Motufwaninwe Kumwena Dijina dya Yehova

1-2. Le tubayuka namani amba Yesu wādi umwene na mvubu dijina dya Yehova?

DIJINA dya Yehova i dya mvubu mpata kudi Yesu. Yesu ye muntu mubajinji kukwatakanya dijina dya Shandi. Monka mwalombwedile’kyo kishinte kibadikile, Yesu wādi witabije kufwa pa mwanda wa dijina dya Yehova, mwanda wa kulombola’mba Yehova i ujila kadi byonso byalonga i byoloke. (Mako 14:36; Bah. 10:​7-9) Kadi ku mfulo kwa Umbikalo wa Myaka Kanunu, Yesu uketabija kwalwija Yehova lupusa lonso mwanda usakanga ntumbo imwendele Yehova. (1 Ko. 15:​26-28) Buswe busenswe Yesu dijina dya Leza, bulombola kipwano kyapwene na Shandi. Na bubine kino kilombola’mba Yesu usenswe mwinē dino dijina.

² Yesu wāile pa ntanda mu dijina dya Shandi. (Yoa. 5:43; 12:13) Wāyukenye dijina dya Shandi ku balondi bandi. (Yoa. 17:​6, 26) Wādi ufundija mu dijina dya Yehova ne kulonga bingelengele mu dino dijina. (Yoa. 10:25) Kadi Yesu wālombele Yehova alame bana ba bwanga ‘pa mwanda wa dijina Dyandi.’ (Yoa. 17:11) Yesu ukwete na bulēme bukatampe dijina dya Yehova. Nanshi muntu kabwanyapo kwitela bu mulondi wa bine wa Kidishitu shi kayukilepo dijina dya Leza ne shi keditelangapo.

3. Le i bika byotusa kwisambila’po mu kino kishinte?

³ Byotudi bene Kidishitu balonga bukomo bwa kulonda mu mayo a Yesu, o mwanda tukwete na bulēme dijina dya Shandi. (1 Pe. 2:21) Mu kino kishinte, tusa kumona dijina dya Yehova modiyukenyanga boba basapula “myanda miyampe ya Bulopwe.” (Mat. 24:14) Kadi tusa kwisambila ne pa buluji budi na dijina dya Yehova ku umo ne umo motudi.

“BANTU BA DIJINA DYANDI”

4. (a) Le Yesu wāpele bana ba bwanga mwingilo’ka kumeso kwa kujokela mūlu? (b) Le uno mwingilo i mulupule kipangujo’ka?

⁴ Kumeso kwa Yesu ajokele mūlu, wālaile bandi bana ba bwanga’mba: “Mukatambula bukomo pakāya mushipiditu ujila pomudi, kadi mukekala bami batumoni mu Yelusalema, mu Yudea ne mu Samadia monso, ne kulakula kwine kwa ntanda.” (Bil. 1:8) Nanshi myanda miyampe yādi ya kusapulwa konsokonso ke’nkapo mu Isalela. Ebiya bantu ba mizo yonso bādi ba kumona mukenga wa kwikala balondi ba Yesu. (Mat. 28:​19, 20) Yesu wānenene amba: “Mukekala bami batumoni.” Le bano bana ba bwanga bapya, bādi bafwaninwe kuyuka dijina dya Yehova’ni nansha bādi ba kwikala’tu batumoni ba Yesu? Malondololo ku kino kipangujo atanwa mu myanda ilembelwe mu Bilongwa shapita wa 15.

5. Le batumibwa ne bakulumpe mu Yelusalema bālombwele namani amba bantu bonso bafwaninwe kuyuka dijina dya Yehova? (Tala ne kifwatulo.)

⁵ Mu mwaka wa 49 Yesu ke mwiye, batumibwa ne bakulumpe mu Yelusalema bēbungile pamo mwanda wa kwisambila pa bifwaninwe kulonga bantu ba mizo pa kwitabijibwa bu bene Kidishitu. Yakoba mwanabo na Yesu wānenene ku mfulo kwa ino mīsambo amba: “[Petelo] wanena byonso mwatedile Leza mutyima dibajinji ku mizo mwanda wa kutonga’mo bantu ba dijina dyandi.” Le Yakoba wādi wisambila pa dijina dya ani? Wābwejeje’ko na kupituluka mu binenwa bya Amose amba: “Bantu bashele’ko bakimbe Yehova na mikeketo, ne bantu ba mizo yonso pamo, bantu betwa pa dijina dyami, i Yehova unena.” (Bil. 15:​14-18) Nanshi bano bana ba bwanga bapya kebādipo ba kwifunda’tu myanda ya Yehova, ino bādi ba ‘kwityilwa ne pa dijina dyandi.’ Kino kishintulula’mba bādi ba kusela dijina dya Leza ne kuyukena pa dino dijina.

