Nanga Nyeke na Lwitabijo

1. Mwanda waka mutumibwa Polo wāikele na nsangaji pa muswelo weēndeje mu būmi?

KITATYI kimo, mutumibwa Polo wāyukile amba usa kwipaibwa, inoko wāikele na nsangaji pa kumona muswelo weēndeje mu būmi. Wānenene amba: “Napu kunyema lubilo, nalama lwitabijo.” (2 Tm. 4:​6-8) Polo wākwete butyibi bwa tunangu mu mwingilo wandi wa bwine Kidishitu, kadi wādi ukulupile amba Yehova umusangedile. Netu tusakanga kukwata butyibi buyampe ne kwitabijibwa na Leza. Le i muswelo’ka otubwanya kulonga namino?

2. Le kunanga na lwitabijo kushintulula bika?

² Polo wānenene pādi ne pa bene Kidishitu bakwabo ba kikōkeji amba: “Tunañanga na lwitabijo, ke na kumonapo na meso, aa.” (2 Ko. 5:7) Le i bika byādi bisaka kunena Polo? Mu Bible, kishima ‘kunanga’ kifunkilanga kitatyi kimo pa muswelo utonga muntu kwiendeja mu būmi. Shi muntu unanga enka’tu na kumona na meso, ukwatanga butyibi bwimanine enka pa byamona, byaivwana, ne mwawiivwanina mu ngitu. Inoko shi muntu unanga na lwitabijo ukwatanga butyibi bwimanine pa kikulupiji kyandi mudi Yehova Leza. Bilongwa byandi bilombolanga’mba ukulupile amba Leza ukamupala mpalo, ne amba ukamwena mu kulonda madingi a Yehova atanwa mu Kinenwa kyandi.—Ñim. 119:66; Bah. 11:6.

3. Le i byabuyabuya’ka bidi mu kunanga na lwitabijo? (2 Bene Kodinda 4:18)

³ Shako batwe bonso kitatyi kimo tukwatanga butyibi mungya byotumona, byotwivwana, ne motwiivwanina mu ngitu. Inoko tubwanya kutanwa na makambakano shi tubandaula enka bintu byotumona nansha byotwivwana, kitatyi kyotukwata butyibi bukatampe. Mwanda waka? Mwanda byobya byotumona ne byotwivwana bibwanya kwitongola. Kadi nansha shi kebitongwelepo, shi tunanga enka na kumona na meso kete tubwanya kufula ku kusūla kiswa-mutyima kya Leza nansha madingi andi. (Mus. 11:9; Mat. 24:​37-39) Inoko shi tunanga na lwitabijo tukakwata butyibi ‘bwitabijibwa na Mfumwetu.’ (Ef. 5:10) Kulonda madingi a Leza kuketupa ndoe ya mutyima ne nsangaji ya bine. (Ñim. 16:​8, 9; Isa. 48:​17, 18) Kadi shi twendelele kunanga na lwitabijo, tukamona būmi bwa nyeke mu mafuku a kumeso.—Tanga 2 Bene Kodinda 4:18.

4. Le i bika bibwanya kukwasha muntu ayuke shi unañanga na lwitabijo nansha na kumona na meso?

⁴ Le tukayuka namani shi tunañanga na lwitabijo nansha na kumona na meso? Tala bino bipangujo bibwanya kwitukwasha: Le i bika bituludikanga potukwata butyibi? Le tuludikwanga enka na bintu byotumona? Nansha le tuludikwanga na kikulupiji kyetu mudi Yehova ne mu madingi andi? Tubandaulei’ko muswelo otubwanya kwendelela kunanga na lwitabijo mu ino myanda isatu mikatampe: kitatyi kyotutonga kaji, kitatyi kyotutonga muntu wa kwisonga nandi, ne kitatyi kyotutambula bulombodi butamba ku bulongolodi. Mu mwanda ne mwanda, tusa kumona’mo bintu byotufwaninwe kubandaula pa kukwata butyibi buyampe.

KITATYI KYOTONGA KAJI

5. Le i bika byotufwaninwe kubandaula kitatyi kyotutonga kaji?

⁵ Batwe bonso tusakanga kuvuija bisakibwa byetu ne bya kyetu kisaka. (Mus. 7:12; 1 Tm. 5:8) Twaji tumo i twa mfutwa miyampe. Tuno twaji tubwanya kulengeja mwingidi avuije bisakibwa bya difuku ne difuku ne kulea’ko kamukōlo ka kumukwasha mafuku a kumeso. Twaji tukwabo i twa mfutwa mityetye mine ilengeja mwingidi avuije enka bisakibwa bya kyalwilo bya kyandi kisaka. Shi ketutonge kaji, tubandaulanga lupeto lobaketufuta. Inoko shi muntu ubandaula enka mfutwa kete, nabya unañanga na kumona na meso.

