MWA KUPWILA MUSHIKWA

3 | Fundula Mushikwa Mu Ñeni Yobe

Bifundija Bible:

“Alamukai na kushinta ñeni yenu, amba mujingulule banwe bene kiswa-mutyima kya Leza kiyampe, kitabijibwe ne kibwaninine.”—BENE LOMA 12:2.

Mobishintulwila:

Bintu byotulanga bidi na kamweno kumeso a Leza. (Yelemia 17:10) Tufwaninwe kulonga bivule, kupita’ko’tu kunena nansha kulonga bintu na mushikwa. Mushikwa ushilulanga mu ñeni ne mu mutyima. O mwanda tufwaninwe kuleka kulangulukila pa bintu byonso bitulengeja twikale na mushikwa. Shi tulonge namino, tukabwanya ‘kwalamuka’ bya binebine ne kuleka mushikwa.

Byobwanya Kulonga:

Langulukila pa byolanga ne pa momwena bakwenu—nakampata bantu ba ku musaka nansha muzo ungi. Wiipangule amba: ‘Lelo nebamonanga namani? Le nebamonanga kukwatañana na monebayukile? Nansha nebamonanga mungya mboloji idi na bantu?’ Leka kutwela pa marezo a mīsambo, kutala mafilime, nansha kwipwija mukose na bintu bikankamika mushikwa ne bya lūma.

Kinenwa kya Leza kibwanya kwitukwasha tuleke kwikala na mushikwa mu mutyima ne mu ñeni yetu

Kebipēlangapo nyeke kubandaula biyampe milangwe yetu ne mwiivwanino wetu. Ino Kinenwa kya Leza kibwanya kwitukwasha tujingulule “milangwe ne mifwatakanyo ya mutyima.” (Bahebelu 4:12) O mwanda tanga nyeke Bible. Dingakanya bufundiji budi’mo na milangwe yobe, kadi longa bukomo bwa kukwatañanya milangwe yobe na bifundija Bible. Kinenwa kya Leza kibwanya kwitukwasha tufundule mushikwa ‘mukomejibwe’ mu ñeni ne mu mutyima wetu.—2 Bene Kodinda 10:4, 5.

Mwanda Mumweke—STEPHEN

Washintyile Mulangilo Wandi

Stephen ne bantu ba mu kyabo kisaka badi bebashikilwe kudi bazungu. O mwanda wasangedile kisumpi kya politike kya bantu badi balwila byepelo bya bantu. Kyaba kimo, nandi wadi ulonga bilongwa bya mushikwa. Stephen unena’mba: “Difuku dimo, ami ne balunda nami twaendele kukatala mafilime adi esambila pa masusu adi asusuka bapika bene Afrika mu États-Unis. Buno bukondame pa kwitusansa, twakwata bansongwalume bazungu twebakupila’nka mwine’mwa. Kupwa twaenda mu mikenza ya bazungu mwanda wa kukimba’mo bakwabo ba kukupila.”

Mumweno wa Stephen washintyile bininge kitatyi kyaashilwile kwifunda Bible na Batumoni ba Yehova. Uvuluka’mba: “Byonadi mutādilwe bininge na kwisañuna kwa nkoba, bintu byonamwene mu bukata mwa Batumoni byantulumwije. Kimfwa Kamoni umo muzungu waendele mu ntanda ya bweni, washiya bandi bana ku kisaka kimo kya Batumoni bafīta. Difuku dikwabo nadyo, kisaka kimo kya bazungu kyaselela ku yabo njibo nkasampe umo ufīta wadi usakilwa kwa kushikata.” Stephen wafudile ku kwitabija’mba Batumoni ba Yehova badi na buswe bwa bu bana na bana, bwine bwālaile Yesu amba bukekala mu bukata mwa bene Kidishitu ba bine.—Yoano 13:35.

Le i bika byakweshe Stephen aleke bilongwa bya mushikwa? Kisonekwa kya Bene Loma 12:2 kyo kyamukweshe. Unena’mba: “Kwifunda Bible kwaunkweshe ngivwanije amba mfwaninwe kushinta mulangilo wami. Pa kulonga bintu mu ndoe ne kujingulula’mba būmi bwami bubaikala biyampe, nadi nenwe kushinta mulangilo wami.” Pano Stephen udi na būmi bwampikwa mushikwa, mwine wawaikele nao mu bula bwa myaka 40 ne kupita.