Mwanda Waka Batumoni ba Yehova Bakasapwilanga Bantu Bebalondolwele Kala Amba, “Kebisangajapo”?

Batumoni ba Yehova basenswe Leza ne bantu, o mwanda basapwilanga bantu bonso musapu wa mu Bible, kubadila’mo ne boba bebalondolwele dibajinji amba, “Kebisangajapo.” (Mateo 22:37-​39) Buswe botusenswe Leza bwitutononanga tukōkele musoñanya wa wandi Mwana wa “kupāna bukamoni ne pa mfulo.” (Bilongwa 10:42; 1 Yoano 5:3) Pa kulonga kino, ketusapwilangapo’tu muntu musunsa umo musapu wa Leza, enka na mwādi mwikilongela ne bapolofeto ba Leza ba pa kala. (Yelemia 25:4) Byotusenswe bakwetu, o mwanda tuloñanga bukomo bwa kusapula “myanda miyampe ya Bulopwe” ipandija būmi bwa bantu bonso, kubadila’mo ne boba kebasangedilepo musapu dibajinji.​—Mateo 24:14.

Tutananga divule bantu basangela musapu ku mobo kobapelele musapu dibajinji. Tala buno bubinga busatu:

• Bantu bavilukanga.

• Bantu bakwabo’nka mu mine njibo’ya basangelanga musapu wetu.

• Bantu bashintanga. Bikoleja bya mu ino ntanda nansha ngikadilo ibwanya kutanwa’mo muntu, bilengejanga bantu bajingulule amba “kudi byobasakilwa ku mushipiditu” ne kusangela musapu wa mu Bible. (Mateo 5:3) Enka ne boba betulwa, mutyima wabo ubwanya kushinta na mwāshintyīle wa mutumibwa Polo.​—1 Temote 1:​13.

Inoko ketuningilangapo muntu nansha umo kuteja musapu wetu. (1 Petelo 3:​15) Tukulupile amba muntu ne muntu ufwaninwe kwikwatyila butyibi mu myanda ya butōtyi.​—Kupituluka 30:19, 20.