Tusapulei Myanda Miyampe Ya Bulopwe Na Mikanda
1 I kya nsangaji pa kuyuka bubinebine ne pa kutanwa umbukata mwa basapudi bapyasakane ba myanda miyampe! Bantu bakubulwa kwikala mu bulongolodi bwa Leza badi na kyaka kya kusaka kwivwana myanda miyampe ya Bulopwe. Bubinebine butala pa Bulopwe i bulombolwe mu muswelo upēla kwivwana mu mikanda Ikalai ne bumi bwa nsangaji ya nyeke pano pa ntanda!; “Monaipo bidi! Nalonga bintu byonso ke bipya” ne Umbikalo ukatulako Paladisa. Ino mikanda ilombolanga mukekadila būmi pano pantanda munshi mwa buludiki bwa Bulopwe bwa Leza ne kadi, kupityila mu Kinenwa kya Leza, iludikilanga mutangi ku bintu byabine bikalonga buno Bulopwe. Nabubine, kushila mukanda ku muntu usepelela musapu i ditabula dibajinji. (1 Kod. 9:23) Tujokei bukidi bonka kukatala baitabije mukanda, na kitungo kya kushilula nabo kifundwa mu dibuku Buyuki Butwala ku Būmi Bwanyeke. I muswelo’ka otukokeja kwikilonga mu uno kweji 9?
2 Padi tukokeja kupāna mukanda “Ikalai ne bumi bwa nsangaji ya nyeke pano pa ntanda!” pa kupwa kunena kitwelelo kīpi. Aku tulombola kibalu, tukokeja kunena’mba:
◼ “Nsaka kukulombola kintu kimo kidi’mo musapu mulumbuluke kutabuka.” Pūtula mukanda Ikalai ne bumi bwa nsangaji kadi tanga musāngo umbajinji wa ntwelelo. Endeleja’mba: “Uno mukanda ulondololanga ne ku kino kipangujo [tanga kamutwe kamwanda kadi pangala pa kifwatulo No. 8]: ‘Le i mwanda’ka muntu ufwa?’ Ukamona’mba i kyansangaji bininge kubandaula bifwatulo ne kutanga mavese atelelwe mu uno mukanda. Shi usenswe, ukokeja kushala nao ke obe.” Shi waitabija’o, mulombole lupoto lwa panopano ne buluji bwine botulombelanga’lo.
3 I kika kyotukanena potukajoka kukamona muntu waitabije mukanda “Ikalai ne bumi bwa nsangaji”? Tukapima kino kitwelelo:
◼ Lombola kifwatulo No. 49 mu mukanda Ikalai ne bumi bwa nsangaji ne ipangula’mba: “Kino kifwatulo i kiyampe, mwene’mba i amo? [Muleke akulondolole.] Uno ye ao mukanda onakushidile ponaile musunsa wamfulo. Nsaka kukwipangula kipangujo kidi pa paje ulonda’ko.” Tanga kipangujo kya kifwatulo No. 50: “ ‘Lelo usenswe kwikala na bumi bwa nyeke mu mwine paladisa’wa’ni?’ [Muleke akulondolole.] Shi bine usenswe, nankyo teja kyofwaninwe kulonga: ‘Shi eyo, ufwaninwe kwifunda bintu bivule binena Leza pa uno mwanda.’ [Tanga Yoano 17:3.] Nsenswe kwifunda nobe Bible ku bitupu. Wipalanga namani?” Mwipei nandi kilayeno kipotoloke senene.
4 Shi tupānanga mukanda “Monaipo bidi! Nalonga bintu byonso ke bipya,” tukokeja kushilula na kutandabula kibalu ne kulombola kifwatulo kidi’po, kupwa twaipangula’mba:
◼ “Molangila, pa kusaka amba ntanda yonso ikale uno muswelo, i kika kifwaninwe kulongwa?” Muleke akulondolole. Lombola patōka tuyukeno tumo-tumo tudi pa kifwatulo kidi pa paje 3. Endeleja’mba: “Bantu bavule bafwatakanyanga’mba kekikokejikapo kwalamuna ntanda uno muswelo. Ino ku mutamba wa Leza kikokejika. [Shintulula musāngo 43; kupwa tanga Isaya 9:6, 7.] Leza i mulaye kutula’ko ntanda impya, paladisa milumbuluke mukekala bantu ba mizo yonso. Nsenswe nobe utange uno mukanda. Ukakulaija muswelo omukokeja, abe ne kyobe kisaka, kukekala na būmi bulumbuluke byamwiko bulailwe na Leza.”
