Muswelo wa Kulumbulula Milombelo Yobe

1-2. (a) Le i bika bibwanya kwitukankaja tusapwile Yehova motwiivwanina? (b) Le tubayuka namani amba Yehova wivwananga na katentekeji milombelo yetu?

LELO kitatyi kimo umonanga’mba kopitulukanga mu bintu bimo byonka polombela, ne amba milombelo yobe ke ya kūlukūlu nansha ya kajilwilo? Shi i amo, nankyo kudipo bunka. Byotuvudilwe bya kulonga, kitatyi kimo tulombelanga milombelo mīpi ne kwilwa kulombela bintu bya mvubu. Kadi tubwanya’nka ne kukolelwa pa kulombola Yehova motwiivwanina, mwanda twityepelwanga kumufwena.

² Bible witukulupija’mba kya mvubu mpata kudi Yehova ke muswelopo otulombela, ino kya mvubu kwadi i shi milombelo yetu itamba ku mutyima. Aye wivwananga “kulomba kwa betyepeje.” (Ñim. 10:17) Utejanga na katentekeji binenwa byetu byonso mwanda witutele mutyima bya binebine.—Ñim. 139:​1-3.

3. Le i bipangujo’ka byotusa kwisambila’po mu kino kishinte?

³ Tubwanya kwiipangula’mba: Mwanda waka tubwanya kulombela kudi Yehova na kikulupiji kyonso? Le i muswelo’ka otubwanya kulumbulwila’ko milombelo yetu? Le kulangulukila pa milombelo ya bengidi ba Yehova ilembelwe mu Bible, kubwanya kwitukwasha namani tulumbulule milombelo yetu? Le tukalonga namani shi tubakomenwa kulombola Yehova motwiivwanina? Lekai tutane malondololo ku bino bipangujo.

LOMBELA NA KIKULUPIJI KYONSO KUDI YEHOVA

4. Le i bika bibwanya kwitukwasha tulombele na kikulupiji kyonso kudi Yehova? (Ñimbo ya Mitōto 119:145)

⁴ Shi tubaivwanija’mba Yehova i mulunda wa lulamato mwine usaka’mba bintu bitwendekele biyampe, tukapēlelwa kumulomba na kikulupiji kyonso. Mulembi wa Lwimbo lwa Mitōto lwa 119 wālongele bukomo bwa kumona Yehova bu mulunda wa lulamato, kitatyi kyaādi ulombela kwadi. Būmi bwandi bwādi bwa makambakano. Bantu bamo bādi bamunenena bibi. (Ñim. 119:​23, 69, 78) Kadi wādi wikonda ne na kubulwa kubwanina kwandi. (Ñim. 119:5) Ino nansha nankyo, kāivwenepo moyo wa kusapwila Yehova mwawiivwanina.—Tanga Ñimbo ya Mitōto 119:145.

5. Mwanda waka ketufwaninwepo kuleka milangwe mibi itukankaje kulombela? Leta kimfwa.

⁵ Yehova wita enka ne boba balongele bubi bukatampe balombele kwadi. (Isa. 55:​6, 7) O mwanda ketufwaninwepo kuleka milangwe mibi itukankaje kulombela kwadi. Tulete’ko kimfwa, mwendeji wa amviyo uyukile amba kitatyi kyasakilwa bukwashi, ubwanya kwisamba na boba bamuludika. Le ukekaka kwisamba nabo kutyina bakamumona’mba wajimina nansha walonga kilubo? Ke amopo! Muswelo umo onka, netu nansha shi twasāsukile ne kulonga bubi, tubwanya kulombela kudi Yehova na kikulupiji kyonso.—Ñim. 119:​25, 176.

MUSWELO WA KULUMBULWILA’KO MILOMBELO YOBE

6-7. Le kulangulukila pa ngikadila ya Yehova kwitukwashanga namani tulumbulwile’ko milombelo yetu? Leta kimfwa. (Tala ne kunshi kwa dyani.)

⁶ Tulumbulwilanga’ko milombelo yetu kitatyi kyotusapwila Yehova patōkela bitudi ku mutyima, ne muswelo otwiivwana. Penepo, i bika byotufwaninwe kulonga pa kulumbulula milombelo yetu?

