“Tongai Banwe Bene . . . Mwine Omukengidila”

1. Le i bika byotufwaninwe kulonga pa kwikala na nsangaji ya bine, ne mwanda waka? (Isaya 48:​17, 18)

TATA wetu wa mūlu witusenswe bininge, kadi usakanga twikale na būmi bwa nsangaji tamba’nka pano ne mu mafuku āya kumeso. (Mus. 3:​12, 13) Yehova wētupangile na bwino kampanda bwa kutendelwa, inoko kētupelepo bukomo bwa kwiendeja batwe bene nansha bwa kwitongela kiyampe ne kibi. (Mus. 8:9; Yel. 10:23) Uyukile amba pa kusaka twikale na nsangaji ya bine, tufwaninwe kumwingidila ne kwiendeja mungya misoñanya yandi.—Tanga Isaya 48:​17, 18.

2. Le Satana usakanga tukulupile bika, ne Yehova i mulonge’po namani pa kubepulula buno bubela?

² Satana usakanga tukulupile amba tubwanya kwikala na nsangaji pampikwa bukwashi bwa Yehova, ne amba bantu babwanya kwiludika abo bene biyampe. (Ngo. 3:​4, 5) Yehova wābepulwile ku buno bubela na kuleka bantu bāmutombokēle beludike abo bene mu bula bwa kitatyi kampanda. I bipēla kumona bintu bibi bilupukile ku buludiki bwa bantu. Kadi mu Bible mudi bimfwa bivule bya bana-balume ne bana-bakaji bāikele na būmi buyampe mu kwingidila Yehova. Umo mu bano bantu i Yesu Kidishitu. Dibajinji, tumonei’ko bubinga bwāmulengeje atonge kwingidila Yehova. Kupwa, tusa kubandaula mwanda waka tufwaninwe kutōta Tata wetu wa mūlu. Ku mfulo, tusa kumona’ko bubinga kampanda bwitulengeje tutonge kwingidila Yehova.

KINE KYĀLENGEJE YESU ATONGE KWINGIDILA YEHOVA

3. Le Satana wāpele Yesu bika, ne Yesu wātongele kulonga bika?

³ Yesu paādi pano pa ntanda, wādi na butongi bwa kutonga mwine wafwaninwe kwingidila. Kitatyi kityetye na pābatyijibwe Yesu, Satana wānenene kumupa maludiki onso a pano pa ntanda enka shi alonge kilongwa kya butōtyi. Yesu wālondolwele amba: “Taluka papo, Satana! Mwanda i kilembwe amba: ‘Ufwaninwe kutōta Yehova Leza obe, kadi aye kete ye ofwaninwe kwingidila mingilo ikola.’” (Mat. 4:​8-10) Mwanda waka Yesu wātongele buno butongi? Tubandaulei’ko bubinga kampanda.

4-5. Le i bubinga’ka bumobumo bwālengeje Yesu atonge kwingidila Yehova?

⁴ Bubinga bubajinji bwālengeje Yesu atonge kwingidila Yehova i buswe—Yesu usenswe Shandi kisanso kikatampe. (Yoa. 14:31) Kadi Yesu wingidilanga Yehova mwanda ye kintu kyoloke kyafwaninwe kulonga. (Yoa. 8:​28, 29; Kus. 4:11) Uyukile amba Yehova ye Nsulo ya būmi, i ukulupilwa, kadi i wa buntu. (Ñim. 33:4; 36:9; Yak. 1:17) Yehova wisambanga nyeke bubine kudi Yesu kadi i mumupe bintu byonso byadi nabyo. (Yoa. 1:14) Inoko Satana aye i mwishile bininge na Yehova. Satana ye wāletele lufu, i mbepai, wa makomwa-meso, ne wa kwisakila. (Yoa. 8:44) Yesu byaāyukile bino bintu, kāsakilepo nansha dimo kwiula Satana na kutombokela Yehova.—Fid. 2:​5-8.

⁵ Bubinga bukwabo bwālengeje Yesu atonge kwingidila Yehova i mwanda wātele mutyima pa bikalupuka ku mwingilo wandi wa kikōkeji. (Bah. 12:2) Wāyukile amba shi ashale nyeke wa lulamato, ukapandula dijina dya Shandi ne kutalula makambakano onso aletelwe na Dyabola.

KINE KYOTUFWANINWE KUTŌTELA YEHOVA

6-7. Mwanda waka bantu bavule dyalelo kebengidilangapo Yehova, ino mwanda waka tufwaninwe kumutōta enka aye?

