Mwādi Mumwena Yesu Dijina dya Yehova

1-2. (a) Le i bika byālongele Yesu bufuku bukya epaibwe? (b) Le i bipangujo’ka byotusa kubandaula mu kino kishinte?

MWĀDI mu Dya Buná kyolwa, mafuku 14 Kweji wa Nisane, mu mwaka wa 33 Yesu ke mwiye, kadi Yesu wādi kasa kwabwa, kusambijibwa, kutyibilwa mambo, kususulwa, ne kwipaibwa. Wādi ukipwa’tu kudya bidibwa bya pa bula mu kyumba kya pangala na batumibwa bandi ba kikōkeji. Abo pa kupwa kudya, Yesu wēsamba na batumibwa bandi binenwa bya mfulo bikankamika. Kadi kumeso’tu kwa batambe mu kyumba kya pangala, Yesu wēbemika ne kulombela nabo milombelo ya mvubu mpata. Ino milombelo yālembelwe na mutumibwa Yoano; kadi itanwa mu Yoano shapita 17.

² Le milombelo ya Yesu ilombola’mba wādi utele mutyima ku bika mu kine kitatyi’kya? Mungya ino milombelo, le i kintu’ka kyādi kimwene Yesu na mvubu mpata mu mwingilo wandi onso wa pano pa ntanda? Lekai tutane malondololo ku bino bipangujo.

“NAYUKANYA DIJINA DYOBE KOBADI”

3. Le i bika byānenene Yesu pa dijina dya Yehova, ne i bika byaādi ukimba kunena? (Yoano 17:​6, 26)

³ Yesu wānenene mu milombelo yandi amba: “Nayukanya dijina dyobe kobadi.” Kadi wānenene misunsa ibidi amba wāyukenye dijina dya Yehova ku bandi bana ba bwanga. (Tanga Yoano 17:​6, 26.) Le i bika byaādi ukimba kunena? Le wādi wibalombola dijina dyokēbadipo bayukile? Bana ba bwanga ba Yesu bādi Bayuda, nanshi bādi bayukile kala’mba dijina dya Leza i Yehova. Dino dijina dyādi ditanwa misunsa tununu ne tununu mu Bisonekwa bya Kihebelu. Nanshi Yesu kādipo wisambila pa dijina dya Leza dya bunka; ino wādi wisambila pa mwine mwikadile Yehova Leza. Yesu wāyukenye muntu mwine wa dijina dya bu Yehova. Wāyukenye mpango yandi, mingilo yandi, ne ngikadila yandi, mu muswelo kewamuyukenye muntu nansha umo.

4-5. (a) Leta kimfwa kilombola muswelo otubwanya kuyuka muntu senene. (b) Le bana ba bwanga ba Yesu bāyukile namani buluji bwa dijina dya Yehova?

⁴ Fwatakanya’po mu kyenu kipwilo mudi mukulumpe umo witwa bu David kadi i dokitele. Uyukile uno tutu pano ke padi myaka mivule. Ebiya difuku dimo ubasakilwa bundapi bwa bukidibukidi. Bukidi bonka ubaenda ku lupitalo kwingila uno tutu, nandi waingidija manwa andi a kundapa mwanda wa kupandija būmi bobe. Le ukamona uno tutu oyukile monka mowadi umumwenanga? Aa! Kakidipo’tu David mukulumpe owadi uyukile; ino ke dokitele wapandije bobe būmi.

⁵ Ne bana ba bwanga ba Yesu nabo bādi bayukile kala dijina dya Yehova. Ino mwingilo wa Yesu wālengeje dino dijina dikale na buluji bukatampe ku bana ba bwanga. Mwanda waka tubanena namino? Mwanda Yesu wāmwekeje bumuntu bwa Shandi mu byonso byaādi unena ne byaādi ulonga. Nanshi batumibwa bandi ‘bāyukile’ Yehova biyampe na kuteja muswelo wādi ufundija Yesu ne na kubandila muswelo waādi wikele na bantu bakwabo.—Yoa. 14:9; 17:3.