⁷ Langulukila pa ngikadila ya Yehova.a Kitatyi kyotulangulukila pa ngikadila yandi, po pene tukapēlelwa kumusapwila motwiivwanina. (Ñim. 145:​8, 9, 18) Tubandaulei’ko kimfwa kya kaka Kristine, mwine wadi na tata usenswe bya lūma. Ushintulula’mba: “Kwisamba na Yehova bu Tata wami kekwadipo kumpēlela. Nadi nanga’mba kubulwa kubwaninina kwami kubwanya kumulengeja angele.” Le i ngikadila’ka ya Yehova yamukweshe? Unena’mba: “Buswe bwa Yehova bwa ndamatyidile bwantūkije mutyima. Ndyukile amba kakangelapo. Byadi Tata wa buswe, nansha shi napone, ukanangula. Kino kinengejanga musapwile bintu binsangajanga bininge enka ne makambakano ami.”

8-9. Le i byabuyabuya’ka bimo bidi mu kulangulukila pa byotusaka kunena mu milombelo kumeso kwa kulombela? Leta kimfwa.

⁸ Langulukila pa byosaka kunena. Kumeso kwa kulombela, ubwanya kwiipangula bipangujo bivule. Kimfwa: ‘Le i makambakano’ka onekonda nao pano? Le kudi muntu onenwe kulekela? Le nekondanga na makambakano onsakilwa’mo bukwashi bwa Yehova pa kwiakomena?’ (2 Ba. 19:​15-19) Kadi tubwanya kulonda kimfwa kyētushidile Yesu kya muswelo wa kulombela na kulangulukila pa byotukimba kulombela pangala pa dijina dya Yehova, pa Bulopwe bwandi, ne pa kiswa-mutyima kyandi.—Mat. 6:​9, 10.

⁹ Kaka umo witwa bu Aliska paayukile amba būmi bwa wandi mulume i bwipi pa mwanda wa dyaya dya mu bongolo dyaadi ubela, wadi ukomenwa’nka ne kulombela. Uvuluka’mba: “Natyumukilwe mutyima bininge kenkomenwa’nka ne bya kunena mu milombelo.” Le i bika byamukweshe? Unena’mba: “Nadi netūdila’ko kitatyi kampanda kya kuteakanya milangwe yami kumeso kwa kulombela, kadi kino kyankweshe mone amba nkyadipo nombela’nka pa myanda intala ne pa misongo ya wami mulume. Kulonga namino kwankweshe ntūkijibwe mutyima ne kwikala na ñeni mishikate kitatyi kyonombela.”

10. Mwanda waka tufwaninwe kulombela mu bula bwa kitatyi kilampe? (Tala ne bifwatulo.)

¹⁰ Lombela mu bula bwa kitatyi kilampe. Nansha shi milombelo mīpi ibwanya kwikala ya kamweno, ino milombelo milampe ibwanya kwitukwasha tulupule myanda mivule idi ku mutyima.b Elijah, mulumya Aliska unena’mba: “Noñanga bukomo bwa kulombela misunsa mivule mu bula bwa difuku, kadi kwitūdila’ko kitatyi kya kulombela mu bula bwa kitatyi kilampe i kunengeje mpwane na Yehova. Yehova keyumbilangapo mwanda wa mpwe milombelo yami bukidibukidi, o mwanda mwine netūdilanga’ko kitatyi kilampe kya kulombela.” Tompa kulonga namino: Witūdile’ko kitatyi ne kifuko kwa abe kulombela, padi i na diwi ditunduke, kwampikwa bilabi, ne kwikala na kibidiji kya kulombela mu bula bwa kitatyi kilampe.

LANGULUKILA PA MILOMBELO YA BANTU BA KIKŌKEJI ILEMBELWE MU BIBLE

11. Le tumwenanga namani mu kulangulukila pa milombelo ya bantu ba kikōkeji ilembelwe mu Bible? (Tala ne kapango “Le Ubwanya Kwiivwana Mobēivwanine?”)

¹¹ Kulangulukila pa milombelo ya bantu ba kikōkeji ilembelwe mu Bible, ne pa ñimbo ya kutendela Yehova, kubwanya kukukwasha. Kulangulukila pa muswelo wādi ulupula bengidi ba Yehova bibadi ku mutyima, kukakutonona ushitwile Yehova mutyima obe. Kadi ubwanya kusokola binenwa bipya bya mitendelo bine byobwanya kukuja mu milombelo yobe. Ne kadi ubwanya kusokola enka ne milombelo ikwatañene na ngikadilo yodi’mo.

12. Le i bipangujo’ka byobwanya kwiipangula kitatyi kyolangulukila pa binenwa bingidijibwe mu milombelo ilembelwe mu Bible?

¹² Kitatyi kyolangulukila pa binenwa bingidijibwe mu milombelo ilembelwe mu Bible, ubwanya kwiipangula’mba: ‘Le i ani unenene bino binenwa ne wādi mu ngikadilo’ka? Le mbwanya kukuja bino binenwa mu milomebelo yami? Le i ñeni’ka yombwanya kuboila’ko?’ Bibwanya kukulomba kulonga bukimbi pa kulondolola bino bipangujo, inoko kulonga namino kudi na kamweno. Tubandaulei’ko bimfwa bityetye.

