Le I Bika Binena Bible pa Bimpengele bya Kipangila?
Bilondolola Bible
Leza kalengejangapo bimpengele bya kipangila bilongeka dyalelo, ino utele mutyima bantu bafikilwa nabyo. Bimpengele bya kipangila bibadilwa mu bintu bileta masusu, bine bisa kutalulwa’ko na Bulopwe bwa Leza. Panopano ponka, Leza usa kusenga boba bonso baponenwe na bimpengele bya kipangila.—2 Bene Kodinda 1:3.
I kika kyotunenena’mba bimpengele bya kipangila ke mfutopo itamba kudi Leza?
Le Bible ubwanya kukwasha pa kwiteakanya ku kimpengele kya kipangila?
Bisonekwa bisenga boba baponenwa na bimpengele bya kipangila.
I kika kyotunenena’mba bimpengele bya kipangila ke mfutopo itamba kudi Leza?
Monka mokilembelwe mu Bible, Leza wingidijanga bukomo bwa kipangila, ino kengidijangapo bimpengele bya kipangila.
Bimpengele bya kipangila bipayanga ne kulemeka bantu pampikwa kutyakula. Ino bilongwa bya Leza bya butyibi bilembelwe mu Bible, wēbilongele’nka pa bantu babi. Kimfwa, Leza pawāonakenye kibundi kya kala kya Sodoma ne Ngomola, wāpandije Lota muntu muyampe ne bandi bana babidi. (Ngalwilo 19:29, 30) Leza wādi uyukile bintu byādi mu mityima ya bantu ba mu kine kitatyi’kya, kadi wāonakenye enka boba baādi umwene bu babi.—Ngalwilo 18:23-32; 1 Samwele 16:7.
Bimpengele bya kipangila kebivudilepo kulaya, pamo ne kudyumuna kwine mpika. Ino aye Leza wādyumwine babi kumeso kwa kwingidija bukomo bwa kipangila pobadi. Bantu bāivwene bidyumu bāmwene mukenga wa kupanda ku kimpengele.—Ngalwilo 7:1-5; Mateo 24:38, 39.
Bantu abo bene balengejanga bimpengele bya kipangila mu muswelo kampanda. Namani? Na kona bifuko byobashikete’mo ne kūbaka mu bifuko mulongekanga kutenkana kwa ntanda, mulobela mema, ne bifuko byonekanga pa mwanda wa mwikadilo wa kūlu. (Kusokwelwa 11:18) Ketufwaninwepo kutopeka Leza pa buno butongi bwa bantu.—Nkindi 19:3.
Le bimpengele bya kipangila i kiyukeno kya mafuku a mfulo?
En-en, bupolofeto bwa mu Bible bunena’mba kwadi kwa kwikala bimpengele ku “mvuyo ya ngikadilo ya bintu,” nansha mu “mafuku a mfulo.” (Mateo 24:3; 2 Temote 3:1) Kimfwa, Yesu wānenene pa mwanda wa mafuku otudi’mo amba: “Kukekala bimpengele bya nzala ne kutenkana kwa ntanda byadi koku kebidi koku.” (Mateo 24:7) Panopano ponka, Leza usa kutalula’ko pano pa ntanda bintu byonso bisusula bantu, kubadila’mo ne bimpengele bya kipangila.—Kusokwelwa 21:3, 4.
Lelo Leza ukwashanga boba baponenwa nabyo namani?
Leza useñanga boba baponenwa na bimpengele kupityila ku Bible Kinenwa kyandi. Bible witukulupija’mba Leza witutele mutyima ne amba bimusansanga shi tususuka. (Isaya 63:9; 1 Petelo 5:6, 7) Kadi ulaile kitatyi kekikalongekapo monka bimpengele bya kipangila.—Tala kamutwe ka mwanda “Bisonekwa bisenga boba baponenwa na bimpengele bya kipangila.”
Bisonekwa bisenga boba baponenwa na bimpengele bya kipangila. Leza wingidijanga batōtyi bandi pano pa ntanda beule kimfwa kyāshile Yesu. Bible i mulaye amba Yesu ukasenga bantu ba “mityima mityumuke” ne “bonso badila madilo.” (Isaya 61:1, 2) Batōtyi ba Leza bekankilanga’ko kulonga namino.—Yoano 13:15.
Kadi Leza wingidijanga batōtyi bandi mwanda wa kuvuija bisakibwa bya boba baponenwe na bimpengele.—Bilongwa 11:28-30; Bene Ngalatea 6:10.
Batumoni ba Yehova bakwasha bantu bafikilwe na kimpumpu mu Porto Riko
Le Bible ubwanya kukwasha pa kwiteakanya ku kimpengele kya kipangila?
En-en. Nansha Bible byākalembelwepo mwanda wa kwituteakanya ku bimpengele, ino mudi misoñanya ibwanya kwitukwasha. Kimfwa:
Badikila kutala bya kulonga pa bimpengele. Bible unena’mba, “mukosoke umonanga kibi wefya.” (Nkindi 22:3) I biyampe kwiteakanya kumeso kwa kitatyi ku bintu bilongekanga mu kitulumukila. Pa kwiteakanya bilomba kuteakanya’ko sakoshi wa tubintu tutyetutye ne kwisambila mu kisaka pa kifuko kya kuketanina’ko shi kubalongeka kimpengele mu kitulumukila.
Būmi budi na mvubu kupita’ko bintu. Bible unena’mba: “Ketwailepo na kintu nansha kimo mu ino ntanda, kadi ketukokejapo kusela’mo kintu.” (1 Temote 6:7, 8) Tufwaninwe kwitabija kushiya njibo ne bintu byetu mwanda wa kupanda ku kimpengele. Tufwaninwe kuvuluka’mba būmi bwetu budi na mvubu kutabuka bintu bya ku ngitu.—Mateo 6:25.
Batumoni ba Yehova bakwasha bantu baponenwe na kimpengele kya kivule kikatampe mu Porto Riko