⁶ Bantu bavule dyalelo kebengidilangapo Yehova mwanda kebayukilepo ngikadila yandi miyampe ne bintu biyampe byakadi mwibalongele. Ye mobyādi bikadile ne ku bene Atene bāsapwidilwe na mutumibwa Polo.—Bil. 17:​19, 20, 30, 34.

⁷ Polo wāsapwidile bene Atene amba Leza wa bine “ye upa bantu bonso būmi ne umpuya ne bintu byonso.” Kadi wābwejeje’ko amba: “I pa mwanda wa aye potwikele na būmi, tujina ne kwikala’ko.” Leza ye Umpangi mwine “wālupwile ku muntu umo mizo yonso ya bantu,” o mwanda i aye kete otufwaninwe kutōta.—Bil. 17:​25, 26, 28.

8. Le i bika kebikalongapo Yehova nansha dimo? Shintulula.

⁸ Yehova byadi Umpangi wetu kadi Muludiki wa diulu ne ntanda, wadi ubwanya kwituningila tumwingidile. Inoko Yehova kakalongapo kino nansha dimo. Aye i mwitupe bubinga bwa patōkelela bwa amba udi’ko ne amba usenswe umo ne umo motudi. Usakanga bantu bavule bapwane nandi nyeke. (1 Tm. 2:​3, 4) O mwanda Yehova i mwitufundije mwanda wa netu tufundije bantu bakwabo mpango yandi ne bintu biyampe byakalongela muzo wa muntu. (Mat. 10:​11-13; 28:​19, 20) I mutūle’ko kipwilo mwa kumutōtela ne bakulumpe ba buswe ba kwitukwasha.—Bil. 20:28.

9. Le buswe bwa Yehova i bumweke namani?

⁹ Yehova i mulombole buswe bwandi na kupa bintu biyampe enka ne boba batuna kwikala’ko kwandi. Tubandaulei’ko uno mwanda: Mu bula bwa mānga, bantu midiyo ne midiyo i batonge kulonga byobya byobamona bu biyampe ne bibi pa kyaba kya kukōkela Yehova. Nansha nankyo, Yehova i mwibape na buntu bintu byobasakilwa pa kwikala’ko bōmi ne kwikala na nsangaji mu bwabo būmi. (Mat. 5:​44, 45; Bil. 14:​16, 17) Pa mwanda wa Yehova, babwanya kwikala na balunda ne na kisaka kibasenswe, bana, kaji, ne kusangela būmi. (Ñim. 127:3; Mus. 2:24) Buno bubinga bulombola patōkelela’mba Tata wetu wa mūlu usenswe bantu bonso. (Div. 34:6) Shi ke pano, tubandaulei’ko bubinga bumobumo botutongelanga kwingidila Yehova ne muswelo waeselanga boba batonga kumwingila.

KINE KYOTUTONGELANGA KWINGIDILA YEHOVA

10. (a) Le i bubinga’ka bubajinji bwitulengejanga tutonge kwingidila Yehova? (Mateo 22:37) (b) Le wi mumwene namani mu kitūkijetyima kya Yehova? (Ñimbo ya Mitōto 103:​13, 14)

¹⁰ Pamo bwa Yesu, netu dibajinji twingidilanga Yehova mwanda tumusenswe kisanso kikatampe. (Tanga Mateo 22:37.) Twafwenene kudi Yehova kitatyi kyotwefundile ngikadila yandi. Kimfwa, tubandaulei’ko muswelo witutūkijije Yehova mutyima. Bene Isalela pobābudilwe kikōkeji kudi Yehova, wēbazenzele amba: “Nemwisāshila, jokai ku mashinda enu mabi.” (Yel. 18:11) Yehova uvulukanga’mba twi bakubulwa kubwaninina, kadi twi luvumbi. (Tanga Ñimbo ya Mitōto 103:​13, 14.) Le kulangulukila pa kitūkijetyima ne pa ngikadila yandi mikwabo miyampe kekukulengejangapo umwingidile nyeke?

11. Le i bubinga’ka bukwabo botutongelanga kwingidila Tata wetu wa mūlu?

¹¹ Kadi tusakanga kwingidila Yehova mwanda kyo kintu kiyampe kyotufwaninwe kulonga. (Mat 4:10) Ne kadi, tuyukile bintu biyampe bikalupuka ku mwingilo wetu wa kikōkeji. Kwingidila Yehova na kikōkeji kupandulanga dijina dyandi, kubingijanga’mba Dyabola i mbepai, kadi kusangajanga mutyima wa Tata wetu. Kadi kutonga kwingidila Yehova tamba dyalelo, kwitupanga mukenga wa kumwingidila nyeke!—Yoa. 17:3.