13. Le i ñeni’ka yotubwanya kuboila ku milombelo ya Hana? (1 Samwele 1:​10, 11) (Tala ne kifwatulo .)

¹³ Tanga 1 Samwele 1:​10, 11. Hana paālombēle ino milombelo, wādi wikonda na makambakano abidi makatampe. Wādi ñumba, kadi wandi mulume wādi na mukaji mukwabo wādi umususula. (1 Sa. 1:​4-7) Shi wikondanga na makambakano keapu, le i ñeni’ka yobwanya kuboila ku milombelo ya Hana? Wāsengelwe na kulombela kudi Leza mu bula bwa kitatyi kilampe ne na kwela kiselwa kilēma kwadi. (1 Sa. 1:​12, 18) Batwe netu tubwanya kutūkijibwa mutyima kitatyi kyotwela “kiselwa [kyetu] kilēma padi Yehova,” na kumulombola patōkelela motwiivwanina pangala pa makambakano etu.—Ñim. 55:22.

14. (a) Le i ñeni’ka mikwabo yotubwanya kuboila ku kimfwa kya Hana? (b) Le kulangulukila pa Bisonekwa kubwanya kwitukwasha namani tulumbulule milombelo yetu? (Tala kunshi kwa dyani.)

¹⁴ Myaka mityetye pa kupita’po na pābutwilwe Samwele, Hana wākamutūdile kudi Kitobo Mukatampe Edi. (1 Sa. 1:​24-28) Mu milombelo itamba ku mutyima yālombele Hana, wānenene’mo na kikulupiji kyonso amba, Yehova ukiñanga ne kukwatakanya bengidi bandi ba lulamato.c (1 Sa. 2:​1, 8, 9) Makambakano andi keāpwilepo kitatyi kyaājokēle ku njibo, inoko wātele mutyima pa muswelo wāmwesele Yehova. Le i ñeni’ka yotuboila’ko? Tuboila’ko ñeni ya amba, tukapēlelwa kūminina makambakano akyendelela shi tute mutyima pa muswelo ke mwitukwashe Yehova kufikija ne pano.

15. Le i ñeni’ka yotubwanya kuboila ku milombelo ya mupolofeto Yelemia kitatyi kyotulongelwa bintu na bukondame? (Yelemia 12:1)

¹⁵ Tanga Yelemia 12:1. Kitatyi kimo mu būmi bwandi, mupolofeto Yelemia wāvutakanibwe ñeni pa kumona bantu babi badi na būmi buyampe. Kadi wātengelwe pa kumona muswelo wādi umulongela banababo bene Iselela bintu. (Yel. 20:​7, 8) Tubwanya kumwiula kitatyi kyotumona’mba bantu ba budimbidimbi badi na būmi buyampe, nansha kitatyi kyotufutululwa. Nansha shi Yelemia wālombwele mobyāmusanshīle, kātatenepo boloke bwa Leza. Kitatyi kyaādi umona Yehova upa mfuto bantu bādi bamutombokela, kikulupiji kyandi mu boloke bwa Leza kyāningīle’ko bininge. (Yel. 32:19) Netu tubwanya kulombola Yehova motwiivwanina, koku tukulupile amba pa kitatyi kifwaninwe, Yehova ukapwa bukondame botwikonda nabo pano.

16. Shi ngikadilo yotudi’mo keikitulengejapo tulonge byotwadi tubwanya kulonga, le i ñeni’ka yotubwanya kuboila ku mwine Levi wāselelwe bu musungi? (Ñimbo ya Mitōto 42:​1-4) (Tala ne bifwatulo.)

¹⁶ Tanga Ñimbo ya Mitōto 42:​1-4. Luno lwimbo, lwālembelwe na mwine Levi musungi, mwine kādipo ubwanya kutōtela pamo na banababo mu lwitabijo. Luno lwimbo lwandi lwa mitōto, lulombola mwaādi wiivwanina. Tubwanya kwivwanija mwawēivwanine kitatyi kyotushikete kijabanda ku njibo nansha kitatyi kyotukutyilwe pa mwanda wa lwitabijo lwetu. Muswelo otwiivwana ubwanya kushinta, ino i biyampe tulombole’o Yehova mu milombelo. Kulonga namino kuketukwasha tubandaule milangwe yetu ne kwikala na mumweno muyampe pa ngikadilo yotudi’mo. Kimfwa, mwine Levi wājingulwile amba wādi na mikenga mikwabo ya kutendela’mo Yehova. (Ñim. 42:5) Kadi wālangukukīle ne pa muswelo wādi umukwatakanya’mo Yehova. (Ñim. 42:8) Kulombela na kininga kudi Leza kubwanya kwitukwasha twiivwane biyampe, twikale na bujalale, ne na bukomo bwa kūminina.

