Myanda ya Kunyemena’ko ya Kabuku ka ku Kupwila Būmi ne Mwingilo
© 2023 Watch Tower Bible and Tract Society of Pennsylvania
4-10 KWEJI 3
BYABULĒME BYA MU KINENWA KYA LEZA | ÑIMBO YA MITŌTO 16-17
“Yehova, Nsulo Yami ya Buyampe”
A Bankasampe, Mubwanya Kwikala na Būmi bwa Nsangaji
PWANA NA BALUNDA BA BINE
11 Tanga Ñimbo ya Mitōto 16:3. Davida wādi uyukile mwa kusokwela balunda bayampe. Wādi utonga balunda basenswe Yehova, kadi kino kyāmuletele “kuloelelwa kukatampe.” Wāityile balunda nandi bu “bajila” mwanda bādi balonga bukomo bwa kulonda misoñanya ya Yehova ya mu mwikadilo. Mulembi mukwabo wa mitōto nandi wēivwene uno muswelo pa mwanda utala kutonga balunda, wālemba’mba: “Ami ne mulunda wa boba bonso bakutyina ne boba balama misoñanya yobe.” (Ñimbo ya Mitōto 119:63) Monka motwesambile’kyo mu kishinte kibadikile, nobe ubwanya kusokola balunda bayampe bavule mu bantu basenswe Yehova ne kumukōkela. Kadi na bubine, kufwaninwepo kupwana’nka na bantu ba yobe myaka.
“Mandila Buya bwa Yehova”
Davida wāimbile’mba, “Yehova i kingabile kya bupyane kyami ne kya kitomeno kyami . . . Bingabile byami bibamponena palumbuluke payampe; eyo, eyo, ngidi ne bupyane bulumbuluke.” (Ñim. 16:5, 6) Davida wāfwijije’ko pa mwanda wa ‘kyobāmwabile,’ ko kunena’mba, kwitabijibwa kupwana na Yehova ne dyese dya kumwingidila. Pamo bwa Davida, tubwanya kususuka, ino tudi na madyese mavule a ku mushipiditu! Nanshi twendelelei kuloelelwa mu mutōtelo wa bine ne ‘kulanga’ nyeke pa tempelo ya ku mushipiditu ya Yehova.
Tutūlei Yehova Kumeso Etu Nyeke
2 Batwe bonso tukokeja kuboila ñeni mivule ku būmi bwa bantu bayukene ba mu Bible—Abalahama, Sala, Mosesa, Luta, Davida, Eseta, mutumibwa Polo ne bakwabo. Inoko, tubwanya kadi kumwena mu nsekununi itala bantu bampikwa ntumbo. Kulanguluka pa manga ya mu Bible kuketukwasha tulonde byānenene mulembi wa mitōto amba: “Ntūdile Yehova ku meso ami nyeke; ke-muntu aye udi kulundyo kwami nkikajinapo mhm.” (Mit. 16:8) Lelo bino binenwa bishintulula namani?
3 Mushidika wādi wingidija divule kipete kyandi na kuboko kwa lundyo, uleka bukila bwa lundyo bwambulwa kukingwa na ngabo yakwete ku lunkuso. Nansha nabya, wādi ukingwa shi mulunda nandi ulwila pabwipi nandi ku lundyo. Shi tulamine Yehova mu ñeni yetu ne kulonga kiswa-mutyima kyandi, uketukiñanga. Shi ke pano tutalei muswelo ubwanya kukankamikwa lwitabijo lwetu na bubandaudi bwa nsekununi ya mu Bible pa kusaka’mba “tutūle Yehova kumeso [etu] nyeke.”
Byabupeta bya ku Mushipiditu
it-2-F p. 697
Nkishi wa mu Diso
Shi kishima kya Kihebelu ʼi·shohnʹ (Kup 32:10; Nki 7:2), i kingidijibwe pamo na ʽaʹyin (diso), kishintulula kishima pa kishima “mwana mwana-mulume wa diso.” Mo monka ne kishima, bath (mwana mwana-mukaji) i kingidijibwe mu Madilo 2:18 na mulangwe wa “mwana mwana-mukaji wa diso,” byonso bibidi bifunkila pa nkishi wa mu diso. Mu Ñimbo ya Mitōto 17:8 bino bishima byonso bibidi (ʼi·shohnʹ bath-ʽaʹyin), i bingidijibwe pamo mwanda wa kutyityija, byalamunwa kishima pa kishima amba “mwana mwana-mulume, mwana mwana-mukaji wa diso” (“nkishi wa mu diso”). Nanshi pano bakimba kwisambila pa muswelo ubwanya kwimona muntu mu nkishi wa mu diso dya muntu mukwabo.
Diso i kintu kyampikwa bukomo kadi kilomba kuta mutyima bininge; shi mutwele kalunywene nansha kamusenga, usa kuyuka bukidi bonka amba kudi kyatwela’mo. Kipindi kya mu diso kifīta mwine mutanwa nkishi, kinenwe kutebwa mutyima bininge. Mwanda shi witape’mo nansha bityetye pampikwa kusaka, nansha kadi shi kyoneke pa mwanda wa misongo, kino kibwanya kulengeja diso dileke kumona biyampe nansha kuleka lonso kumona. Bible wingidijanga bishima “nkishi wa mu diso dyobe” mwanda wa kwisambila pa bintu byotufwaninwe kuta mutyima bininge. Ne bijila bya Leza nabyo mo monka. (Nki 7:2) Kupituluka mu Bijila 32:10 wisambila pa muswelo wādi utele Leza mutyima muzo wa Isalela, enka na mutelanga shabana bandi bana mutyima, na kunena’mba, wādi ulama uno muzo pamo bwa “nkishi wa mu diso dyandi.” Davida wālombele Yehova amukinge ne kumukwatakanya pamo bwa “nkishi wa mu diso.” (Ñi 17:8) Wālombele namino mwanda wādi usaka Yehova amukinge bukidi bonka shi watambwe na balwana nandi. (Dingakanya na Zekadia 2:8; mwine mwingidijibwe kishima kya Kihebelu ba·vathʹ ʽaʹyin, “diso.”)—Tala ŒIL.