6. Le i muswelo’ka otubwanya kunanga na lwitabijo kitatyi kyotutonga kaji? (Bahebelu 13:5)

⁶ Shi tunañanga na lwitabijo, tukabandaula ne lupusa lukekala na kaji pa kipwano kyetu na Yehova. Tufwaninwe kwiipangula’mba: ‘Le kano kaji kakanengeja nonge bintu bishikilwe Yehova?’ (Nki. 6:​16-19) ‘Le kakedya mponye na butōtyi bwami padi ne kunengeja ndeke kwikala pamo na kyami kisaka mu bula bwa kitatyi kilampe?’ (Fid. 1:10) Shi ubalondolola’mba, en-en, ku bino bipangujo, nabya i kya tunangu kupela kano kaji nansha shi kusokola kaji i kukomo. Byotunañanga na lwitabijo, tukwatanga butyibi bulombola’mba Yehova ukavuija bisakibwa byetu.—Mat. 6:33; tanga Bahebelu 13:5.

7-8. Le tutu Javier wa mu Amerika wa Kunshi wanangile namani na lwitabijo? (Tala ne kifwatulo.)

⁷ Tutu Javiera wa mu Amerika wa Kunshi, wayukile kamweno kadi mu kunanga na lwitabijo. Unena’mba: “Nadingile mukanda wa kukimba kaji kadi ka kumfuta misunsa ibidi lupeto lonadi ntambula ne kundetela nsangaji mivule.” Inoko, Javier wadi usaka bininge kwingila bu pania. Wendeleja’mba: “Bangityile kungipangula bwipangudi kudi mwimaniji mukatampe. Kumeso kwa buno bwipangudi, nalombele Yehova ankwashe na kikulupiji kya amba uyukile byobya biyampe kondi. Nadi nkimba kwendelela biyampe ku kaji ne kufutwa lupeto luvule, inoko nkyadipo wa kwitabija kano kaji shi kanengeja komenwe kufikila pa bitungo byami bya ku mushipiditu.”

⁸ Javier usekununa’mba: “Mu buno bwipangudi, mukulu wa kaji wanombola’mba nsa kwanza kwingila mansá a ntentekelo kitatyi ne kitatyi. Namushintulwila na bulēme amba nkikabwanyapo kwingila mansá a ntentekelo pa mwanda wa butōtyi bwami.” Bine, Javier wapelele kano kaji. Mayenga abidi pa kupita’po washilula kwingila bupania. Kadi mwaka umo pa kupita’po wasokola kaji ka kitatyi kityetye. Unena’mba: “Yehova waivwene milombelo yami ne kumpa kaji kankwasha ñingile bupania. Ngidi na nsangaji pa kwikala na kaji kankwasha mpityije kitatyi kivule mu kwingidila Yehova ne banabetu.”

9. Le i bika byowefunda ku kimfwa kya Trésor?

⁹ Le i bika byotufwaninwe kulonga shi tubajingulula’mba kaji kotwingila pano keketulengejangapo tunange na lwitabijo? Tubandaulei’ko kimfwa kya Trésor wa mu Congo. Usekununa’mba: “Kaji konasokwele ye konadi nkimba bininge. Nadi ntambula mfutwa mitabuke misunsa isatu pa yoya yonadi ntambula ku kaji konadi ñingila mafuku kunyuma, kadi nadi mulēmekibwe’ko bininge.” Inoko Trésor wadi ubulwa kupwila kitatyi ne kitatyi pa mwanda wa kwingila mansá a ntentekelo. Kadi wadi uningilwa kulonga bintu bya budimbidimbi. Trésor wasakile kuleka kano kaji, inoko wadi ulangalanga pa mwasa kwikadila mulofwa. Le i bika byamukweshe? Unena’mba: “Habakuka 3:​17-19 wankweshe ngivwanije amba nansha shi najimija kano kaji, Yehova ukavuija bisakibwa byami. Ebiya naleka kano kaji.” Ushintulula’mba: “Bengidi bavule balañanga’mba pa mwanda wa kaji ka mfutwa miyampe, muntu uketabija kujimija bintu byonso, enka ne būmi bwa kyandi kisaka ne butōtyi bwandi. Ngidi na nsangaji mwanda ne mulame kipwano kyami na Yehova ne na kyami kisaka. Mwaka pa kupita’po, Yehova wankweshe nsokole kaji kankwasha mvuije bisakibwa byami ne kwikala na kitatyi kivule kya kwingila mingilo ya ku mushipiditu. Shi tubatūla Yehova pa kifuko kibajinji, tubwanya padi kwikonda na makambakano a misokwe mu kitatyi kampanda, inoko Yehova uketukwatakanya.” Bine, shi tukulupile madingi a Yehova ne milao yandi, tukendelela kunanga na lwitabijo kadi nandi uketwesela.

