Bipangujo Bya Batangi

Mwanda waka bene Kidishitu bafwaninwe kuta mutyima ku muswelo obengidija mampangiko a kwitumina ne kutambula misapu ku bya busendwe?

Batumoni bamo, bengidijanga bya busendwe bya dyalelo mwanda wa kwisamba na bantu ba mu kisaka ne na Batumoni bakwabo. Na bubine, mwine Kidishitu mutame ku mushipiditu ukavuluka ano madingi anena’mba: “Mukosoke umonanga kibi wefya, ino bampikwa bwino bendelelanga’tu ne kwangula bipa bibi.’’​—Nki. 27:12.

Tuyukile amba Yehova usakanga kwitukinga. Inoko, ketupwanangapo na boba baleta nkalañani, bapangwe nansha boba bafundija bufundiji bunyengakane. (Loma 16:17; 1 Ko. 5:11; 2 Yo. 10, 11) Padi bantu bamo ba mu kipwilo kebalondangapo bijila bya mu Bible. (2 Tm. 2:20, 21) Tuvulukei uno mwanda potutonga balunda. I bikomo kutonga balunda bayampe kupityila ku mpangiko ya kwitumina misapu.

Pa kutonga balunda bayampe, bitulomba kuta mutyima bininge shi kisumpi kya bantu botwitumina nabo misapu i kikatampe. Bene Kidishitu bamo batwelanga mu bisumpi bikatampe, kupwa byafula bibi. I muswelo’ka ubwanya kudyumuka batutu ne bakaka shi badi mu kisumpi kya bantu tutwa nansha tununu? Bikekala bikomo kuyuka mwine mwikadile bantu bonso ba mu kisumpi ne mwikadile kipwano kyabo na Yehova. Ñimbo ya Mitōto 26:4 inena’mba: “Nkipwenepo na bantu ba bongojani, kadi nyemanga boba bafya mobekadile.” Kino kilombola’mba i kya tunangu kwilembela misapu enka na bantu botuyukile.

Inoko nansha ke mu kakisumpi katyetye, mwine Kidishitu ufwaninwe kuta mutyima ku bula bwa kitatyi ne ku myanda mine yobelembela. Ketufwaninwepo kulanga’mba tunenwe kulondolola ku misapu yonso pampikwa kuta mutyima ku misapu mine ilembwa ne ku bula bwa kitatyi. Polo wānenene Temote adyumuke bantu “ba lubabo, beela ne mu myanda ya bene.” (1 Tm. 5:13) Dyalelo, i bipēla kulonga bintu bya uno muswelo ku bya busendwe.

Mwine Kidishitu mutame ku mushipiditu kakatejepo myanda ya kafutululo, kufutulula banabetu mu lwitabijo, nansha kunena myanda yabo mifyame. (Ñim. 15:3; Nki. 20:19) Kadi ukaleka kwisamba myanda isanshija bakwabo, nansha yakayukidijepo biyampe shi i ya bine. (Ef. 4:25) Na bubine, tutambulanga byakudya biyampe bya ku mushipiditu ne mapya a bine kupityila ku site ya jw.org ne ku mpangiko ya kweji ne kweji ya Televijo ya JW.

Batumoni bamo batumanga misapu ku bya busendwe mwanda wa kukimba kupoteja, kupota, kusumbija nansha kukimbila ba twaji. Ino i myanda ya bya busunga, keitalepo butōtyi botutōta Yehova. Bene Kidishitu basaka kwikala ba “kubulwa kusanswa lupeto,” bakomenanga ditompo dyo-dyonso dya kumwena lupeto pa mutwe wa banabetu.​—Bah. 13:5.

Le tufwaninwe kwingidija mpangiko ya kwitumina misapu mwanda wa kulomba lupeto lwa kukwasha banabetu basakilwa bukwashi nansha baponenwe na bimpengele? Shako, tutele banabetu mutyima na buswe kadi tusakanga kwibakwasha ne kwibakankamika. (Yak. 2:15, 16) Inoko kulonga namino na kulembela kisumpi kikatampe kya bantu, kubwanya padi kulengeja bilo ya musambo ya mu yenu ntanda nansha kipwilo kikomenwe kwibakwasha. (1 Tm. 5:3, 4, 9, 10, 16) Kadi i kutupu muntu nansha umo motudi ukasaka kwimwekeja’mba aye ye utongelwe mwanda wa kukwasha banabetu mu muswelo wa pa bula.

Tusakanga kulonga bintu bitumbija Leza. (1 Ko. 10:31) O mwanda shi ubakwata butyibi bwa kwingidija mpangiko ya kwitumina misapu nansha bya busendwe bikwabo, tá mutyima ku byaka bikokeja kwikala’ko kadi ikala mudyumuke.