“DIJINA DYOBE DYOWAMPELE”

6. Le Yehova i mupe Yesu dijina dyandi mu buluji’ka? (Yoano 17:​11, 12)

⁶ Yesu wālombēle pangala pa bandi bana ba bwanga’mba: “Wibalame pa mwanda wa dyobe dijina dyowampele.” (Tanga Yoano 17:​11, 12.) Le ko kunena’mba Yesu wādi unenwe kwitwa bu Yehova? Aa. Musa kumona’mba mu milombelo yandi, Yesu wānenene pangala pa dijina dya Yehova amba “dyobe dijina.” Nanshi dijina dya Yehova kedyāikelepo bu ye ke dijina dya Yesu. Le penepo i bika byādi bikimba kunena Yesu paānenene amba dijina dya Leza i dimupebwe? Dibajinji, Yesu wādi muntu wimanina Yehova ne Musedi wandi wa myanda. Wāile mu dijina dya Shandi ne kulonga bingelengele bya bukomo’nka mu dino dijina. (Yoa. 5:43; 10:25) Kadi dijina dya Yesu dishintulula’mba “Yehova I Lupandilo.” Bine, mu nshintulwilo ya dijina dya Yesu mudi ne dijina dya Leza.

7. Leta kimfwa kilombola muswelo wādi wisambila Yesu mu dijina dya Yehova.

⁷ Kimfwa, muntu wimanina yabo ntanda mu ntanda-bene byadi i mukendi wa mulopwe, ubwanya kwisambila mu dijina dya mulopwe. O mwanda binenwa bya muntu wimanina yabo ntanda mu ntanda-bene bibwanya kwikala na lupusa lumo na binenwa bya mulopwe. Mo monka ne Yesu, wādi muntu wimanina Yehova ne kwisamba na bantu mu dijina dya Yehova.—Mat. 21:9; Luka 13:35.

8. Mwanda waka Yehova wānenene amba dijina dyandi didi ‘mudi’ Yesu enka ne kumeso kwa Yesu kwiya pano pa ntanda? (Divilu 23:​20, 21)

⁸ Mu mwingilo wandi wa bu Kinenwa, Yesu wāingile bu Musedi wa Myanda wa Yehova na kusambulula myanda ne bulombodi ku bana bakwabo ba ku mushipiditu ba Leza ne ku bantu. (Yoa. 1:​1-3) Padi Yesu ye mwikeulu obātumine kudi Yehova mwanda wa kukwatakanya bene Isalela mu kitatyi kya Divilu. Paālombwele bene Isalela bakōkele mwikeulu, Yehova wānenene amba: “Ke-pantu dijina dyami didi mwadi.”a (Tanga Divilu 23:​20, 21.) Dijina dya Yehova dyādi ‘mudi’ Yesu mu buluji bwa amba wādi wimanina Yehova kadi ye muntu mubajinji kukwatakanya ne kupandula dijina dya Shandi.

“TATA, TUMBIJA DIJINA DYOBE”

9. Le Yesu wādi umwene dijina dya Yehova namani? Shintulula.

⁹ Monka motwesambilanga’kyo, Yesu wādi umwene dijina dya Yehova na mvubu mpata enka ne kumeso kwa kwiya’ye pano pa ntanda. Kadi paādi pano pa ntanda, wālombwele amba dijina dya Yehova i dya mvubu kupityila ku byaādi ulonga! Dya ku mfulo kwa mwingilo wandi, Yesu wālombele amba: “Tata, tumbija dijina dyobe.” Bukidi bonka, Shandi wālondolola na diwi dikatampe momwa mūlu amba: “Neditumbija kadi nkeditumbijanga dikwabo.”—Yoa. 12:28.

10-11. (a) Le Yesu wātumbije dijina dya Yehova namani? (Tala ne kifwatulo.) (b) Mwanda waka dijina dya Yehova difwaninwe kupandulwa ne kubingijibwa?

¹⁰ Yesu nandi wātumbije dijina dya Shandi. Muswelo’ka? Muswelo umo bidi i na kusapwila bantu ngikadila ya Shandi ya kutendelwa ne bilongwa byandi. Shako, kutumbija dino dijina kwādi kulomba bivule. Dijina dya Yehova dyādi difwaninwe kupandulwa ne ntumbo yandi nayo yādi ifwaninwe kubingijibwa.b Yesu wālombwele kino mokikadile na mvubu kitatyi kyaāfundije balondi bandi milombelo ya kulondela’po. Wānenene amba: “Tata wetu udi mūlu, dijina dyobe dipandulwe.”—Mat. 6:9.

