Le I Bika Binena Bible pa Porno? Le Kwilangula Bilokoloko pa Entelenete I Kubi?

Bilondolola Bible

Bible katelelepo kishima porno, kwilangula bilokoloko pa Entelenete, nansha bintu pamo bwa bino. Inoko Bible ulombola patōka mumwena Leza bilongwa bikankamika kusambakena pamo panja pa busongi nansha milangwe minyengakane pa kusambakena pamo. Langulukila pa ano mavese a mu Bible:

• “Nanshi, ipayai bipindi bya ku ngitu yenu bidi pano panshi mu myanda ya busekese, disubi, bilokoloko bya busekese bya munyanji.” (Bene Kolose 3:5) Pa kyaba kya kwipaya bilokoloko bibi, kutala porno kuvudijanga’byo. Kulengejanga muntu ekale wa disubi nansha wa busala ku meso a Leza.

• “Ense utala mwana-mukaji sō enka ne byamwivwanina kilokoloko wapu kala kulonga nandi makoji mu mutyima wandi.” (Mateo 5:28) Bifwatulo bya bilongwa bya busekese biletanga milangwe mibi ikatwala muntu ku bilongwa bibi.

• “Busekese ne miswelo yonso ya disubi nansha makomwa-meso kebyakitelwa nansha kutelwa kwine umbukata mwenu.” (Bene Efisesa 5:3) Ketufwaninwepo kwisamba bintu bya disubi nansha ke mu mizaulo, kwibitala nansha ke kwibitanga kwine.

• “Mingilo ya ngitu i mimweke patōka; i busekese, disubi, . . . ne bintu bidi namino. Nabadikila kwimudyumuna bino bintu, monka monemudyumwinine kala, amba boba balongalonga bino bintu kebakapyanapo Bulopwe bwa Leza.” (Bene Ngalatea 5:19-21) Leza umonanga boba batala porno, belangula bilokoloko pa Entelenete, ku telefone, nansha kwitumina bintu bya busekese bu bantu ba disubi, bonwe mu ñeni. Shi tudi na kibidiji kya kulonga bintu bya uno muswelo, ketubwanyapo kwitabijibwa na Leza.