Kujimija Kikulupiji mu Bendeji ba Politike—Le Bible Unena’po Namani?

Mu mwaka wa 2024 musa kulongeka mavote mavule ntanda yonso. Inoko bantu bavule ke bajimije kikulupiji mu bendeji ba politike.

• Bantu bavule mu Amerika banenene mu bwipangudi bwalongelwe amba, “bendeji ba politike bavule batononwanga na milangwe ya kwisakila” pa kyaba kya kutononwa na mutyima wa kwingidila bantu.a—Pew Research Center, 19 Kweji 9, 2023.

Kadi bankasampe bavule kebakulupilepo bendeji ba politike.

• “Bankasampe bakyanza kusongola bakimbanga kupwija makambakano, inoko banenene mu bwipangudi bwalongelwe amba bendeji ba politike kebatelepo mutyima ku bintu byobasaka.”—The New York Times, 29, Kweji 1, 2024.

• “Ankete imo ilombola’mba, bankasampe bakulupile bininge boba balonga mavideo pa YouTube kupita’ko bendeji ba politike.”—The Korea Times, 22 Kweji 1, 2024.

Lelo tubwanya kukulupila bilaya bendeji ba politike amba tusa kwikala na būmi bulumbuluke kumeso’ku? Lelo i ani otubwanya kukulupila?

Tadija muntu okulupila

I kya tunangu bantu batadije boba bobakulupila. Bible unena’mba “muntu mwendalale witabijanga binenwa byonso, ino mukosoke ulangulukilanga pa matabula onso.”—Nkindi 14:15.

• Pa kuyuka mwa kujingulwila shi myanda yoivwana i ya bine nansha ya bubela, tanga kishinte “Wilame ku Myanda ya Bubela.”

Kadi, nansha ke bendeji ba politike bampikwa budimbidimbi ne ba kukanina kuyampe badi na mikalo mu bintu byobabwanya kulonga. O mwanda Bible witudyumuna’mba:

• “Ke mukulupilai bamfumu nansya bantu ke babwanya kukulangana.”—Ñimbo ya Mitōto 146:3, Bisonekwa Bitokele.

Mwendeji obwanya kukulupila

Bible ulombola’mba Leza i mutonge mwendeji mukomo kadi ukulupilwa: ke Yesu Kidishitu kadi. (Luka 1:32, 33) Yesu i Mulopwe wa Bulopwe bwa Leza, umbikalo uludika tamba momwa mūlu.—Mateo 6:10.

• Tala bubinga bwine bobwanya kukulupidila Yesu ne bintu byakalonga mwanda wa kupwija makambakano otwikonda nao. Tanga kishinte “Le Mulopwe wa Bulopwe bwa Leza I Ani?” ne “Le Bulopwe bwa Leza Bukalonga Bika?”