“Polo Wafwija’ko Leza ne Kukankamana Wakankamana”

Kipwilo kya mu Loma pokyāivwene amba Polo udi mu dishinda, kyātumine banabetu ba kukamusambakana ku kintu kya makilometele 64. Le kuno kwipāna kwāikele na lupusa’ka padi Polo? “Polo pa kwibamona, wafwija’ko Leza ne kukankamana wakankamana.” (Bil 28:15) Nansha Polo byaādi uyukene bu muntu ukankamikanga bipwilo byaādi upempula, inoko mu kino kitatyi kyaādi mukutwa, nandi wākankamikilwe.—2Ko 13:10.

Dyalelo batadi ba bipindi bendanga mu kipwilo ne kipwilo bakankamika batutu ne bakaka. Pamo’nka na bantu ba Leza bonso, nabo kitatyi kimo bakōkanga, bazumbijanga mutyima, ne kuzoza. Pasa kwiya kwimupempula monka mutadi ne wandi mukaji mu kyenu kipwilo, le i bika byosa kulonga pa kwibakankamika mwanda wa ‘mwikankamike banwe bonso’?—Lo 1:11, 12.

• 

  Tanwa ku kupwila kwa kwenda mu busapudi. Mutadi wa kipindi ukankamikwanga shi basapudi balonga bukomo bwabo bonso bwa kutanwa ku mpangiko yonso ya mu yenga wa bupempudi. (1Ts 1:2, 3; 2:20) Langulukila pa muswelo okokeja kwingila bupania mukwashi mu kweji waemupempula. Ubulwe’po kulomba usapule nabo, aye ne wandi mukaji, nansha kunena’po umo akakutūle ku bowifundanga nabo Bible? Basenswe kusapula na basapudi beshileshile, kubadila’mo bapya nansha boba bemona bu badi na bwino butyetye.

• 

  Ikala na kizaji. Ubulwe’po kwibapa mwa kulāla nansha byakudya? Kulonga namino kukalengeja mutadi wa kipindi ne wandi mukaji bemone amba wibasenswe. Kebakimbengapo bintu bivulevule.—Luk 10:38-42.

• 

  Teja, londa bulombodi ne madingi andi. Mutadi wa kipindi witukwashanga na buswe tumone mwa kwilumbulwila mu mwingilo otwingidila Yehova. Kyaba kimo, ubwanya kwitupa madingi masumininwe. (1Ko 5:1-5) Shi tukōkela ne kukōkelelela bimusangajanga.—Bah 13:17.

• 

  Fwija’ko. Sapwila mutadi wa kipindi ne wandi mukaji muswelo omwenine mu bukomo bwabo bobalonga. Ubwanya kwibasapwila’byo mpala na mpala nansha kwibalembela’byo mu mukanda.—Kol 3:15.