Kwikankamika kwa Batwe Bonso
1. Le bupempudi bwitupempulanga batadi bendakana bwitupanga mikenga’ka ya pa bula?
1 Mutumibwa Polo wātumīne kipwilo kya mu Loma mukanda’mba: “Nsakanga kwimonapo nenu, nemupe kyakwimupa kya ku mushipiditu amba, mukankamane ne kukankamana. Nako i kwikankamika kwa bātwe bonso mu lwitabijo lwetu, lwenu mudi lwami, lwami mudi lwenu.” (Loma 1:11, 12) Bupempudi bwitupempulanga batadi bendakana dyalelo nabo i mukenga wa kwikankamika batwe bonso.
2. Mwanda waka bupempudi bwa mutadi wa kipindi bwitulombolwanga kumeso kwa kitatyi?
2 Kipwilo: Divule bupempudi bwa mutadi wa kipindi bulombolwanga kipwilo kubwipi kwa myeji isatu kumeso. Ne kino kitupanga mukenga wa kujadika mpangiko yetu mwa kumwena’mo ne pa mfulo. (Ef. 5:15, 16) Shi wingilanga kaji, ukokeja padi kulomba mafuku a konje mwa kukwatakenya mwingilo wa busapudi mu mwine yenga’wa. Bamo balombanga bu pania mukwashi mu kweji wa bupempudi. Shi usaka kwenda kwa kwenda, ubulwe’po kujadika mpangiko yobe biyampe mwa kutaninwa’ko mwine yenga’wa?
3. Lelo i bika bikalonga umo ne umo mu bupempudi mwanda wa kukankamikwa?
3 Kitungo kibajinji kya buno bupempudi bwa mutadi wa kipindi i kya kukankamika umo ne umo ne kwitufundija mwa kwingidila mwingilo wa busapudi. Lelo ubulwe’po kulomba kusapula nandi nansha na wandi mukaji shi i musonge? Mutadi wa kipindi usangelanga kusapula na basapudi palapala, kubadila’mo ne boba kebaikele na bwino buvule ne boba babudilwe manwa kampanda mu mwingilo. Batwe bonso tukokeja kuboila ñeni ku musapwilo wandi ne kulonda madingi aetupa na kanye. (1 Kod. 4:16, 17) Kumwendela bidibwa nako kukokeja kuleta mukenga mukwabo wa kwikankamika kwa bu bana na bana. (Bah. 13:2) Mashikulu andi byoalonda bisakibwa bya pa kipwilo, i biyampe kwiemvwana na katentekeji.
4. Le i muswelo’ka otukokeja kukankamika mutadi wetu wa kipindi?
4 Mutadi wa Kipindi: Mutumibwa Polo kādipo mwishile na banabetu baādi wingidila mwanda nandi wādi utanwa na bikoleja ne makambakano; o mwanda nandi wādi usangela kukankamikwa. (2 Kod. 11:26-28) Banabetu mu kipwilo kya Loma pa kuyuka’mba Polo mukutwa yao wiya, bamo bāendele kukamusambakana ku kikwe kya lupoto kya Apeusa—kyādi ku bula bwa makilometele 74! “Polo pa kwibamona wamufwijako Leza ne mu bidyoma mwakankamana.” (Bil. 28:15) Netu tukokeja kukankamika mutadi wetu wa kipindi muswelo umo onka. ‘Tumulemekei bikatampe’ na kukwatakanya bupempudi bwandi na kyanga. (1 Tem. 5:17, Myanda Miyampe ku Bonso) Tumufwijei’ko bya binebine mu binenwa ne mu bilongwa pangala pa bukomo bwaetulongela. Aye ne mukajandi bakasangala pa kumona lwitabijo, buswe, ne kūminina kwetu.—2 Tes. 1:3, 4.
5. I kika kinenenwa amba batwe bonso tusakilwanga kukankamikwa dyalelo?
5 Mu ino “myaka ya malwa,” lelo kudi’po muntu umbukata mwetu kasakilwapo kukankamikwa? (2 Tem. 3:1) Wiadije tamba’nka pano mwa kwingidila ne pa mfulo na mutadi wa kipindi mu yenga wa pa bula wa mingilo. Batwe bonso—batadi bendakana ne basapudi bene—tukokeja kwikankamika na nsangaji. Mu uno muswelo, netu ‘tukekankamika batwe bene ne kwitamija batwe bene.’—1 Tes. 5:11.