5 Shi twingidija mukanda “Monaipo bidi!” mu kujokelamo kulonda’ko, tukokeja kushintulula buluji botufwaninwe kuyukila bintu bivule bitala pa Bible. Pakwabo, kifwaninwe enka kulombola monka kibalu ne kunena’mba:
◼ “Musunsa wamfulo, onakulombwele kino kifwatulo, twanene’mba, abe ne ami, tusenswe kukekala mu ntanda milumbuluke uno muswelo. Shi kepano, pa kusaka kikekale namino, kudi kintu kampanda kyotufwaninwe batwe bonso kulonga.” Pūtula mukanda “Monaipo bidi” ne tanga musāngo 52, ne Yoano 17:3. Kwatañanya ino milangwe na kimfwa kidi mu musāngo 53 kitala pa bufundiji bwa Bible bufwaninwe kupānwa, kupwa shintulula’mba batwe ba Tumoni twa Yehova tupanānga buno bufundiji ku mobo a bantu ku bitupu. Mwipangule shi ubwanya kumulombola muswelo otufundijanga bantu, na bukwashi bwa dibuku Buyuki.
6 Shi tupāna mukanda “Umbikalo ukatulako Paladisa,” tukokeja kushilula namino:
◼ “Ñimvwananga bantu bavule banena’mba tusenswe kwikala munshi mwa umbikalo ukokeja—nabubine—kupwija makambakano makatampe. [Wisambile pa makambakano adi mu kyenu kipindi, kimfwa bulofwa, kwilundila’ko kwa bupolapola nansha kwa bitomibwa bikomokomo.] Pa mwanda utala bino bintu, twiipangula muswelo ukekala būmi bwetu ne bwa bakena betu. Ulanga’mba difuku dimo kukekala umbikalo ukabwanya kupwija ano makambakano? [Muleke alondolole.] Padi nobe ulombelanga ne milombelo ya Tata Wetu. Shi i amo, lelo uyukile’mba pa kyakyo kitatyi wikalanga ulombela pamwanda wa umbikalo moloke?” Pūtula mukanda Umbikalo pa paje 3 ne tanga misāngo ibidi mibajinji. Ebiya pāna mukanda.
7 Shi twashile mukanda “Umbikalo ukatulako Paladisa,” tukashilula mīsambo mu lwendo lwa bubidi uno muswelo, amba:
◼ “Musunsa wami wamfulo, twesambile amba tufwaninwe kwikala munshi mwa umbikalo moloke ukokeja kupwija makambakano a bantu bonso. Mukanda onakushidile ulombola’mba Bulopwe bwa Leza ye lukulupilo lwetu lumo kete. Bantu bavule beipangulanga shi binebine uno umbikalo ukokeja kulongolola uno mwikadila otudi’mo. Bible ulombola’mba Kristu ke mupwe kala kuleta bukamoni bulombola’mba aye ukabwanya kulonga kyokya kikomenwe maludiki a bantu kulonga.” Pūtula mukanda Umbikalo pa paje 29 ne tanga misāngo iná yamfulo. Bweja’ko amba: “Buno bukekala būmi bulumbuluke kashaa, lelo ke amopo? Le usenswe kukekala nabo?” Muleke akulondolole. Tanga Yoano 17:3. Mukankamike ekale kwifundila’ko bivule kupityila ku kifundwa kya Bible kya ku njibo.
8 Shi upāna mikanda mikwabo, ukokeja kulondela pa misapwilo ilombwelwe kungala kitatyi kyolongolola bitwelelo byobe bya mu mīsambo. Shintulwila mwisambi nobe mu kīpi kyowamupānina mukanda ku lupoto lutyetye. Twiteakanyei senene ne kulomba Yehova madyese andi kitatyi kyonso kyotusapula myanda miyampe ya Bulopwe.