11-17 KWEJI 3
BYABULĒME BYA MU KINENWA KYA LEZA | ÑIMBO YA MITŌTO 18
“Yehova I . . . Aye Unkūlanga”
w09-F 1/5 p. 14 mus. 4-5
Nsangaji ya Yehova I Kifuko Kyetu Kikomejibwe
Ne kadi Bible udingakanya Yehova na bintu bya kubulwa būmi. I mutelwe bu “Dibwe dya Isalela,” bu “kidibwe,” ne bu ‘kifuko kikomejibwe.’ (2 Samwele 23:3; Ñimbo ya Mitōto 18:2; Kupituluka mu Bijila 32:4) Le i kukwatañana’ka kudi’po? Enka na mwikadilanga mushikatyije senene dibwe dikatampe, dikomo kushetula, Yehova Leza i Nsulo mikomo ya bulami bobe.
5 Mu mukanda wa Ñimbo ya Mitōto mudi bishima bivule bya kyelekejo, bilombola ngikadila mishileshile ya Yehova. Kimfwa, Ñimbo ya Mitōto 84:11 īsambila padi Yehova amba i “dyuba ne ngabo,” mwanda i Nsulo ya kitōkeji, būmi, bukomo, ne bulami. Ku mutamba mukwabo, Ñimbo ya Mitōto 121:5 inena’mba, “Yehova i mwemba ku kuboko kobe kwa lundyo.” Monka mukingilanga mwemba ku dyuba ditēma bininge, Yehova ukiñanga boba bamwingidila ku tusua tukatampe, na kwibalama mu mwemba wa “kuboko” kwandi nansha wa mapapa andi.”—Isaya 51:16; Ñimbo ya Mitōto 17:8; 36:7.
it-2-F p. 1168 mus. 6
Diwi
Leza wivwananga diwi dya bengidi bandi. Boba bamwingidila na mushipiditu ne bubine, babwanya kumwita na kikulupiji mwanda wivwananga diwi dyabo, pa kubulwa kubanga ludimi lobamwita’mo. Ne kadi, nansha shi tubamulombe mu mutyima pampikwa kwingidija diwi, Leza mwine uyukile mityima ya bantu, “wivwananga” ne kwibata mutyima. (Ñi 66:19; 86:6; 116:1; 1Sa 1:13; Neh 2:4) Leza wivwananga boba badi mu masusu pobamudidila ebakwashe, kadi wivwananga mawi a boba bamulwa ne bakutyila bengidi bandi nkuku mibi, kadi uyukile kukanina kwabo kwa mutyima.—Ngo 21:17; Ñi 55:18, 19; 69:33; 94:9-11; Yel 23:25.
Muswelo Obwanya Kūminina Kitatyi Kyozumbija Mutyima
2. Languluka. Kitatyi kyolangulukila pa byakutene mu būmi, le ubwanya kuvuluka makambakano owabwenye kūminina pa mwanda’tu wa bukwashi bwa Yehova? Shi tulangulukila pa muswelo wetukweshe Yehova, ne waākweshe bantu bandi ba pa kala, twikalanga monka na bukomo ne kumukulupila bininge. (Ñim. 18:17-19) Mukulumpe umo witwa bu Joshua unena’mba, “ne mulembe milombelo yami yonso ke milondololwe. Kino kinkwashanga mvuluke kitatyi kyonalombele Yehova kintu kampanda, waumpa enka byonadi nsakilwa.” Bine, shi tulangulukila pa bintu bitulongēle kala Yehova, twikalanga monka na bukomo bwa kulwa na kuzumbija mutyima.
Byabupeta bya ku Mushipiditu
it-1-F p. 437 mus. 2
Kelubi
Bamo balañanga’mba byādi byelekejo bitulumukwa bya bankishi bapungwe na mapapa byādi bitōtwa na mizo yādi ibajokolokele ya bantu kebādipo batōta Leza, ino ke amopo. Bishi bya Bayuda bibingija (Bible kanenene’popo kintu) amba bano bakelubi bādi na bupunga bwa bantu. Byādi bipungwa bipungwe senene byelekeja bamwikeulu ba buya bwa dyangi bine byāpungilwe mungya “kimfwa kya kulondela’po” kyobālombwele Mosesa kudi Yehova mwine. (Div 25:9) Mutumibwa Polo wibatela bu “bakelubi ba ntumbo bapūtyile pa mpūto ya kupwanija. (Bah 9:5) Bano bakelubi bādi belekeja kwikala’po kwa Yehova: “E ponkelombwela kodi ne kwisamba nobe pa mpūto, pa bukata bwa bakelubi babidi badi pa sanduku wa Bukamoni.” (Div 25:22; Umb 7:89) Nanshi Yehova i mutelwe bu “ushikete . . . peulu pa [nansha’mba pa bukata bwa] bakelubi.” (1Sa 4:4; 2Sa 6:2; 2Ba 19:15; 1Bi 13:6; Ñi 80:1; 99:1; Isa 37:16) Bakelubi bāingidijibwe bu “kyelekejo kya dikalo dya Yehova” dyaādi ukandile’po (1Bi 28:18), kadi mapapa a bakelubi ādi elekeja bulami ne lwendo lwa bukidibukidi. O mwanda Davida mu lwimbo lwandi lwa kusāsula, wēsambīle pa muswelo wāpēlakene Yehova mwanda wa kwiya kumukwasha, pamo bwa aye “wakandile pa kelubi kaiya wipapa,” ne amba “watūkila pa mapapa a mushipiditu.”—2Sa 22:11; Ñi 18:10.
18-24 KWEJI 3
BYABULĒME BYA MU KINENWA KYA LEZA | ÑIMBO YA MITŌTO 19-21
“Madiulu Asapulanga Ntumbo ya Leza”
Banwe Bonso Elai Lubila lwa Ntumbo ya Yehova
DAVIDA, mwanā Yese, i mukumbi wātamīne kubwipi na Betelema. Bine, kādipo ubulwa kwela meso divule mūlu mwitoyole ñenyenye kitatyi kyaādi wikala pamo bufuku pa kulama ñombe ya shandi mu oa madyo a mikōko metolwele! Na bubine, bino bintu byāmutengele, wāvuluka’byo pa kutambula mushipiditu sandu wa Leza kabunda ne kwimba lwimbo lwa binenwa bilumbuluke bya mu Mutōto wa 19, amba: “Madiulu ēlanga lubila lwa ntumbo ya Leza; kadi diulu nadyo dilombolanga mīngilo ya makasa andi. Mushīko wabyo ubasambakana ntanda yonso, kadi ne binenwa byabyo ku mfulo ya panopantanda.”—Mitōto 19:1, 4.
