe’po kuteja buno butangi ne kwibutūla ku mpangiko yobe ya ku mushipiditu?

TALAI VIDEO, BUTANGI BWA BIBLE BUKWATWE—KAKIPINDI, KUPWA LONDOLOLAI KINO KIPANGUJO:

Le i bika byakusangaja mu butangi bwa Bible bukwate?