12-13. Le i ñeni’ka yotuboila ku kimfwa kya ba Jane ne Pam?

¹² Enka ne potukidi bankasampe, tubwanya kusanswa Yehova bininge kadi buno buswe bubwanya kwendelela kuningila’ko kitatyi kyotutama. Tubandaulei’ko kimfwa kya bakaka babidi ba mukulu ne nkasa betwa bu Jane ne Pam.a Jane wadi na myaka 11 ne Pam na myaka 10 pobashilwile kwifunda Bible. Nansha bambutwile babo byokebadipo batele mutyima ku kwifunda Bible, baitabijije ba Jane ne Pam befunde Bible na Batumoni koku kadi benda na kyabo kisaka ku kyabo kipwilo. Jane unena’mba, “Bintu byamfundije Batumoni byankweshe nkomene kuningila kwadi kuningila balunda nami, mwanda wa ntome bintu bikolwañana ne kulonga busekese.”

¹³ Myaka mityetye pa kupita’po, bano bansongwakaji babidi babatyijibwa. Kitatyi pa kupita’po, bashilula mwingilo wa bu pania koku bakwatakanya bambutwile babo banunu. Palangulukila pa byaemwenine, Jane unena’mba: “Nemwifunde amba Yehova ukwatakanyanga balunda nandi ba kikōkeji, kadi monka munenena 2 Temote 2:​19, ‘Yehova uyukile bandi.’” Na bubine Yehova ukwatakanyanga nyeke boba bamusenswe ne batonga kumwingidila!

14. Le binenwa byetu ne bilongwa byetu bikwashanga namani ku kupandula dijina dya Yehova? (Tala ne bifwatulo.)

¹⁴ Tusakanga kukwasha ku kupandula dijina dya Yehova. Tubandaulei’ko uno mwanda: Fwatakanya’po udi na mulunda wa kanye, wa buntu, kadi wa lusa. Difuku dimo ubaivwana muntu unena’mba mulunda nobe i kipolapola kadi wa budimbidimbi. Le ukalonga’po bika? Ukamubingija. Mo monka, Satana ne bantu bandi bakimbanga kufutulula dijina dya Yehova ne kusambakanya bubela pādi, o mwanda tuloñanga’po kintu na kunena bubine butala padi Yehova ne kubingija dijina dyandi na bukankamane. (Ñim. 34:1; Isa. 43:10) Tulombolanga’mba tusakanga kwingidila Yehova na mutyima wetu onso kupityila ku byotunena ne byotulonga.

15. Le mutumibwa Polo wāmwenine namani mu kushinta būmi bwandi? (Bene Fidipai 3:​7, 8)

¹⁵ Tusakanga kushinta bintu kampanda mu bwetu būmi mwanda wa tubwanye kwingidila Yehova ne pa mfulo mu muswelo waitabije. Kimfwa, mutumibwa Polo wātongele kushiya ntumbo ya wādi nayo mu Bayuda mwanda wa kulonda Kidishitu ne kwingidila Yehova. (Ngt. 1:14) Ne kino kyāmulengeje apalwe mpalo mu bwandi būmi ne kwikala na dyese dya kukaludika na Kidishitu momwa mūlu. Kēalakenyepo nansha dimo pa butyibi bwandi bwa kwingidila Yehova. Netu ketukealakanyangapo nansha dimo.—Tanga Bene Fidipai 3:​7, 8.