2 Pampikwa mīsambo, pampikwa muneneno, pampikwa diwi, madiulu alenga moyo āpangile Yehova elanga lubila lwa ntumbo yandi, mobukila ne mobwidila. Bupangi kebulekangapo kwela lubila lwa ntumbo ya Leza, kadi i kintu kya kwanwa mpata pa kumona buno bukamoni bwa mu kitalala bwenda “ntanda yonso” mwa kumwenwa’bo na bantu bonso badi’po. Inoko, bukamoni bwa mu kitalala bwa bupangi kebubwenepo. Bantu ba kikōkeji bakankamikwanga kulunga’ko mawi abo. Mulembi wa mitōto umo kayukene wānene batōtyi ba kikōkeji bino binenwa bya ku bukomo bwa mushipiditu amba: “Panai kudi Yehova ntumbo ne bukomo. Panai kudi Yehova ntumbo mifwaninwe dijina dyandi.” (Mitōto 96:7, 8) Boba badi na kipwano kya mpwaninine na Yehova badi na nsangaji ya kwitaba ku luno lwito. Ino kupa Leza ntumbo kulomba bika ne bika?
Bupangi Bwelanga Lubila lwa Ntumbo ya Leza!
8 Kupwa Davida ushintulula bya kwanwa bikwabo bya bupangi bwa Yehova amba: “Monka [mu madiulu] e mwābīkile dipema dya dyuba. Dyo didi bwa musoñañani pa kutamba munjibo mwandi, kasepelela bwa muntu mukomo unyemena pāmutūngilwe kitūngo. Kutamba kwadyo i ku mfulo ya diulu, ne ko dijokolokela nako i kumfulo kwadyo. Kekudipo, nansha kimo, kifyeme ku kyanga kyadyo, mhm.”—Mitōto 19:4-6.
9 Dyuba, shi twididingakanye na ñenyenye mikwabo, didi’tu na bukata bwenzankane. Ino lo luñenyenye lwa kutendelwa, lumwekeja imbuo ijokoloka ku alo bu mityetye mpata. Dibuku dimo dinena amba didi na bukata bwa “mantoni midiyala ya midiyala midiyala ibidi.”—i bipindi 99,9 pa katwa bya bukata bonso bwa imbuo ijokoloka ku dyuba! Bukomo bwadyo bwa kukokela bintu kodidi bo bukwasha ntanda ijokoloke nyeke ku bula bwa makilometele midiyo 150 pambulwa kusonsoloka nansha kufwena’ko. Enka kapindi kamo ka midiyala ibidi ya bukomo bwa dyuba ko kafika pano panshi, ino i kabwane mwanda wa kwikadija’po būmi.
10 Mulembi wa Mitōto wisambila pa dyuba mu muneneno wa kyelekejo, widitela bu “muntu mukomo” unyema tamba ku kālaba kutūla ne ku kālaba kakwabo mu difuku dimo ne kufyama bufuku mu “dipema” dyandi. Patokenanga dyuba, luñenyenye lukomo, ku kālaba, shi muntu utadila’dyo pano panshi, dimwekanga pamo bwa adyo ditwela kukalāla mu “dipema.” Lubanga, shi kedilupuka, dyasanga mikejima ulanga amba i “musoñañani pa kutamba munjibo mwandi.” Davida wādi mukumbi, kādipo widilwe mashika ekalanga’ko bufuku. (Ngalwilo 31:40) O mwanda wavulukile misanya ya dyuba moyādi imukabijija lubilo ne kifuko kyonso kyādi kimujokolokele. Na bubine, dyuba kedyādipo dikōka “lwendo” lwadyo lwa kutamba kutunduka kukapona kushika, ino didi pamo’nka bwa “muntu mukomo” utengele kwenda monka lwandi lwendo.
g95-F 8/11 p. 7 mus. 2
Sendwe Musūlwe mu Basendwe
Shi tutamije mutyima wa kufwija’ko pa buya bwa dyangi budi mu bupangi, nabya tukayuka biyampe Umpangi wetu, mwine wāingīle bininge pa kupanga bintu byonso bitujokolokele. Difuku dimo Yesu wālombwele bandi bana ba bwanga babandile na katentekeji maluba a mu ntanda ādi amena mu Ngadilea. Wānenene amba, “Boilai ñeni ku maluba a mu ntanda moataminanga; keaputumangapo na mingilo, nansha kujinga kwine mpika; ino nemulombola’mba nansha ke Solomone mwine mu ntumbo yandi yonso kāvwelepo bya kufwaninwa pamo na diluba dimo dya mu ao.” (Mateo 6:28, 29) Buya bwa ano maluba a mvubu mityetye, bwituvuluja amba Yehova utele mutyima ku bisakibwa bya bisaka bya bantu.
Byabupeta bya ku Mushipiditu
it-1-F p. 1093
Kihebelu, II
Kadi kudi ne mulembelo wa kudingakanya witwa bu synthétique (nansha bu formel, ne bu constructif). Mu uno muswelo wa bilembwa, kipindi kya bubidi kya musemwa kekipitulukangapo’tu enka mu kipindi kibajinji kya musemwa’wa nansha kuleta mulangwe mwishile nao. Ino akyo kyendelejanga mulangwe mubajinji, kadi kyabweja’ko ne mulangwe mukwabo. Kimfwa kya bino bilembwa bya kusāsula kitanwa mu Ñimbo ya Mitōto 19:7-9, mwine mutangwa amba:
Bijila bya Yehova i bibwaninine,
byalujanga bukomo.
Kivulujo kya Yehova i kikulupilwa,
kyalamunanga wampikwa bwino ke wa tunangu.
Misoñanya ya Yehova i myoloke,
isangajanga mutyima;
Mbila ya Yehova i itōka,
ilengejanga meso eñenye.