17. (a) Le i ñeni’ka yotubwanya kuboila ku milombelo ya mupolofeto Yona? (Yona 2:​1, 2) (b)  Le binenwa bimo bidi mu Ñimbo ya Mitōto bibwanya kwitukwasha namani kitatyi kyotudi mu makambakano? (Tala kunshi kwa dyani.)

¹⁷ Tanga Yona 2:​1, 2. Mupolofeto Yona wālombēle ino milombelo kitatyi kyaādi mu difu dya mushipa mukatampe. Nansha Yona byakākōkelepo Yehova, ino wādi ukulupile amba Leza ukevwana kulomba kwandi. Mu milombelo yandi, Yona i mwingidije’mo binenwa bivule bitanwa mu Ñimbo ya Mitōto.d Wādi uyukile senene ano mavese. Kulangulukila’po, kwāmukulupije amba Yehova ukamukwasha. Netu, shi tukwatyile pa mutwe mavese kampanda a mu Bible, abwanya kwitwiya mu ñeni potulombela kudi Yehova mu kitatyi kya makambakano.

FWENA NYEKE YEHOVA MU MILOMBELO

18-19. Le Bene Loma 8:​26, 27, witukulupija bika kitatyi kyotukomenwa kujadika binenwa byetu potulombela? Leta kimfwa.

¹⁸ Tanga Bene Loma 8:​26, 27. Tubwanya kulēmenenwa na kuzumbija mutyima kitatyi kyotukomenwa kusapwila Yehova motwiivwanina. Nansha nankyo, tudi na wa kwitukwasha. Mu bitatyi pamo bwa bino, mushipiditu ujila wa Leza “uzenzanga” pa mwanda wetu. Muswelo’ka? Kupityila ku mushipiditu wandi ujila, Yehova wālengeje milombelo mivule ilembwe mu Kinenwa kyandi. Kitatyi kyoketubwanyapo kulombola patōkelela milangwe yetu, Yehova ubwanya kwitabija ne kulondolola binenwa bimo bya mu ino milombelo byotubwanya kwingidija kitatyi kyotulombela.

¹⁹ Bino binenwa byakweshe kaka umo ushikatanga mu Rusi, witwa bu Yelena. Wakutyilwe mwanda wadi utanga Bible ne kulombela. Yelena wazumbije mutyima bininge kakomenwa’nka ne kulombela. Unena’mba: “Navulukile amba shi nalēmenenwa na kuzumbija mutyima kenkomenwa ne bya kunena mu milombelo, shi nombele kudi Yehova na kwingidija binenwa bidi mu milombelo yālombēle bengidi bandi ba pa kala mine yālembelwe ku bukomo bwa mushipiditu . . . Yehova ukangivwana. . . . Kulonga namino kwansengele kitatyi kyonadi nekonda na makambakano makatampe.”

20. Le i muswelo’ka otubwanya kuteakanya ñeni yetu kumeso kwa kulombela kitatyi kyotutyumukilwe mutyima?

²⁰ Kitatyi kyotutyumukilwe mutyima, tubwanya’nka ne kukomenwa kushikatyija ñeni yetu pamo kitatyi kyotulombela. Pa kuteakanya ñeni yetu, tubwanya kuteja mawi makwate a Lwimbo lwa Mitōto. Kadi tubwanya kulemba mwiivwanino wetu, na mwālongēle Mulopwe Davida. (Ñim. 18, 34, 142; bilembwa bya kūlu.) Shako, kekudipo misoñanya ya patōkelela ilombola mwa kuteakenya milombelo yetu. (Ñim. 141:2) Longa byobya bibwanya kukwendekela senene.

21. Mwanda waka tufwaninwe kulombela na mutyima wetu onso?

²¹ Bisenga’po kashā kuyuka’mba Yehova uyukile muswelo otwiivwana, enka ne kumeso kwa kunena kintu kyo-kyonso. (Ñim. 139:4) Nansha nankyo, usangelanga kwivwana binenwa bilombola’mba tumukulupile. Nanshi kokekaka kulombela kudi Tata obe wa mūlu. Ingidija myanda ya mu milombelo idi mu Kinenwa kyandi. Lombela na mutyima obe onso. Mulombole bintu bikusangajanga ne makambakano owikonda nao. Yehova ukakukwasha nyeke, mwanda i Mulunda nobe wa bine!