¹¹ Mwanda waka dijina dya Yehova difwaninwe kupandulwa ne kubingijibwa? Mwanda Satana Dyabola wāfutulwile ne kuvubakenya Yehova Leza myanda mu budimi bwa Edena. Satana wānenene amba Yehova i mbepai ne amba ufile ba Adama ne Eva kintu kiyampe. (Ngo. 3:​1-5) Kadi Satana wāmwekeje amba muswelo ulonga Yehova bintu ke muyampepo. Buno bubela bwa Satana i kafutululo ka patōkelela kawāfutulwile Yehova ne dijina dyandi. Mwenda myaka mu mafuku a Yoba, Satana wānenene amba boba bengidila Yehova bamwingidilanga mwanda Yehova wibakwashanga. Kadi uno vubavuba wānenene amba i kutupu muntu nansha umo usenswe Yehova bya binebine ukendelela kumwingidila shi watanwa na makambakano. (Yoba 1:​9-11; 2:4) Bine, byādi bilomba kitatyi pa kuyuka shi Yehova ye mbepai, nansha’ko Satana ye mbepai.

“MPĀNANGA BŪMI BWAMI”

12. Le Yesu wādi witabije kulonga bika pa mwanda wa buswe bwaādi usenswe Yehova?

¹² Yesu wādi usaka kulonga byonso byaādi ubwanya pa kutumbija ne kubingija dijina dya Yehova mwanda wādi umusenswe. Yesu wānenene amba, “Mpānanga būmi bwami.” (Yoa. 10:​17, 18) Bine, wādi witabije’nka ne kufwa pa mwanda wa dijina dya Yehova.c Ba Adama ne Eva bantu babajinji kadi babwaninine, bātambile ku mutamba wa Yehova ne kwikupa kudi Satana. Ino Yesu aye i mwishile nabo, mwanda wādi witabije kwiya pano pa ntanda mwanda wa kulombola buswe bwasenswe Yehova. Yesu wālongele kino na kukōkela Yehova mu byonso byaādi unena na byaādi ulonga. (Bah. 4:15; 5:​7-10) Wālamine bululame mu būmi bwandi enka ne byaāipailwe ku mutyi wa masusu. Mu uno muswelo, wālombwele amba usenswe Yehova ne dijina dyandi.—Bah. 12:2.

13. Mwanda waka Yesu ye mwine wādi ufwaninwe kubingija’mba Satana i mbepai? (Tala ne kifwatulo.)

¹³ Kupityila ku muswelo wādi wiendeja Yesu mu būmi, wābingije amba Satana ye mbepai, ke Yehovapo! (Yoa. 8:44) Yesu wādi uyukile Yehova biyampe kutabuka muntu yense. Shi mu bintu byānenene Satana padi Yehova mwādi ne bubine, Yesu wādi wa kwibuyuka. Ino Yesu aye wādi usumininwe kubingija Yehova ne dijina dyandi. Nansha byobyāmwekele amba Yehova wamwela, Yesu wāitabije na mutyima umo kufwa pa kyaba kya kuvundamina Yehova.—Mat. 27:46.d

NAVUYA “MINGILO YOWAUMPELE”

14. Le Yehova wāpadile namani Yesu mpalo pa mwanda wa kikōkeji kyandi?

¹⁴ Yesu wānenene mu milombelo yaālombele bufuku bukya epaibwe amba: “[Navuya] mingilo yowaumpele kwingila.” Wādi uyukile amba Yehova ukamwesela pa mwanda wa kikōkeji kyandi. (Yoa. 17:​4, 5) Yesu wādi na bubinga bwa kukulupidila mudi Shandi. Yehova kāmulekelepo ashale mu kibundu. (Bil. 2:​23, 24) Ino wāsangwile Yesu ne kumupa kifuko kya bulēme momwa mūlu. (Fid. 2:​8, 9) Mwenda mafuku, Yesu wāshilwile kuludika bu Mulopwe wa Bulopwe bwa Leza. Le buno Bulopwe bwādi bwa kulonga bika? Yesu ulondolola mu milombelo ya kulondela’po amba: “Bulopwe bobe bwiye. Kiswa-mutyima kyobe [Yehova] kilongeke, pamo na momwa mūlu, ne pano pa ntanda pene.”—Mat. 6:10.