Kutyina Yehova kudi tō,
kulādilanga nyeke.
Butyibi bwa Yehova i bwa bine;
abo bonso i boloke.
Monka mowamwena, kipindi kya bubidi kya musemwa kifudidijanga mulangwe’wa; bipindi byonso bilupwilanga mulangwe patōka, ko kunena’mba kituntulu kilupuka‘ko. Kimfwa, kipindi kya bubidi kinena’mba “byalujanga bukomo,” kyo kikwasha mutangi amone mwikadile ‘bijila bya Yehova bu bibwaninine.’ Kipindi “kyalamunanga wampikwa bwino ke wa tunangu” nakyo, kyo kikwasha mutangi ayuke mwikadile ‘kivulujo kya Yehova bu kikulupilwa.’ Kipindi kibanji ne kya bubidi mu mulembelo wa kudingakanya wa synthétique, i byabanibwe pabidi mwanda wa kwikale kwitūkija bityetye kwilonde senene. Nanshi pano padi mubundilo mwiifwane, mwanda milangwe i milonde senene, kadi milongo i milame bupunga bumo bwa bilembwa bya kusāsula. I pa buno bubinga pobetyilanga bino binenwa bya kusāsula bu formel nansha bu constructif.
25-31 KWEJI 3
BYABULĒME BYA MU KINENWA KYA LEZA | ÑIMBO YA MITŌTO 22
Myanda Yālailwe Itala Lufu lwa Yesu
Bāmwene Meshiasa!
16 Meshiasa wādi wa kumonwa amba waelwa na Leza. (Tanga Mitōto 22:1.) Kukwatañana na bupolofeto, “pa sā ya kitema [3:00 ya kyolwa] Yesu waningija diwi dikatampe amba: Eloi! Eloi! lama sabakatani? kushintulula ko kunena’mba: Abe Leza wami! Abe Leza wami! Le bika byo wangelela?” (Mako 15:34) Yesu kājimijepo lwitabijo mudi Shandi wa mūlu. Leza wālekele Yesu ku balwana nandi na kuleka kumukinga mwanda wa kunena amba bululame bwa Yesu butompibwe ne pa mfulo. Pa kuningija diwi na mwaālongele, Yesu wāfikidije Mitōto 22:1.
Bāmwene Meshiasa!
13 Davida wālaile mu bupolofeto amba Meshiasa ukapunikwa. (Tanga Mitōto 22:7, 8.) Yesu wāpunikilwe kitatyi kyaādi ku mutyi wa masusu, mwanda Mateo unena amba: “Ne bapityeshinda bapita nabo ke bamutuke bapuka ne mitwe yabo amba: Abe wadi ukanina’mba: Nkalundula njibo ya Leza nkeīshimike mu mafuku asatu, ino wipandijepo abe mwine, tumone shi udi aye Mwanā Leza; tūkako ku [mutyi wa masusu].” Mo monka ne bapidishitu bakatampe, ne basonekeji, ne bakulumpe ke bamubenge kibengo amba: “Wadi upandijako bangi kuyūka kwipandijako aye mwine mpika. Shi i mulopwe wa bene Isalela atūke pano ku [mutyi], tumwitabije. Wadi ukulupile Leza: amupandijepo ino shi umuswele; mwanda aye’mba: Ami ne Mwanā Leza.” (Mat. 27:39-43) Nansha nankyo Yesu wāūminine bino byonso na bulēmantu. Bine kino i kimfwa kilumbuluke kotudi!
Bāmwene Meshiasa!
14 Bivwalwa bya Meshiasa byādi bya kutebwa bubale. Mulembi wa mitōto wāsonekele amba: “Ke beabila bivwalwa byami abo bene na bene, ne mutwelo wami abēuté bubale.” (Mit. 22:18) Bino byo byālongekele, mwanda “[bashidika Bene Loma] bamwipaīdila [Yesu ku mutyi] ke bēabila mitwelo yandi ne” bubale.—Mat. 27:35; tanga Yoano 19:23, 24.
Byabupeta bya ku Mushipiditu
Kulombwela Bulēme ku Kubungakana Kwetu
7 Kudi miswelo mipotoloke yotukokeja kulombwela’mo bulēme ku kubungakana kwetu. Muswelo umo bidi i kutanwa’ko pembwa ñimbo ya Bulopwe. Ñimbo mivule idi na binenwa bya lulombelo, o mwanda nanshi ifwaninwe kwimbwa na bulēme. Mutumibwa Polo pa kutela Mitōto 22, wāsonekele binenwa bya Yesu amba: “Nkasapulanga dijina dyobe ku bāna betu, umbukata mwa kipwilo nkakwimbila.” (Bahebelu 2:12) Nanshi tufwaninwe kwikala na kibidiji kya kushikata kala pa bishikato kumeso kwa mwimaniji kushilula kwimbija mwa kwimbila pamo ne kwimvwanija buluji bwa bishima byotwimba. I biyampe mwimbilo wetu wikale na malango na ādi na mulembi wa mitōto wāimbile amba: “Nkamufwijako Yehova ne mutyima wami onso, mu kidye kya boloke, ne mu kipwilo.” (Mitōto 111:1) Eyo, kwimbila Yehova mitendelo i buluji buyampe botufwaninwe kufikila ku kupwila kumeso kwa kitatyi ne kulonda mpangiko kufikija’nka ne ku mfulo.
w03-F 1/9 p. 20 mus. 1
Tendela Yehova “Mubukata mwa Kipwilo”
Dyalelo, pamo bwa mu mafuku a kala, umo ne umo mu betabije udi na mikenga ya kulombola’mo lwitabijo “mubukata mwa kipwilo.” Mukenga umo bidi udi na bonso i wa kuleta malondololo ku bipangujo bipangulwa bevwaniki ku kupwila kwa pa kipwilo. Kemwakatyepekai nansha dimo bukomo budi na malondololo enu. Kimfwa, malondololo alombola muswelo wa kupwija nansha kwepuka myanda, akwashanga banabetu basumininwe kulonda misoñanya ya mu Bible. Malondololo ku bisonekwa bine kebitangilwepo mu musango, nansha ku mulangwe owasokwele mu butangi bobe, abwanya kukankamika bakwabo batamije bibidiji biyampe bya kwifunda.