KITATYI KYOTONGA WA KWISONGA NANDI

10. Le i bika bibwanya kwitulengeja tunange na kumona na meso kitatyi kyotutonga muntu wa kwisonga nandi?

¹⁰ Busongi i kyabuntu kitamba kudi Yehova, kadi i byendele’mo kusaka kusonga nansha kusongwa. Kaka pabandaula muntu wa kumusonga, ubwanya kubandaula bumuntu bwandi, buyampe bwandi bwa mpala, muswelo wayukene, misokwe yandi, biselwa byandi bya mu kisaka, ne muswelo wamusangaja.b Shako bino bintu byonso i bya mvubu. Inoko shi emanine enka pa bino bintu, ukananga na kumona na meso.

11. Le i muswelo’ka otubwanya kunanga na lwitabijo kitatyi kyotutonga muntu wa kwisonga nandi? (1 Bene Kodinda 7:39)

¹¹ Yehova usangelanga bininge batutu ne bakaka balonda madingi andi kitatyi kyobatonga muntu wa kwisonga nandi! Kimfwa, balondanga kidyumu kya kwilaija enka ne byobapita pa kitatyi kya “kusongola” kumeso kwa kushilula kwinangila. (1 Ko. 7:36) Babandaulanga muntu obakimba kwisonga nandi na kwimanina nakampata pa ngikadila ikalengeja muntu ekale mulume nansha mukaji muyampe. (Nki. 31:​10-13, 26-28; Ef. 5:33; 1 Tm. 5:8) Shi muntu ke Kamonipo kalonga tubintu tulombola bukena, Batumoni abo bakōkelanga madingi a kwisonga “enka mudi Mfumwetu kete,” atanwa mu 1 Bene Kodinda 7:39. (Tanga.) Bendelelanga kunanga na lwitabijo na kukulupila’mba Yehova ukavuija bisakibwa byabo bya mu malango kupita muntu ye-yense.—Ñim. 55:22.

12. Le i bika byowefunda ku kimfwa kya Rosa?

¹² Tubandaulei’ko kimfwa kya Rosa, pania wa mu Kolombi. Kaji kandi kadi kamulengeja etane kitatyi ne kitatyi na mwana-mulume umo ke Kamonipo mwine washilwile kumusanswa. Rosa wakokelwe nandi. Unena’mba: “Wadi umweka bu mwana-mulume muyampe bininge. Wadi ukwasha bantu ba mu kyandi kifuko ne kumweka bu muntu muyampe. Nadi nsangela muswelo waadi wikele nami. Wadi na bintu byonso byonadi nkimba ku muntu wa kwikala wami mulume, inoko kintu’tu kimo kadipo Kamoni.” Ubweja’ko amba: “Byadi bikomo kumupela mwanda mu mutyima nadi musenswe. Mu kine kitatyi’kya, nadi nemona bu ngidi bunka, kadi nadi nsaka kusongwa. Inoko nadi nkyasokwele tutu Kamoni wa kunsonga.” Nansha nankyo, Rosa katelepo mutyima enka pa byaadi umona. Walangulukile pa mukekadila kipwano kyandi na Yehova shi wakwata buno butyibi. Pa kino, waketele kipwano kyo-kyonso na uno mwana-mulume ne kuvudilwa bya kulonga mu mwingilo wa Yehova. Kitatyi pa kupita’po, bamwita kukafunda Masomo a Basapudi ba Bulopwe, kadi pano wingilanga bu pania wa pa bula. Rosa unena’mba: “Yehova i mungesele madyese mavule andetela nsangaji mikatampe.” Nansha byokebipēlapo kunanga na lwitabijo mu myanda itusangaja ku mutyima, tumwenanga bininge mu kulonda buludiki bwa Yehova.

KITATYI KYOTUTAMBULA BULOMBODI BUTAMBA KU BULONGOLODI

13. Le i bika bibwanya kwitulengeja tunange na kumona na meso kitatyi kyotutambula bulombodi butamba ku bulongolodi?

¹³ Divule tutambulanga bulombodi butamba ku bulongolodi kupityila ku bakulumpe pa kipwilo, mutadi wa kipindi, bilo ya musambo, nansha Kitango Kyendeji, bwine bwituludika mu butōtyi bwetu. Ino le bikekala namani shi kitatyi kimo ketwivwanijepo bubinga bwaletelwa bulombodi kampanda? Tubwanya kumona enka bintu bibi bibwanya kwitufikila pa mwanda wa buno bulombodi. Kadi tubwanya enka ne kushilula kuta mutyima pa kubulwa kubwaninina kwa batutu betupa bulombodi.