6-7. (a) Mwanda waka Yesu wāile pano pa ntanda? (b) Le i bubinga’ka bukwabo bwa mvubu mpata bwāidile Yesu pano pa ntanda?

⁶ Dijina dya Yesu dishintulula’mba, “Yehova I Lupandilo.” Kadi Yehova wāingidije Yesu mwanda wa kukūla bantu bonso balombola lwitabijo. Yesu wāile pano pa ntanda mwanda wa kupa bantu būmi bwandi. (Mat. 20:28) Wāfutyile kinkūlwa mwanda wa kupa bantu mukenga wa kukūlwa ne kwikala na būmi bwa nyeke.—Yoa. 3:16.

⁷ Ino mwanda waka bantu bādi basakilwa bidi kinkūlwa? I mwanda wa byobya byālongekele mu budimi bwa Edena. Monka mwalombwedile’kyo kishinte kibadikile, bambutwile betu babajinji ba Adama ne Eva bātombokēle Yehova ne kujimija dyese dya kwikala’ko nyeke. (Ngo. 3:​6, 24) Inoko kudi kintu kya mvubu mpata kipityile enka ne kupanda kwa bantu ba bubi. I dijina dya Yehova dyāshingilwe tuto. (Ngo. 3:​4, 5) Inoko mwine wa kukūla lutundu lwa ba Adama ne Eva wādi utalwa na uno mwanda mukatampe wa kupandulwa kwa dijina dya Yehova. Yesu byaādi uselele dijina dya Yehova ne kumwimanina, wādi na mwingilo mukatampe wa kupandula dino dijina.

8. Le i bika byādi bifwaninwe kuyuka boba bonso betabija Yesu?

⁸ Bonso bādi bakimba kulombola lwitabijo mudi Yesu, ekale Bayuda nansha bantu ba mizo, bādi banenwe kuyuka Nsulo ya lupandilo lwabo, ko kunena’mba, Yehova Leza, Shandya Yesu. (Yoa. 17:3) Kadi pamo bwa Yesu, nabo bādi banenwe kwityilwa pa dijina dya Yehova. Ne kadi bādi bafwaninwe kuyuka mvubu ya kupandula dino dijina. Mwanda pa kusaka bapande, byādi bilomba bidi dino dijina dipandulwe. (Bil. 2:​21, 22) Nanshi balondi bonso ba kikōkeji ba Yesu, bādi bafwaninwe kufunda myanda ya Yehova ne ya Yesu. O mwanda Yesu wāfudije milombelo yandi idi mu Yoano 17 na kunena’mba: “Nayukanya dijina dyobe kobadi kadi nkediyukanya, amba buswe bowaunsenswe bwikale mobadi kadi ami nami umbumo nabo.”—Yoa. 17:26.

“MWI BAMI BATUMONI”

9. Le i muswelo’ka otubwanya kulombola’mba tumwene na mvubu dijina dya Yehova?

⁹ Nanshi balondi bonso ba Yesu ba bine, bafwaninwe kusangela kupandula dijina dya Yehova. (Mat. 6:​9, 10) Bafwaninwe kumona dijina dya Yehova bu i dilēme kupita majina onso. Kino kibalomba nabo kulonga’po kintu. Le i bika byotukokeja kulonga mwanda wa kupandula dino dijina ne kwiditōkeja ku tuto twidilambikile Satana?

10. Le i kidye’ka kya kyelekejo kitelelwe mu mukanda wa Isaya shapita wa 42 kutūla ku 44? (Isaya 43:9; 44:​7-9) (Tala ne kifwatulo.)