1-7 KWEJI 4
BYABULĒME BYA MU KINENWA KYA LEZA | ÑIMBO YA MITŌTO 23-25
“Yehova I Mukumbi Wami”
“Yehova I Mukumbi Wami”
Yehova wendejanga mikōko yandi. Mikōko yampikwa mukumbi ibwanya kujimina. Netu mo monka, tusakilwa bukwashi pa kusaka kusokola dishinda dya būmi. (Yelemia 10:23) Davida ushintulula amba Yehova uludikilanga bantu bandi ku “madyo a lumenya” ne ku “mema atalala, nyā.” Wibalombolanga “mu mashinda malumbuluke.” (Vese 2, 3) Kino kyelekejo kya bukumbi kitutonona tukulupile Leza. Shi tulonde bwendeji bwa mushipiditu wandi bulombwelwe mu Bible, nabya, tukalondalonda dishinda dya būmi ditupa kuloelelwa, mutyima mutūke ne mutyima-ntenke.
“Yehova I Mukumbi Wami”
Yehova ulamanga mikōko yandi. Shi mukumbi kadipo’po, mikōko imvwananga moyo ne kubulwa bukwashi. Yehova ulombolanga bantu bandi amba kebadipo ne kyobakwatyilwa moyo nansha shi bapityile “mu kipakasa kya mujiñininya wa lufu”—kitatyi kimweka bu kya mfindi mikatampe mu būmi. (Vese 4) Yehova wibatalanga, ne udi pabwipi mwanda wa kwibakwasha. Ubwanya kupa batōtyi bandi tunangu ne bukomo bobasakilwa mwa kulwila na matompo.—Fidipai 4:13; Yakoba 1:2-5.
“Yehova I Mukumbi Wami”
Yehova udishanga mikōko yandi. Mikōko italanga enka kudi mukumbi wayo mwanda wa kusokola kakudya. Netu tusakilwa bidibwa bya ku mushipiditu byotubwanya kupebwa enka na bukwashi bwa Leza. (Mateo 5:3) Dyese, Yehova Mwine upāna na buntu, i mutūdile’ko bantu bandi mesa a bidibwa binune. (Vese 5) Bible ne mabuku esambila pa Bible, kimfwa uno julunale otanga’u, i nsulo ya bidibwa bya ku mushipiditu bipwa nzala yetu ya kuyuka kyotwikadile’ko ne mpango ya Leza kotudi.
Byabupeta bya ku Mushipiditu
Sanswa Boloke ne Mutyima Obe Onso
YEHOVA uludikanga bantu bandi mu “mashinda [moloke]” kupityila ku Kinenwa ne mushipiditu sandu wandi. (Mit. 23:3) Inoko, byotudi bakubulwa kubwaninina, mutyima usakanga kusāsuka mu ano mashinda. Bilomba kulonga bukomo pa kujokela mu bilongwa byoloke. I kika kiketukwasha tufikile’po? Tufwaninwe kusanswa kulonga byoloke pamo bwa Yesu.—Tanga Mitōto 45:7.
2 Lelo “mashinda [moloke]” mene i bika? Ano “mashinda” ayukananga mungya misoñanya ya Yehova ya boloke. Mu Kihebelu ne mu Kingidiki, “boloke” i kulamata pototo ku misoñanya ya mu mwikadila. Yehova byadi “kīkalo kya boloke,” batōtyi bandi basangelanga kweyamina kwadi pa kuyuka mashinda moloke a mu mwikadila obafwaninwe kulonda.—Yel. 50:7.
3 Shi twielela’ko ne mutyima wetu onso kulonda misoñanya myoloke ya Leza, nabya tukamusangaja ne pa mfulo. (Kup. 32:4) Kino kishilulanga na kwifunda byonso byotubwanya bitala padi Yehova Leza mu Kinenwa kyandi, Bible. Potwenda tuyukila’ko bivule bitala padi, tufwena kwadi difuku ne difuku, po pene tukasanswa boloke bwandi. (Yak. 4:8) Kadi tufwaninwe kwitabija buludiki bwa mu Kinenwa kya Leza kya ku bukomo bwa mushipiditu, shi ketukwata butyibi bukatampe umbūmi.
8-14 KWEJI 4
BYABULĒME BYA MU KINENWA KYA LEZA | ÑIMBO YA MITŌTO 26-28
Muswelo Wākomeje Davida Bululame Bwandi
Nangilai mu Dishinda dya Bululame
8 Davida wālombele amba: “Mandaule, abe [Yehova], ntompe, picizya ku mudilo yami mfyo ne wami mukunka.” (Mitōto 26:2, BB) Mfyo ikalanga palampe munda mwa umbidi. Mu muneneno wa kyelekejo, mfyo i milangwe ne mīdimuko ya mushike ya muntu. Mukunka nansha mutyima wa kyelekejo nao i muntu yense mutuntulu wa munda—kukanina, malango, ne lūku lwandi. Nanshi Davida pa kulomba Yehova amubandaule, wālombele amba bamusantaule ne kumukonkotola milangwe yandi ya munda ne malango andi.
9 Davida wāabije amba mfyo yandi ne mukunka wandi bipityijibwe mu mudilo. Le Yehova wādi wa kupityija mu mudilo nansha kutōkeja namani muntu wa munda? Davida wāimbile amba: “Nkatōtanga Yehova, wampele ñeni; eyo, mfyo yami īmfundijanga mu bīlo bya bufuku.” (Mitōto 16:7) Le wādi usaka kunena namani? Ko kunena’mba madingi a Leza ādi atwela’nka ne mu nkulwe ya munda mwa Davida ne kwikala monka, mwanda wa kulemununa milangwe ne mīdimuko yandi. Ye mokikekadila ne kotudi shi tusangela na kufwija’ko pangala pa madingi otutambula kupityila ku Kinenwa kya Leza, bantunguluji bandi, ne bulongolodi bwandi, koku twialeka ekale kijabanda munda mwetu. Bine, kulombela nyeke Yehova etupityije netu mu mudilo mu uno muswelo kuketukwasha tunangile mu bululame.