15. Le i bika bikwabo bikalonga Yesu?

¹⁵ Kumeso’ku, Yesu ukalwa na balwana na Leza ne kwipaya bantu babi pa Amakedona. (Kus. 16:​14, 16; 19:​11-16) Ebiya kitatyi kityetye pa kupita’po, ukela Satana mu “lupongo,” mwine mwakakabwanyapo kulonga kintu nansha kimo. (Kus. 20:​1-3) Yesu ukajokejeja bantu ndoe ne kwibafikija ku bubwaninine mu bula bwa wandi Umbikalo wa Myaka Kanunu. Ukasangula bantu bafwe ne kwalamuna ino ntanda ke paladisa. Bine, mpango ya Yehova ikafikidila!—Kus. 21:​1-4.

16. Le i bika bikalongeka dya ku mfulo kwa Umbikalo wa Myaka Kanunu?

¹⁶ Le i bika bikalongeka dya ku mfulo kwa Umbikalo wa Myaka Kanunu? Bubi bwa bantu ne kubulwa kubwaninina kwabo kebikekala’kopo monka. Bantu kebakasakilwapo monka kulekelwa bubi bwabo kupityila ku kinkūlwa; kadi kebakasakilwapo nsenga nansha ke butobo bwine. Ne kadi “lufu, walwana wa mfulo, [utamba kudi Adama] ukajimankanibwa fututu.” Bibundu bikashala pululu. Bantu bafwe bakasangulwa. Kadi muntu yense pa ntanda ukekala mubwaninine.—1 Ko. 15:​25, 26.

17-18. (a) Le i bika bikalongeka ku mfulo kwa Umbikalo wa Myaka Kanunu? (b) Le Yesu ukalonga bika pakafula kitatyi kyandi kya kuludika? (1 Bene Kodinda 15:​24, 28) (Tala ne kifwatulo.)

¹⁷ Le i bika bikwabo bikalongeka ku mfulo kwa Umbikalo wa Myaka Kanunu? Mu kine kitatyi’kya, kintu kikwabo kya pa bula bininge kikalongeka. Mwanda utala kupandula dijina dya Yehova ukapwa. Muswelo’ka? Mu budimi bwa Edena, Satana wānenene amba Yehova i mbepai kadi kaludikangapo bantu na buswe. Tamba penepa, dijina dya Yehova dipandulwanga kitatyi ne kitatyi na boba bamulēmekele ne kumukōkela. Nanshi ku mfulo kwa Umbikalo wa Myaka Kanunu, dijina dya Yehova dikabingijibwa lonso. Ukelombola ku bonso amba i Tata wetu wa buswe wa mūlu.

¹⁸ Ku mfulo kwa Umbikalo wa Myaka Kanunu, muntu yense ukayuka’mba byonso byānenene Satana padi Yehova i bya bubela. Le i bika bikalonga Yesu pakafula kitatyi kyandi kya kuludika? Le ukalonda kimfwa kya Satana na kutombokela Yehova? Aa! (Tanga 1 Bene Kodinda 15:​24, 28.) Yesu ukajokeja Bulopwe kudi Shandi. Ukakōkela ku buludiki bwa Yehova. Bine, Yesu i mwishile na Satana, mwanda Yesu aye i mwitabije kujokejeja Yehova bintu byonso mwanda umusenswe.

19. Le Yesu wādi umwene namani dijina dya Yehova?

¹⁹ Na bubine, Yehova wāitabije kupa Yesu dijina dyandi! Yesu wēlombwele mu muswelo mubwaninine bu i mufwaninwe kwimanina Shandi. Le penepo Yesu wādi umwene namani dijina dya Yehova? Dino dijina dyādi na mvubu mpata kwadi kupita bintu bikwabo byonso. Wādi witabije kufwa pa mwanda wa dino dijina, kadi uketabija kujokejeja Yehova bintu byonso ku mfulo kwa Umbikalo wa Myaka Kanunu. Le i muswelo’ka otubwanya kwiula Yesu? Tukatana malondololo ku kino kipangujo mu kishinte kilonda’ko.