Bemwenine Buswe Kupityila ku Bilongwa

YOMARA ne banababo babidi bana-balume—ba Marcelo ne Hiver—bashikatanga mu kibundi kityetye kya mu Guatemala. Yomara washilwile kwifunda Bible na Batumoni, ebiya mwenda mafuku banababo nabo bashilula kwifunda. Inoko kwadi makambakano. Abo bonso basatu i bampofu, kadi kebadipo babwanya kutanga bilembwa bya bampofu. O mwanda tutu wadi wibafundija Bible wadi wibatangila byonso byobadi befunda, pamo ne bisonekwa.

Kadi byadi bikomo kobadi kutanwa ku kupwila. Kebadipo babwanya kwenda abo bene lwendo lwa minite 40 pa kufika ku Njibo ya Bulopwe ya kubwipi na kwabo. Inoko banabetu batūdile’ko mpangiko ya kwanza kwibasela mwanda wa batanwe ku kupwila konso. Kadi pobashilwile kupityija bipindi bya bana ba masomo ku kupwila kwa mu bukata bwa yenga, banabetu bebakweshe bakwatyile ku mutwe bipindi byabo.

Mu Kweji 5, 2019, kupwila kwashilwile kulongelwa mu kyabo kibundi. Mu kine kitatyi’kya, ba mulume ne mukaji bamo bapania ba lonso, bavilukīle mu kyabo kibundi. Betungīle kitungo kya kufundija bano bana na bana basatu kutanga ne kulemba bilembwa bya bampofu, nansha abo bene byokebadipo bayukile mwa kwibitangila ne kwibilemba. Baendele ku kibīko kya mabuku, basokola’ko mabuku esambila pa bilembwa bya bampofu mwanda wa kwifunda muswelo wa kufundija’byo bakwabo.

Mu myeji mityetye, bano bana na bana basatu bashilwile kutanga bilembwa bya bampofu, ne kino kyebakweshe bendelele biyampe ku mushipiditu. Pesambwa pano, ba Yomara, Marcelo, ne Hiver bengilanga bu bapania ba lonso. Marcelo i mwingidi wa mingilo. Bengilanga bininge mingilo ya ku mushipiditu yenga ne yenga. Bupyasakane bwabo i bulengeje bantu bakwabo bekale na bupyasakane.

Bano bana na bana basatu bafwijanga’ko bininge pa muswelo obebakwatakanya na buswe kudi batutu ne bakaka mu kipwilo. Yomara unena’mba: “Tamba’tu twitana na Batumoni, betulombolanga buswe bwa bine bwa bwine Kidishitu.” Marcelo ubweja’ko amba: “Tudi na balunda bayampe mu kipwilo, kadi tudi mu kisaka kya ntanda yonso kilungīlwe pamo na buswe.” Yomara pamo ne banababo batengēle difuku dyobakamona ntanda myalamunwe ke paladisa.—Ñim. 37:10, 11; Isa. 35:5.