Batutu Bankasampe, Lelo Musakanga Mingilo?
1. Lelo tutu nkasampe ukashilula kwingidija bulombodi budi mu 1 Temote 3:1 kitatyi’ka?
1 “Yewa usakile kiselwa . . . , usakile mingilo ya buleme.” (1 Tem. 3:1, Bisonekwa Bitokele) Bino binenwa bya ku bukomo bwa mushipiditu bikankamika batutu babwanye bisakibwa bya kupebwa madyese a mingilo pa kipwilo. Lelo unenwe kwikala mutame pa kupebwa’o? Na bubine, i biyampe kushilula kusaka mingilo ukidi nkasampe. Mu uno muswelo, ubwanya kufundijibwa mingilo ne kulombola amba wi mufikile pa kutongwa bu mwingidi wa mingilo kitatyi kyotama. (1 Tem. 3:10) Shi wi tutu nkasampe mubatyijibwe, le ubwanya kusaka mingilo namani?
2. Le i muswelo’ka otukokeja kutamija mushipiditu wa kwipāna ne kwiumwekeja?
2 Kwipāna: Vuluka amba usakanga kwingila mwingilo mulumbuluke, ke kitentapo. O mwanda, tamija mutyima wa kukwasha batutu ne bakaka. Muswelo umo wa kulonga namino i wa kulangulukila pa kimfwa kiyampe kya Yesu. (Mat. 20:28; Yoa. 4:6, 7; 13:4, 5) Lomba Yehova akukwashe ute bakwenu mutyima. (1 Kod. 10:24) Le ubwanya kukwasha banunu nansha babilema mu kipwilo? Lelo witumanga abe mwine mu mwingilo wa kudima biyombo, kukenda bipeta bya kupampula nabyo nansha kuvuija mingilo mikwabo ya kukundula Njibo ya Bulopwe? Le ubwanya kwituma mu kunena mwisambo wa kupingakena muntu ku Masomo a Mwingilo wa Kiteokratike? Ukamona amba kwipānina bakwenu kukakuletela nsangaji.—Bil. 20:35.
3. Lelo kwikala muntu wa ku mushipiditu kudi na mvubu’ka, ne i muswelo’ka obwanya kwikala muntu wa ku mushipiditu?
3 Muntu wa ku Mushipiditu: I biyampe mwingidi mu kipwilo ekale muntu wa ku mushipiditu, pa kyaba kya kwikala na bwino ne ñeni ya kibutwila. Muntu wa ku mushipiditu uloñanga bukomo bwa kumona bintu na mwibimwena Yehova ne Yesu. (1 Kod. 2:15, 16) Umwekejanga “kipa kya mushipidutu.” (Ngat. 5:22, 23) I musapudi mupyasakane utūla tumweno twa Bulopwe bwa Leza pa kifuko kibajinji. (Mat. 6:33) Ukokeja kutamija ngikadilo ya ku mushipiditu na kwikala na kibidiji kya kulonga kifundwa kya pa kasuku. Mu kino kifundwa mubadilwa ne Kutanga Bible difuku ne difuku, kutanga nimelo ne nimelo ya Kiteba kya Mulami ne Réveillez-vous !, kuteakanya ne kutanwa ku kupwila. (Mit. 1:1, 2; Bah. 10:24, 25) Polo pa kukankamika nkasampe Temote endelele ku mushipiditu, wālembele amba: “Widyumuke . . . ne lufundijo lobe.” (1 Tem. 4:15, 16) Nanshi, longa bukomo bwa kuteakanya mwisambo obakupa ku Masomo a Mwingilo wa Kiteokratike. Witeakanye mwa kwendela mu mwingilo wa busapudi ne kutambila’mo kitatyi ne kitatyi. Witungile bitungo bya ku mushipiditu ne kufikila’po, kimfwa mwingilo wa bupania, mwingilo wa Betele nansha kwenda ku Masomo a Bible a Bankungulume. Kipwano kyobe na Leza kikakukwasha unyeme “bya kilokoloko kya bunkasampe.”—2 Tem. 2:22.
4. Lelo kikōkeji ne kukulupilwa bidi na mvubu’ka?
4 Kukulupilwa ne Kikōkeji: Batumibwa kebādipo bazumbija mutyima pa mwādi mwa kwingidilwa mwingilo wa kwabanya bidibwa ku bene Kidishitu ba mu myaka katwa kabajinji bādi basakilwa bukwashi, mwanda Bana-balume bāpelwe uno mwingilo bādi “balumbuluke,” bayukilwe na bubine bu bantu bakulupilwa kadi ba kikōkeji. Kino kyēbakweshe bate mutyima ku bintu bikwabo bya mvubu mpata. (Bil. 6:1-4) O mwanda, shi abakupe mwingilo mu kipwilo, vuija’o ne bukomo bobe bonso. Iula Noa, wālondele na katentekeji bulombodi bwāmupelwe pa kubaka safini. (Ngal. 6:22) Kikōkeji kidi na mvubu ku meso a Yehova, kadi kilombola’mba wi mutame ku mushipiditu.—1 Kod. 4:2; tala kapango kanena’mba “Byabuyabuya Bidi mu Kufundija Mingilo.”
5. Mwanda waka batutu bankasampe bafwaninwe kusaka mingilo?
5 Monka mokyālailwe, Yehova upēlakanyanga mu kukongakanya bantu. (Is. 60:22) Kudi mwayene wa bantu elefu tutwa tubidi ne makumi atano babatyijibwanga mwaka ne mwaka. Pa mwanda wa bano bapya bavule baya mu bubinebine, kusakilwa bana-balume babwenye bisakibwa bya ku mushipiditu bakusela biselwa pa kipwilo. Pano po pene pavudila’ko bya kulonga mu mwingilo wa Yehova. (1 Kod. 15:58) Batutu bankasampe, lelo musakanga mingilo? Shi i amo, i mwingilo muyampe omusaka!
[Bushintuludi pa paje 2]
Pa mwanda wa bano bapya bavule baya mu bubinebine, kusakilwa bana-balume babwenye bisakibwa bya ku mushipiditu bakusela biselwa pa kipwilo
[Kapango pa paje 3]
Byabuyabuya Bidi mu Kufundija Mingilo
Batutu bankasampe babwenye bisakibwa bamwenanga’mo kitatyi kibapa bakulumpe mingilo ne kwibafundija. Mutadi wa kipindi ushikete ku lukala ukankamika musapudi pa kupwa kwa kupwila. Wamone nkasampe umo wimene kubwipi, kupwa wamwipangula shi ukimbanga kwisamba nandi. Tutu nkasampe wamulondolola’mba, i mupebwe mwingilo wa kutalula bintu ku lukala pa kupwa kwa kupwila ko-konso. Bambutwile bandi bādi ke beteakanye kwenda, inoko aye kasakilepo kwenda kumeso kwa kuvuija mwingilo wandi. Mutadi wa kipindi wataluka na nsangaji. Unena amba: “Bakulumpe ba mu kino kipwilo bādi batele mutyima ku kufundija batutu bankasampe babwenye bisakibwa na kwibapa mingilo pa kipwilo. Mfulo mfulō, bapēlelwe kuyukanya batutu bankasampe bu bengidi ba mingilo kitatyi kyonāpempwile kipwilo.”