Le Mwine Kidishitu Ubwanya Kwitabija Bundapi bwa Kiñanga?

Bilondolola Bible

En-en. Yesu wālombwele amba balondi bandi bakokeja kukimba kundapibwa na bundapi bwa kiñanga paānenene amba: “Bakomo kebadipo kyobasakila muñanga, poso boba babela.” (Mateo 9:12) Nansha Bible byakadipo bu dibuku dya kiñanga, ino uletanga misoñanya ya kuludika boba basaka kusangaja Leza.

Wiipangule bino bipangujo

1. Le ngivwanije bundapi bobanombola kuñundapa? Bible witudingila tukimbe myanda ikulupilwa pa kyaba kya ‘kwitabija binenwa byonso.’—Nkindi 14:15.

2. Le mfwaninwe kukimba mulangwe wa muñanga wa bubidi nansha wa busatu? Kukimba “badingidi bavule” kubwanya kwikala kwa kamweno, nakampata shi i misongo mikatampe.—Nkindi 15:22.

3. Le bundapi’bwa bukalomba kujilula musoñanya wa mu Bible wa ‘kwilama ku mashi’?—Bilongwa 15:20.

4. Le bakengidija bya majende pa kukwata misongo nansha kwiyundapa? Bible i mupeleje ‘bilongwa bya majende.’ (Bene Ngalatea 5:19-21) Pa kuyuka shi mudi bya majende, wiipangule bipangujo pamo bwa bino:

• Le yewa mwine undapa wingidijanga majende?

• Le bundapi bwimanine pa lukulupilo lwa amba i baleza balobele nansha balwana bankinda baleta misongo?

• Le pa kutēka nansha kutoma lawa, bilomba bidi bitapwa, nsanzo, ne bisela nansha bintu bikwabo bya majende?

5. Le nketele mutyima’nka ku bukomo bwami bwa ngitu? Bible uleta madingi amba: “Mutyima wenu unekena uyukane ku bantu bonso.” (Bene Fidipai 4:5) Kwikala na mutyima unekena ukakukwasha ute mutyima ku “bintu bya mvubu mikatampe,” kimfwa bintu bya ku mushipiditu.—Bene Fidipai 1:10; Mateo 5:3.