Nangilai mu Dishinda dya Bululame
12 Davida wēsambile pa kintu kikwabo kyāningije bululame bwandi amba: “Nkishiketepo ne bantu ba bitubitupu, mhm, nansha kukēkala na banzazangi. Nshikilwe kipwilo kya balonga bibibibi, kadi nkikashikatangapo ne babi, mhm.” (Mitōto 26:4, 5) Na bubine Davida kādipo ushikata na babi. Wādi ushikilwe kisense kityani.
13 Le batwe netu? Lelo tupelanga kushikata na bantu ba bituputupu, shi ku televijo, ku mavideo, ku masinema, ku Entelenete, nansha ku bintu bikwabo? Lelo tunyemanga banzazangi bafya byobadi? Bamo ku masomo nansha ku kaji bakokeja kupwana netu bya bubela mwanda wa kwitudimba. Le bine tudi na mutyima wa kuloeja bulunda na boba bapelele kunangila mu bubinebine bwa Leza? Nansha batupondo byobetela amba i ba binebine, bafile milangwe yabo ya kwitubombola tuleke kwingidila Yehova. Le shi kudi bene Kidishitu bamo badi kulu mu bya Leza kulu mu bya ntanda le? Nabo i banzazangi bafya byobadi. Jayson, mwingidi wa mingilo dyalelo, wādi na balunda ba uno muswelo paakidi nkasampe. Wibavuluka’mba: “Dyuba dimo, umo waunena’mba: ‘Kepadipo mwanda nansha shi tulonge bika dyalelo, mwanda shi ngikadilo impya ibaiya tukafwa’tu kwapwa. Ketukayukapo amba kudi kyotubudilwe.’ Mineneno ya uno muswelo yanengeje ngikale mudyumuke. Mwanda nkyadipo nsaka kufwa shi ngikadilo impya ya bintu ibaiya.” Bine, Jayson wātyibile kipwano na bantu ba uno muswelo. “Kemukyongolwai,” ye Polo udyumuna, “kwinangila kubi kuboleja miswelo milumbuluke.” (1 Kodinda 15:33) Bine, i kipite buya twepuke kisense kityani!
Nangilai mu Dishinda dya Bululame
17 Tabenakulo ne madabahu ayo a bitapwa kyo kyādi kité kya mutōtelo wa Yehova mu Isalela. Davida wālombwele kuloelelwa kwaādi uloelelwe kino kifuko pa kulombela’mba: “Abe Yehova, nswele mwikadilo wa munjibo mobe, ne pantu pēkele ntumbo yobe.”—Mitōto 26:8.
18 Lelo netu tuswele kwitana pa kifuko potufundila myanda itala Yehova? Njibo ya Bulopwe yo-yonso, ne mpangiko ya bufundiji bwa ku mushipiditu bupānwa’mo, kyo kité kya mutōtelo wa bine mu kibundi. Kadi ku mwaka ne mwaka tudi na bitango, kubungakana kwa kipindi ne kubungakana kwa pa bula kwa difuku dimo. Ku kuno kupwila tutambulanga’ko “byabukamoni” nansha bivulujo bya Yehova. Shi twifunde ‘kuswa’byo nakampata,’ nankyo tukekala na kyumwa kya kutanwa ku kuno kupwila ne kuteja’ko na katentekeji. (Mitōto 119:167) Bine, kwitana na banabetu betabije betutele mutyima, betukwasha twende nyeke mu dishinda dya bululame i kintu kitūkija’po mutyima kashā!—Bahebelu 10:24, 25.
Byabupeta bya ku Mushipiditu
Yehova Unyongololanga Basusuka
15 Kaimba wa Mitōto wāimbile amba: “Ke-bantu batata ne lolo abandekelela, nanshi Yehova ukamboyanga.” (Mitōto 27:10) Bine, tuseñwanga pa mutyima mpata pa kuyuka’mba buswe bwa Yehova butabukile bwa mbutwile ye-yense wa pano pa ntanda! Nansha kwelwa, kususulwa, ne kushibwa na bambutwile kukusanse namani, kekukokejapo nansha dimo kukankaja Yehova kukuta mutyima. (Loma 8:38, 39) Vuluka amba Yehova ufwenyanga kwadi boba baswele. (Yoano 3:16; 6:44) Nansha shi bantu bakususule namani, yuka’mba Shobe wa mūlu ukuswele!
15-21 KWEJI 4
BYABULĒME BYA MU KINENWA KYA LEZA | ÑIMBO YA MITŌTO 29-31
Bulemununi I Kilomboji kya Buswe bwa Leza
it-1-F p. 863 mus. 10
Mpala
‘Kufya mpala’ kudi na nshintulwilo mishileshile mungya ngikadilo īsambilwa’po. Shi Yehova Leza wafi mpala yandi, divule dine bikimba kulombola amba wapele kwitutōkelwa mutyima nansha kadi wetusela bukomo bwandi. Bibwanika padi i pa mwanda wa kubulwa kikōkeji kwa muntu umo, nansha kwa kisumpi kya bantu, enka na mobyāikadile ku muzo wa Isalela. (Yob 34:29; Ñi 30:5-8; Isa 54:8; 59:2) Kitatyi kimo bibwanya kulombola amba Yehova wapele kwilombola mu bilongwa nansha kulondolola milombelo, mwanda ukungīle kitatyi kifwaninwe. (Ñi 13:1-3) Mu milombelo yālombele Davida ya amba, Leza ‘atale kungi, kakatala bubi bwandi,’ wādi uzenza Leza amulekele nansha amba asūle kujilula kwandi.—Ñi 51:9; dingakanya na Ñi 10:11.
w07-F 1/3 p. 19 mus. 1
Sangela Kukungila Yehova
Muswelo otumwenanga mu bulemununi bwa Yehova, ubwanya kudingakanibwa na muswelo ufikilanga kipa ku kwela. Pa mwanda utala kulemununwa na Leza, Bible unena’mba: “Kupanga kipa kya ndoe kya boloke mungya kala ku boba bafundijibwa nako.” (Bahebelu 12:11) Monka mobilombelanga kitatyi pa kusaka’mba bipa byēle, netu bitulombanga kitatyi pa kusaka’mba tushinte mwikadila wetu ne kwiukwatañanya na bitufundija Leza. Kimfwa, shi tubeendeja bibi kupwa tubajimija madyese etu mu kipwilo, mutyima wetu wa kusaka kukungila Leza uketukwasha tuleke kutyumukwa mutyima nansha kuleka kumwingidila. Mu ino ngikadilo, binenwa bya ku bukomo bwa mushipiditu bya Davida bitukankamika amba: “Kulobelwa nandi [Leza] i kwa kitatyi kityetye’tu, ino kutōkelwa nandi mutyima i kwa būmi bonso. Kudila kubwanya kwiya mu kyolwa, ino lubanga kudi nsadi ya tusepo.” (Ñimbo ya Mitōto 30:5) Shi tutamije mutyima wa kusaka kukungila Leza ne kwingidija madingi atanwa mu Kinenwa kyandi ne atamba ku bulongolodi, kitatyi kyetu kya “nsadi ya tusepo” kikaya.
