Bene Kidishitu ne Mavita—Le Bible Unena’po Namani?

Monka mulombwela’byo tuvutakanya twa mu Ikrene, bendeji bavule ba bipwilo bya bwine Kidishitu bakankamikanga bininge kwilwa mavita. Tala bendeji ba bipwilo mobakwatakenya mitamba yonso ibidi ya belwa divita:

• “Tutendela ne kufwija’ko basola bonso balwila yetu ntanda ya Ikrene ku walwana wetutamba bulwi . . .Kulupilai amba tudi nenu nyeke kadi twimulombelelanga.”—Mukulu wa kipwilo kya Orthodox mu Kyiv, byalupwilwe mu julunale wa Jerusalem Post, mu mafuku 16 Kweji 3, 2022.

• “Mukulu wa Kipwilo kya Orthodox mu Rusi waimanine kupwila kwa kukwatakanya basola ba mu Rusi mu Dya Yenga, webakankamika balwile yabo ntanda, wanena’mba ‘bene Rusi bo abo kete babwanya kwiilwila’ mu kino kitatyi kyendelela kulwa basola ba mu Mosku mu Ikrene.”—Reuters, 3 Kweji 4, 2022.

Lelo bene Kidishitu bafwaninwe kwikuja mu mavita? Le Bible unena’po namani?

Bine binena Bible

Bible unena’mba balondi ba bine ba Yesu Kidishitu kebalungapo mavita.

• “Aluja kipete pokyadi, mwanda boba bonso batekuna kipete bakafwa ku kipete.”—Mateo 26:52.

  Le muntu witabija mavita nansha ulwa’o ukōkelanga binebine binenwa bya Yesu?

• “Nemupe mbila mipya, amba mwisanswe banwe bene na bene; monka monemusanshilwe, nenu mwisanswei banwe bene na bene.Pa kino bonso bakayuka’mba mwi bami bana ba bwanga—shi mudi na buswe umbukata mwenu.”—Yoano 13:34, 35.

  Le muntu ukwatakanya mavita ulombolanga buswe bwine bwānenene Yesu amba bo bobakayukila’po bandi bana ba bwanga, nansha balondi bandi?

Shi usaka kuyukila’ko bivule, tala kishinte “Peut-on concilier guerre et christianisme?”

Bene Kidishitu ne mavita dyalelo

Le i byendele’mo bene Kidishitu baleke kulwa mavita dyalelo? En-en. Bible wālaile amba mu kino kyetu kitatyi kītwa bu “mafuku a mfulo,” mukekalanga bantu ba mu mizo yonso “kebakefundepo monka divita,” kukwatañana na bufundiji bwa Yesu.—Isaya 2:2, 4, kunshi kwa dyani.

• Pa kuyukila’ko bivule, tanga bishinte bya mu Kiteba kya Mulami binena’mba “Le Leza Umwene Mavita Namani?”

Panopano ponka Yehova,a “Leza wa ndoe,” usa kwingidija umbikalo wandi wa momwa mūlu mwanda wa kukūla bantu “ku malwa ne ku lūma.”—Bene Fidipai 4:9; Ñimbo ya Mitōto 72:14.

• Pa kumona muswelo obisa kufikidila, tala video Le Bulopwe bwa Leza I Bika?