14. Le i bika biketukwasha tunange na lwitabijo kitatyi kyotutambula bulombodi butamba ku bulongolodi? (Bahebelu 13:17)

¹⁴ Shi tunanga na lwitabijo, tukulupilanga’mba Yehova ye wendejanga bulongolodi bwandi ne amba uyukile ngikadilo yotudi’mo. Kino kitulengejanga tukōkele bukidibukidi ne na mumweno muyampe. (Tanga Bahebelu 13:17.) Tuyukile amba kikōkeji kyetu kituntwilanga ku bumo bwa kipwilo. (Ef. 4:​2, 3) Tukulupile amba nansha shi batutu betutangidile i ba kubulwa kubwaninina, Yehova uketwesela pangala pa kikōkeji kyetu. (1 Sa. 15:22) Pa kitatyi kitungwe, Yehova ukalemununa kintu kyo-kyonso kifwaninwe kulemununwa.—Mika 7:7.

15-16. Le i bika byakweshe tutu umo anange na lwitabijo nansha byaadi utatana bulombodi bobatambwile? (Tala ne kifwatulo.)

¹⁵ Tubandaulei’ko kimfwa kimo kilombola kamweno kadi mu kunanga na lwitabijo. Nansha Kieshipanyole byokisambwanga bininge mu Peru, bantu bavule besambanga ndimi mivule ya kwine’kwa. Ludimi lumo bidi i Kiquechua. Mu bula bwa myaka, batutu ne bakaka besamba Kiquechua badi bakimba bantu besamba luno ludimi mu wabo mwaba. Inoko, pa mwanda wa kulonda bijila bya ba lupusa, manwa a mwa kukimbila bano bantu ajadikilwe. (Loma 13:1) Kino kyalengeje banabetu bamo beipangule shi ano manwa akendeka mu wabo mwaba. Banabetu byobalondele buno bujadiki, Yehova webesele pangala pa bukomo bobalongele bwa kukimba bantu bavule besamba Kiquechua.

¹⁶ Kevin, mukulumpe wa mu kipwilo kya Kiquechua wadi ubadilwa mu bano banabetu badi na malangalanga. Ushintulula’mba: “Neipangwile amba, ‘Le pano tukasokola namani bantu besamba Kiquechua?’” Le Kevin walongele’po namani? Unena’mba: “Navulukile mu ñeni Nkindi 3:5. Kadi nalangulukile pa kimfwa kya Mosesa. Yehova wāpele Mosesa bulombodi bwādi bumweka bu bwampikwa kwendela’mo. Wāmusapwidile alupule bene Isalela mu Edipito ne kwenda nabo dya ku Dijiba Dityila, kwine kwādi kumweka’mba kebakabwanyapo kwipandija ku bene Edipito bādi bebapanga. Inoko Mosesa wākōkele, kadi Yehova wāmwesele pangala pa kikōkeji kyandi mu muswelo wa kutendelwa.” (Div. 14:​1, 2, 9-11, 21, 22) Kevin waitabije na mutyima tō kushinta muswelo wandi wa kusapula. Byaikala namani? Unena’mba: “Natulumukile pa muswelo wetwesele Yehova. Dibajinji, twadi tujokoloka bininge mu busapudi, kyaba kimo tutana muntu umo nansha babidi besamba Kiquechua. Pano twendanga kokwa kudi bantu bavule besamba Kiquechua. Kino i kilengeje tushilule mīsambo na bantu bavule, twikale na kujokela’mo, ne bifundwa bya Bible. Kadi kibalwa kya bantu batanwa ku kupwila i kivudile’ko.” Bine, Yehova witweselanga nyeke shi tunanga na lwitabijo.

17. Le i bika byowefunda mu kino kishinte?

¹⁷ Tubabandaula muswelo otubwanya kwendelela kunanga na lwitabijo mu myanda isatu mikatampe. Inoko tufwaninwe kwendelela kunanga na lwitabijo mu myanda yonso ya mu būmi bwetu, kimfwa kitatyi kyotutonga bya kwipwija nabyo mukose nansha kwisangaja, ne kitatyi kyotutonga masomo a kufunda nansha mwa kulelela bana. Kitatyi kyonso kyotukwata butyibi, ketufwaninwepo kuludikwa enka na bintu byotumona na meso, ino tuludikwei ne na kipwano kyetu na Yehova, madingi andi, ne na mulao wandi wa kwitukwatakanya. Shi tulonge namino, “tukananga mu dijina dya Yehova Leza wetu nyeke ne nyekeke.”—Mika 4:5.