Le Kwisāsa kwa Bine Kushintulula Bika?
18 Pa kulombola kwisāsa kwa binebine, yewa mupangwe ufwaninwe kutanwa ku kupwila kitatyi ne kitatyi ne kulonda madingi a bakulumpe a kwikala na kibidiji kya kulombela ne kwifunda. Kadi ukalonga bukomo bwa kuleka kulonga bintu bimutūla pa ditompo dya kulonga bubi monka. Shi alonge bukomo bwa kulumbulula kipwano kyandi na Yehova, ubwanya kukulupila’mba Yehova ukamulekela ne amba bakulumpe bakamujokeja mu kipwilo. Na bubine, kitatyi kibandaula bakulumpe myanda ya nonga-bibi, kebadingakanyangapo myanda yandi na ya bakwabo, kadi kebatyibengapo mambo bukidibukidi.
Byabupeta bya ku Mushipiditu
Myanda Mikatampe ya mu Ñimbo ya Mitōto: Mukanda I
31:23—Bantu ba kwitatulatatula bapalwanga mpalo ya ntanda ne miseke muswelo’ka? Mpalo itelelwe pano i mfuto. Yehova upalanga boloke mpalo na kwibapa madingi pangala pa bilubo byobalonga kuyuka mpika. Ino bantu ba kwitatulatatula byokebalekangapo bilongwa byabo bibi, Yehova wibapanga mfuto isansa mutyima ya ntanda ne miseke.—Nkindi 11:31; 1 Petelo 4:18.
22-28 KWEJI 4
BYABULĒME BYA MU KINENWA KYA LEZA | ÑIMBO YA MITŌTO 32-33
Mwanda Waka Twisāse Bubi Bukatampe?
w93-F 15/3 p. 9 mus. 7
Lusa lwa Leza Lwitukūlanga ku Kubulwa Kikulupiji
7 Shi twitopekanga pangala pa kujilula kukatampe kotwajilwile bijila bya Leza, padi biketukomena kwisāsa enka ne kudi Yehova kwine. Le i bika bibwanya kulongeka mu ino ngikadilo? Mu Ñimbo ya Mitōto 32, Davida unena’mo amba: “Ponaubile talala [pa kyaba kya kwisāsa] mikupa yami yashinikile pa mwanda wa kubinza kwami difuku dyonso dituntulu. Mwanda dyuba ne bufuku kuboko kobe [Yehova] kwaundēmene. Bukomo bwami bwaumine pamo’nka bwa mema mu kyanga kya bushipo.” (Vese 3, 4) Davida paātompele kufya bubi bwandi ne kutompa kusūla mutyima wandi wa mundamunda wādi umutopeka, wāsusukile bininge. Njia yāmutyepeje bukomo bininge pamo bwa mutyi mūminwe udi pa nshi myūmu yampikwa mema. I kimweke patōka’mba Davida kābudilwepo kubela mu ñeni ne ku ngitu. Nanshi wābudilwe nsangaji yandi. Shi umo mubukata mwetu watanwa mu ngikadilo na ino, i bika byakalonga?
Leza wa “Mutyima wa Lubilo wa Kulekela”
8 Davida pa kwisāsa wānene amba: “Naitabije kudi abe mwanda wami, ne bubi bwami nabo nkyafīle’bopo; . . . kadi abe wandekele bubi bwa bupya-mambo bwami.” (Mitōto 32:5) Kishima “wandekele” i kitambe ku kishima kya Kihebelu kishintulula “kutalula” nansha “kusela.” I kingidijibwe mwanda wa kushintulula kufundula “kwitopeka, bubi, kujilula.” Nanshi Yehova wātalwile bubi bwa Davida ne kwibwela kulampe. Kino ye kino kyātyepeje kiselwa kya kwitopeka kyādi kiselele Davida. (Mitōto 32:3) Batwe netu tubwanya kukulupila Leza mwine ufundulanga bubi bwa boba bakimba lulekelo lwandi kupityila ku lwitabijo lwabo mu kitapwa kya kinkūlwa kya Yesu.—Mateo 20:28.
w01-F 1/6 p. 30 mus. 1
Kwisāsa Kutwala ku Kwiivwana Biyampe
Davida pa kupwa kwisāsa, kādipo monka na milangwe mibi ne kwimona bu wa bituputupu. Binenwa byandi bidi mu Ñimbo ya Mitōto byaālembele bitala kwisāsa, bilombola’mba wēivwene biyampe kadi wāsumininwa kwingidila Leza na kikōkeji. Kimfwa, tala mu Ñimbo ya Mitōto 32. Mu vese 1, tutanga’mo amba: “Wa nsangaji i yewa obalekela kujilula kwandi, obapūtyila bubi bwandi.” Nansha shi tulonge bubi bukatampe namani, tubwanya kwikala na nsangaji shi tubesāsa bya binebine. Muswelo umo bidi wa kulombola kwisāsa kwa bine i kwitabija bipa bibi bilupuka ku bilongwa byetu, na mwālongele Davida. (2 Samwele 12:13) Kātompelepo kwibingija ku meso a Yehova nansha kutopeka bakwabo. Vese 5 unena’mba: “Ku mfulo nesapula bubi bwami kodi, nkyapūtyilepo kilubo kyami. Nanenene amba: ‘Nkesapulanga kujilula kwami kudi Yehova.’ Nobe waundekela kilubo kya bubi bwami.” Kwisāsa kwa binebine kutūjanga, mwanda muntu kakisapo kutopekwa na mutyima wandi wa mundamunda pangala pa bubi bwandi bwa kala.
