3. Mwanda Waka Bantu Bayampe Basusuka?
Kikadile Malondololo na Mvubu
Kususuka kususuka bantu bayampe kekwitusangajangapo. Bantu bamo balañanga’mba kwikala muntu muyampe kekudipo na mvubu.
Languluka’po Bidi
Bantu bamo bakulupile amba bantu bafwanga ne kubutulwa monka misunsa mivule. Banenanga’mba boba bālongele bilongwa biyampe babutulwanga monka na būmi buyampe, ino boba bālongele bilongwa bibi babutulwanga monka na būmi bwa masusu. Mungya ino nkulupilo, enka ne muntu muyampe ubwanya kususuka shi wādi ulonga bilongwa bibi mu “būmi bwa pa kala.” Inoko . . .
Le ano masusu adi na kitungo’ka, shi muntu obalanga’mba ubutulwanga monka ukomenwa kuvuluka būmi bwandi bwa pa kala?
Shi tubwanya kwikala biyampe pa mwanda wa būmi bwetu bwa pa kala, le kyotulongela bukomo bwa kwikala bakomo mu ngitu ne kwepuka byaka i kika?
YUKILA’KO BIVULE
Tala video inena’mba, Mwanda Waka Leza Ulekele’ko Masusu? idi pa jw.org.
Binena Bible
Masusu ke mfutopo itamba kudi Leza.
Inoko, masusu mavule afikanga mu kitulumukila, avudile kutana muntu shi udi pa kifuko kibi ne mu kitatyi kibi.
“Bantu ba lubilo kebawinangapo nyeke mu lubilo, nansha ba bukomo kunekenya bulwi, nansha ba tunangu kwikala nyeke na byakudya, nansha ba ñeni kwikala nyeke na bupeta, nansha boba ba buyuki kunekenya nyeke, mwanda kitatyi ne myanda yampikwa kulaa bibafikilanga bonso.”—MUSAPUDI 9:11.
Bubi bwetu botupyene nabo bwituletelanga masusu.
Divule dine bantu bengidijanga kishima “bubi” mwanda wa kufunkila pa kilongwa kibi kilonga muntu. Inoko, Bible wikingidijanga mwanda wa kulombola ngikadilo ipyene bantu bonso, miyampe nansha mibi.
“Nabutwilwe na mambo, kadi ne wa bubi tamba kitatyi kyañimite mama.”—ÑIMBO YA MITŌTO 51:5, Kunshi kwa dyani.
Bubi budi na lupusa lubi pa bantu.
Bonanga kipwano kyotupwene na Umpangi wetu ne kwitulengeja tuleke kwikala mu kipwano na bipangwa bikwabo bya Leza. Kino kiletelanga muntu ne muntu masusu makatampe, enka ne muzo onso wa muntu.
“Popa ponsaka kulonga kyoloke, kibi kidi ponka pamo nami.”—BENE LOMA 7:21.
“Bipangwa byonso pamo bibinzanga’nka kubinza ne kususuka pamo.”—BENE LOMA 8:22.