Bene Fidipai 4:8—“Bintu Byonso bya Bine, . . . Endelelai Kufwatakanya Bino Bintu”

“Shi ke pano, banwe banabetu, bintu byonso bya bine, byonso bilēmekwa, byonso byoloke, byonso byampikwa disubi, byonso bya kusanshibwa, byonso binenenwa biyampe, byonso bya mwikadilo muyampe, ne byonso bya kutendelwa, endelelai kufwatakanya bino bintu.”—Bene Fidipai 4:8, Bwalamuni bwa Ntanda Mipya.

“Shi ke pano banwe banabetu, byobya byonso bya binebine, ne bileme, ne byoloke, ne byampikwa bubi, ne byonso bifwanyinwe kuswebwa, ne bifwanyinwe kwanwa, ne byonso biyampe, ne bifwanyinwe kutumbijibwa, bonso bino bikale mu milangwe yenu.”—Bene Fidipai 4:8, Myanda Miyampe.

Nshintulwilo ya Bene Fidipai 4:8

Leza utele mutyima ku bilanga bantu, uloñanga namino mwanda milangwe yetu idi na lupusa pa byotulonga. (Ñimbo ya Mitōto 19:14; Mako 7:20-23) O mwanda bantu basaka kusangaja Leza, bafundulanga milangwe yamona aye bu mibi ne kulangulukila pa bintu byaitabije.

Uno vese ulombola bintu biyampe bya miswelo mwānda bifwaninwe bene Kidishitu ‘kwendelela kufwatakanya,’ kushintulula ko-kunena’mba, bintu byobafwaninwe kwikala na kibidiji kya kulangulukila’po.

• “Bya bine.” Kino kishima kifunkila pa byobya byoloke ne bikulupilwa, pamo bwa myanda itanwa mu Kinenwa kya Leza, Bible.—1 Temote 6:20.

• “Bilēmekwa.” Kino kishima kifunkila pa bintu bya mvubu bininge. Ke bintupo bya bituputupu, byampikwa kusumininwa, ne byampikwa mvubu. Bintu bilēmekwa bikwashanga mwine Kidishitu asumininwe ne pa mfulo kulonga byobya byoloke.—Tetusa 2:6-8.

• “Byoloke.” Kino kishima kifunkila pa mpango ne bilongwa bikwatañene na misoñanya myoloke ya Leza, pa kyaba kya kwimanina pa tunangu twipi twa bantu.—Nkindi 3:5, 6; 14:12.

• “Byampikwa disubi.” Muno mubadilwa ne milangwe ne kukanina kwa mutyima kutōka kadi kujila, ke enkapo mu myanda ya busekese, ino i mu myanda yonso.—2 Bene Kodinda 11:3.

• “Bya kusanshibwa.” Kino kishima kifunkila pa bintu bisangaja, bikuna buswe ke mushikwapo, bululu, nansha lupotopoto.—1 Petelo 4:8.

• “Binenenwa biyampe.” Uno mulongo ufunkila pa bintu bituntwila ku kuyukana kuyukene muntu bu muntu muyampe, kadi biketabija ne boba balēmekele Leza.—Nkindi 22:1.

• “Bya mwikadilo muyampe.” Kino kishima kifunkila pa bintu biyampe mpata mu mwikadilo mwendele misoñanya ya Leza. I biyampe mu miswelo yonso.—2 Petelo 1:5, 9.

• “Bya kutendelwa.” Kino kishima kifunkila pa bintu bifwaninwe kutendelwa, nakampata ku meso a Leza. Muno mubadilwa ne bilongwa bya kutendelwa bya Leza, bine bifwaninwe bantu kulangulukila’po.—Ñimbo ya Mitōto 78:4.

Ngikadilo yālembelwe’mo Bene Fidipai 4:8

Mutumibwa Polo wādi mu njibo ya kifungo mu Loma paālembēle uno mukanda bene Kidishitu ba mu Fidipai. Bashintuludi ba Bible batelanga mukanda wandi bu “mukanda wa nsangaji” mwanda wālembele’o na bishima bya nsangaji ne na binenwa bivule bya kyanga kadi bya buswe.—Bene Fidipai 1:3, 4, 7, 8, 18; 3:1; 4:1, 4, 10.

Polo wādi usenswe banababo mu lwitabijo ba mu Fidipai, kadi wādi usaka nabo bekale na nsangaji ne ndoe na yaādi nayo. (Bene Fidipai 2:17, 18) O mwanda mu kipindi kya mfulo kya wandi mukanda, wēbakankamikile’mo bekale na nsangaji, na mutyima unekena, besumbidile Leza nyeke na kulombela kwadi, kadi bate mutyima bininge ku bintu bileta ndoe ya mutyima ne kwikala mu ndoe na Leza.—Bene Fidipai 4:4-9.

Tala ino video mīpi, umone myanda mikatampe idi mu mukanda wa Bene Fidipai.