Byabupeta bya ku Mushipiditu
Myanda Mikatampe ya mu Ñimbo ya Mitōto: Mukanda I
33:6—“Muya,” ko kunena’mba umpuya, wa kyakanwa kya Yehova i bika le? Muya nansha mushipiditu utelelwe pano i bukomo bwa Leza bwingila, mushipiditu sandu, waāpangile nao madiulu. (Ngalwilo 1:1, 2) Utelwanga ne bu mushipiditu wa kyakanwa kyandi mwanda monka mwikadile umpuya na bukomo, ukokeja kutumwa kukalonga bintu kulampe.
29 KWEJI 4–5 KWEJI 5
BYABULĒME BYA MU KINENWA KYA LEZA | ÑIMBO YA MITŌTO 34-35
“Tendela Yehova Kitatyi Kyonso”
Tutulwilei Dijina dya Yehova Pamo Ponka
11 “Nkatotanga Yehova mafuku onso, nyeke; mitendelo yandi īkashikilwanga mu kyakanwa kyami nyeke.” (Mitōto 34:1) Davida byaādi ke muntu musumbulwe, wādi padi wabila bintu bivule bya ku ngitu, ino enka na mulombwela bino bishima, bisakibwa byandi bya difuku ne difuku kebyāmujininyepo mu kusumininwa kwandi kwa kutendela Yehova. Bine, kino i kimfwa kilumbuluke kotudi shi tubatanwa na bikoleja! Twikale ku masomo, ku kaji, na bakwetu Bene Kidishitu, nansha mu mwingilo wa busapudi, tufwaninwe bidi kwikala na mutyima wa kutendela Yehova. Langa’tu bidi bubinga kebubadika bwa kutendelela Leza! Kimfwa, bintu bya kusokola ne kuloelelwa mu mingilo ya kutendelwa ya bupangi ya Yehova kebidipo na mfulo. Kadi tala bidi byalongele kupityila ku kipindi kya pano panshi kya bulongolodi bwandi! Yehova wingidijanga na bukomo bwandi bantu ba kikōkeji mu ino myaka nansha byobadi bakubulwa kubwaninina. Lelo mingilo ya Leza idingakene nansha’tu bityetye na ya bantu batyikukwa ba ino ntanda? Mwene nobe witabije byānene Davida wāsonekele monka’mba: “Kekudipo wifwene nobe umbukata mwa baleza, nansha umo mwine mpika, abe Mfumwami; kadi kekudipo nansha mīngilo īdingakene pa yobe”?—Mitōto 86:8.
Tutulwilei Dijina dya Yehova Pamo Ponka
13 “Muya wami ukētumbikanga mudi Yehova; bakikōkeji bakēvwanangako ne kuloelelwa monka.” (Mitōto 34:2) Pano Davida kādipo witumbikila bintu byaālongele aye mwine. Kimfwa, kēaninyepo muswelo waāongwele mulopwe wa Ngata. Ino wājingulwile amba Yehova ye wāmulamine paādi mu Ngata ne amba wāpandile na bukwashi bwa Yehova. (Nkindi 21:1) Nanshi Davida wētumbikile mudi Yehova, ke mudi aye mwinepo, mhm. O mwanda ba kikōkeji bādi balumba kudi Yehova. Yesu nandi wātumbije dijina dya Yehova, ne kino kyādi kilengeja bantu ba kwityepeja, ba mityima isaka kufundijibwa bamulumbe. Dyalelo nadyo, ba kikōkeji ba mu mizo yonso balumbanga ku kipwilo kya ntanda yonso kya Bene Kidishitu bashingwe māni, baludikwa na Yesu bu Mutwe. (Kolose 1:18) Mityima ya bano ba kikōkeji iteñwanga pobevwana dijina dya Leza ditumbijibwa na bengidi ba kwityepeja ne pobateja musapu wa mu Bible obalama na bukomo bwa mushipiditu sandu.—Yoano 6:44; Bilongwa 16:14.
Tutulwilei Dijina dya Yehova Pamo Ponka
15 “Nakimbile Yehova nandi wangitabija, kadi wanyongolwele ku byamoyo byami byonso.” (Mitōto 34:4) Uno mwanda wātene Davida umbūmi wādi wa kamweno kwadi. O mwanda wānene amba: “Uno mulanda uno’u waelele lubila, ne Yehova wamwivwana, wamupandija mu tusua twandi tonso.” (Mitōto 34:6) Netu potwitananga pamo na banabetu betabije, twikalanga na mikenga mivule ya kwibangila myanda ikankamika ya muswelo witukwashanga Yehova tumone kūminina makambakano. Kino kiningijanga lwitabijo lwa banabetu, mwāningijije binenwa bya Davida lwitabijo lwa boba bādi bamwitabile. Bapwani na Davida abo ‘Bamutadile [Yehova] meso ebiya batōkejibwa tō, kadi mapala abo keafwijibwepo bumvu nansha patyetye.’ (Mitōto 34:5) Nansha byobādi banyema Mulopwe Solo, abo kebāfwilepo bumvu. Bādi bakulupile amba Leza udi na Davida, o mwanda mapala abo ātōkejibwe tō. Mu muswelo umo onka, boba basangela musapu panopano, pamo ne boba ke beje myaka mu kwikala Bene Kidishitu ba bine, nabo beubijanga mudi Yehova wa kwibakwatakanya. Byobemwenanga umo ne umo bukwashi bwandi, mapala abo matōkejibwe tō amwekejanga’mba i basumininwe kwikala nyeke ba kikōkeji.
Byabupeta bya ku Mushipiditu
Myanda Mikatampe ya mu Ñimbo ya Mitōto: Mukanda I
35:19—I buluji’ka budi na kulomba kwālombele Davida amba boba bamushikilwe kebafwaninwepo kufika diso? Kufika diso kulombola amba bantu bashikilwe Davida bādi basangala pādi pafikidila nkuku ya nshikani yobadi bamukutyila. O mwanda Davida wālombele kileke kwikala uno muswelo.