16. Le i ñeni’ka yotubwanya kuboila ku kimfwa kya Julia? (Tala ne bifwatulo.)

¹⁶ Shi tutūle kwingidila Yehova pa kifuko kibajinji, tukeselwa mu būmi tamba’nka pano ne mu mafuku āya kumeso. Tubandaulei’ko kimfwa kya kaka witwa bu Julia. Julia paakidi nkasampe wadi kaimba wa mu kisumpi kya batuimba ba mu kyabo kipwilo kumeso kwa kwifunda bubine. Kaimba umo wa bwino wajingulula’mba Julia udi na kyabuntu kya kwimba, ebiya washilula kumwibidija. Bukidi bonka, Julia watumba ne kushilula kukemba mu mobo matumbe mobembilanga ñimbo. Paadi ukatanwa ku masomo matumbe a minjiki, mulunda nandi umo wa ku masomo washilula kumusapwila myanda itala Leza ne kumushintulwila’mba dijina dya Leza i Yehova. Kitatyi kityetye pa kupita’po, Julia washilula kwifunda Bible misunsa ibidi mu yenga. Kupwa, wakwata butyibi bwa kupityija būmi bwandi ne kitatyi kyandi mu kwingidila Yehova pa kyaba kya kwikala kaimba mukatampe. Buno kebwadipo butyibi bupēla. Julia unena’mba, “Bantu bavule badi bansapwila’mba ngasanga dyese dyami mpete, inoko nasakile kwingidija būmi bwami bonso mwanda wa kwingidila Yehova.” Le pano wiivwananga namani pa butyibi bwaakwete mwanda wa kwingidila Yehova pano kepadi myaka 30 ne kupita? Unena’mba, “Ngidi na nsangaji ya mutyima kadi nkulupile amba Yehova ukavuija byonso bisakasaka mutyima wami mu mafuku a kumeso.”—Ñim. 145:16.

TWENDELELEI KWINGIDILA YEHOVA

17. (a) Le i bika bifwaninwe kulonga boba kebashilwile kwingidila Yehova, ne mwanda waka? (b) Le i bika biyukile boba bakwete butyibi bwa kwingidila Yehova?

¹⁷ Tudi ku mfulo kwa ino ngikadilo ya bintu. Mutumibwa Polo wālembele amba: “Mwanda kukishele ‘kakitatyi katyutyutyutyu,’ kadi ‘yewa wiya usa kufika kadi kasapo kwija.’” (Bah. 10:37) Le kino kitufundija bika? Kitufundija’mba kitatyi kyashala’ko kya kutonga kwingidila Yehova ke kityetye bininge. (1 Ko. 7:29) Kadi shi ketudi bakwate kala butyibi bwa kwingidila Leza, tuyukile amba biketulomba kūminina matompo, kadi kuno kūminina kukekala’tu kwa mu “kakitatyi katyutyutyutyu.”

18. Le ba Yehova ne Yesu basakanga tulonge bika?

¹⁸ Yesu wākankamikile bandi bana ba bwanga bamulonde ne kwendelela kumulonda. (Mat. 16:24) Nansha shi ketudi bengidile Yehova mu bula bwa myaka mivule, tusumininwei kwendelela kumwingidila. Tunenwe kulonga bukomo bwa kwingidila nyeke Yehova. Kulonga namino kekupēlangapo, ino tukekala na nsangaji ne kwimwena madyese mavule tamba’nka pano!—Ñim. 35:27.

19. Le i ñeni’ka yotuboila ku kimfwa kya Gene?

¹⁹ Bamo balañanga’mba kwingidila Yehova kulombanga bivule. Shi wi nkasampe, le ulanga’mba ubwanya kujimija kintu kampanda shi utonge kwingidila Yehova? Tutu umo nkasampe witwa bu Gene unena’mba: “Namwene amba kwikala Kamoni wa Yehova i kutyinibwa mbavu. Byadi bimweka’mba bankasampe bavule botwadi tutama nabo pamo badi na bintu bisangaja, pamo bwa kwenda ku mafetyi, kukimba tukaji, nansha kukaya makayo a video a bya lūma, papo amiwa mpityija kitatyi kivule ku kupwila ne mu busapudi.” Le uno mulangilo waikele na lupusa’ka padi Gene? Unena’mba, “Nashilwile kwikala na būmi bwa mapala abidi, ne kwisangaja’ko mu kitatyi kampanda. Inoko kulonga namino kekwandetelepo nsangaji ya endaenda. Ebiya nashilula kulangulukila pa bubine bwa mu Bible bonashilwile kusūla, kupwa natonga kwingidila Yehova na mutyima wami onso. Kufika ne pano i bimweke amba Yehova i mulondolole milombelo yami yonso.”

20. Le i bika byotufwaninwe kusumininwa kulonga?

²⁰ Kaimba wa mitōto wāimbīle Yehova’mba: “Wa nsangaji i yewa otonga ne kumufwenya kubwipi amba ekale mu bipango byobe.” (Ñim. 65:4) Netu tusumininwei kwendelela kwingidila Yehova. Pamo bwa Yoshua, netu tunenei’mba: “Ami ne ba mu njibo yami, tukengidilanga Yehova.”—Yos. 24:15.