¹⁰ Mvubu ya mwingilo wetu wa kupandula dijina dya Yehova i milombolwe patōkelela mu mukanda wa Isaya shapita wa 42 kutūla ku 44. Ano mashapita esambila pa kidye kya kyelekejo mobasambija mwanda utala buleza bwa Yehova. Mu kino kisambo, Yehova utuluja boba bonso betela bu baleza belombole shi binebine i baleza. Kadi wita tumoni twabo twiye tulete bukamoni bubingija binenwa bya bano baleza. Ino i kutupu nansha umo usomonwa!—Tanga Isaya 43:9; 44:​7-9.

11. Le Yehova usapwila bantu bandi bika mu Isaya 43:​10-12?

¹¹ Tanga Isaya 43:​10-12. Yehova utela bantu bandi amba: “Banwe mwi bami batumoni, . . . kadi ami ne Leza.” Ebiya Yehova wendelela na kwibepangula kino kipangujo amba: “Le kudi Leza mukwabo kutalula’mo ami?” (Isa. 44:8) Nanshi batwe netu, tudi na dyese dya kulondolola ku kino kipangujo. Tuletanga bukamoni bwa amba Yehova ye Leza umo kete wa bine mu binenwa byetu ne mu bilongwa byetu. Dijina dyandi i dilēme kutabuka majina onso. Tulombolanga mu būmi bwetu bonso amba tusenswe Yehova kadi tulamete kwadi nansha shi Satana wetutyinye mbavu namani. Mu uno muswelo, tudi na dyese dya kukwasha ku kupandula dijina dyandi.

12. Le bupolofeto budi mu Isaya 40:​3, 5 bwāfikidile namani?

¹² Kitatyi kyotukwatakanya dijina dya Yehova ne ntumbo yandi, twiulanga Yesu Kidishitu. Kadi Isaya wālaile amba ‘kukekala muntu umo ukatōkeja [nansha ‘kulongolola,’ kunshi kwa dyani.] dishinda dya Yehova.’ (Isa. 40:3) Le bino binenwa byāfikidile namani? Yoano Mubatyiji wāteakeninye Yesu dishinda mwine wāile ne kwisambila mu dijina dya Yehova. (Mat. 3:3; Mako 1:​2-4; Luka 3:​3-6) Buno bupolofeto bumo bonka bunena’mba: “Ntumbo ya Yehova ikasokolwa.” (Isa. 40:5) Le buno bupolofeto bwāfikidile namani? Yesu pawāile pano pa ntanda wāimanine Yehova mu muswelo mubwaninine, byāikala pamo’nka bwa Yehova mwine wāile pano pa ntanda.—Yoa. 12:45.

13. Le i muswelo’ka otubwanya kwiula Yesu?

¹³ Pamo bwa Yesu, netu twi batumoni ba Yehova. Tuselele dijina dya Yehova kadi tusapwilanga bantu bonso botwitana nabo bilongwa byandi bya kutendelwa. Kadi pa kwikala batumoni bayampe ba Yehova, tufwaninwe kusapwila bantu bintu byonso byālongele Yesu mwanda wa kupandula dijina dya Yehova. (Bil. 1:8) Yesu i Kamoni mukatampe wa Yehova, kadi netu tulondanga kimfwa kyandi. (Kus. 1:5) Le penepo dijina dya Yehova didi na buluji’ka ku umo ne umo motudi?

MOTUMWENANGA DIJINA DYA YEHOVA

14. Mungya Ñimbo ya Mitōto 105:​3, le twiivwananga namani pa dijina dya Yehova?

¹⁴ Twifyelelanga dijina dya Yehova. (Tanga Ñimbo ya Mitōto 105:3) Yehova usangalanga potwitumbijija pangala pa dyandi dijina. (Yel. 9:​23, 24; 1 Ko. 1:31; 2 Ko. 10:17) ‘Kwitumbija mudi Yehova’ kushintulula kwifyelela’mba Yehova i Leza wetu. Tudi na dyese dya kulēmeka dijina dyandi ne kukwatakanya ntumbo yandi. Ketufwaninwepo kukwatwa bumvu bwa kulombola bengidi-netu, bakwetu ba ku masomo, balondakani netu, ne bakwabo amba twi Batumoni ba Yehova! Dyabola usakanga tuleke kusapwila bakwabo dijina dya Yehova. (Yel. 11:21; Kus. 12:17) Kadi Satana ne bapolofeto bandi ba bubela, basakanga bantu basūle dijina dya Yehova. (Yel. 23:​26, 27) Buswe botusenswe dijina dya Yehova bwitulengejanga tumusangaje “difuku dyonso dituntulu.”—Ñim. 5:11; 89:16.

