Kulwa na Milangwe ya Kwimona bu Udi Bunka na Kupwana na Balunda—Le Bible Ubwanya Kukwasha Namani?

Kulwa na milangwe ya kwimona bu udi bunka kwatūdilwe pa kifuko kibajinji mu myanda itala bukomo bwa ngitu mu 2023. Le buno bulwi bubwanya kunekenibwa?

• Dokitele Vivek Murthy wa ku mwingilo utala myanda ya bukomo bwa ngitu mu États-Unis, wanenene amba: “Milangwe ya kwimona bunka ne kwitolwela i kyaka kikatampe ku bukomo bwetu bwa ngitu ne ku nsangaji yetu.” Kupwa wabweja’ko amba: “Inoko tudi na bukomo bwa kupwija uno mwanda.” Muswelo’ka? “Na kulonga difuku ne difuku tubintu tutyetutye mwanda wa kuningija kipwano kyetu na bantu bakwabo.”a

Milangwe ya kwimona bu udi bunka keitambengapo enka ku kwitolwela. Bamo babwanya kwimona bu badi bunka, abo papo mu kibumbo kya bantu. Inoko nansha shi milangwe ya kwimona bu tudi bunka itambanga kwepi, Bible ubwanya kwitukwasha. Mu Bible mudi madingi a kamweno abwanya kwitukwasha tuningije kipwano kyetu na bakwetu ne kulwa na milangwe ya kwimona bu tudi bunka.

Misoñanya ya mu Bible ibwanya kukwasha

Wifunde kwisamba biyampe na bantu. Muno mubadilwa kulombola bakwenu milangwe yobe ne kuteja senene bakwenu. Shi ute bininge bakwenu mutyima, po pene kipwano kyenu kikaningila’ko.

• Musoñanya wa mu Bible: “Kemwakitai mutyima enka ku tumweno twa banwe bene, ino i ne ku tumweno twa bakwenu.”—Bene Fidipai 2:4.

Pwana ne na balunda bakwabo. Pwana bulunda na bantu bakukudile nansha banuke kobe, nansha na bomwishidile nabo bibidiji ne muzo.

• Musoñanya wa mu Bible: “Shitulai mityima yenu bikatampe.”—2 Bene Kodinda 6:13.

Pa kuyukila’ko bivule pa mwa kuningijija bulunda, tanga kishinte “Commet combler notre besoin d’amitié.”