15. Le kwita dijina dya Yehova kushintulula bika?

¹⁵ Twendelelanga kwita dijina dya Yehova. (Yoe. 2:32; Loma 10:​13, 14) Kwita dijina dya Yehova kulomba bivule kutabuka’ko’tu kwidiyuka nansha kwiditela. Tuyukile amba Leza i muntu ukulupilwa, otubwanya kulomba’ko bukwashi, ne bwendeji. (Ñim. 20:7; 99:6; 116:4; 145:18) Kadi tusapwilanga bantu dijina dyandi, ngikadila yandi, twibakwasha besāse ne kushinta mwanda wa betabijibwe na Yehova.—Isa. 12:4; Bil. 2:​21, 38.

16. Le i muswelo’ka otubwanya kulombola’mba Satana i mbepai?

¹⁶ Twitabijanga kususuka pangala pa dijina dya Yehova. (Yak. 5:​10, 11) Kitatyi kyotushala ba lulamato kudi Yehova mu makambakano, tulombolanga’mba Satana i mbepai. Mu mafuku a Yoba, Satana wāsambīle bengidi ba Yehova amba: “Muntu ukapāna bintu byonso byadi nabyo mwanda wa būmi bwandi.” (Yoba 2:4) Satana wānenene amba bantu babwanya kwingidila Yehova enka mu bitatyi biyampe, ino shi abatanwa na makambakano, bakaleka kwingidila Yehova. Ino Yoba muntu wa kikōkeji wālombwele amba byānenene Satana i bya bubela. Netu tudi na dyese dya kulombola’mba ketukaleka’byopo kwingidila Yehova nansha shi Satana etuletele makambakano’ka. Tukulupilei bya binebine amba Yehova ukendelela na kwitulama pa mwanda wa dijina dyandi.—Yoa. 17:11.

17. Mungya 1 Petelo 2:​12, le i muswelo’ka mukwabo otubwanya kutumbija dijina dya Yehova?

¹⁷ Tulēmekele dijina dya Yehova. (Nki. 30:9; Yel. 7:​8-11) Byotuselele dijina dya Yehova ne kumwimanina, tubwanya kulengeja bantu bedilēmeke nansha kwidifutulula. (Tanga 1 Petelo 2:12.) Inoko tuloñanga bukomo bwetu bonso mwanda wa kutendela Yehova na mwiendelejo wetu ne na byotunena. Mu uno muswelo, tukatumbija dijina dyandi nansha byotudi ba kubulwa kubwaninina.

18. Le i muswelo’ka mukwabo otubwanya kulombola’mba tumwene dijina dya Yehova na mvubu? (Tala ne kunshi kwa dyani.)

¹⁸ Tutele mutyima bininge ku kulēmekeja dijina dya Yehova kupita kwilēmekeja batwe bene. (Ñim. 138:2) Mwanda waka kulonga namino kudi na mvubu? Mwanda buswe botusenswe dijina dya Yehova bubwanya kulengeja tufutululwe na boba betujokolokele.a Yesu wādi witabije kufwa pamo bwa nkuma-bibi mwanda wa kulēmekeja dijina dya Shandi. Kāikelepo ‘kubanga bumvu’ mu buluji bwa amba, kātelepo mutyima bipitepite pa musa kumumwena bantu. (Bah. 12:​2-4) Aye wātele mutyima ku kulonga kiswa-mutyima kya Leza.—Mat. 26:39.

19. Le twiivwananga namani pa dijina dya Yehova, ne mwanda waka?

¹⁹ Twifyelelanga dijina dya Yehova ne kwiivwana bu balēme pobetwita bu Batumoni ba Yehova. Pa kino, twitabijanga na mutyima umo kafutululo konso kobabwanya kwitufutulula. Dijina dya Yehova i dya mvubu mpata kotudi kutabuka’ko dya batwe bene. Nanshi tusumininwei kutendela nyeke dijina dya Yehova nansha shi Satana wetupungulwila bika. Mu uno muswelo, tukalombola’mba dijina dya Yehova i dya mvubu mpata kotudi monka mwidimwena Yesu Kidishitu.