Mwanda Waka Bantu Bavule Kebakilēmekangapo Abo Bene?

MWANDA WAKA KWILĒMEKA ABE MWINE I KWA MVUBU

Muntu shi wilēmekele ubwanya kwikonda na makambakano a mu būmi na kikulupiji. Kadi kazozangapo bukidi.

Bukimbi bulombola’mba boba bekalanga na mumweno mubi pobadi babwanya kubela misongo ya kuzumbija mutyima, ya kujinwa ñeni, ne ya kudyadyakanya. Kadi kebejengapo kumunwa na mālwa ne na dyamba.
Muntu shi i mwilēmeke kedingakanyangapo na bantu bakwabo, kino kimukwashanga ekale biyampe na bantu ne kupwana nabo bya binebine. Ino muntu wityepelwa, uvudile kubabañana kadi kulonga namino kuvudile kumulengeja akomenwe kupwana na bantu.
Muntu mwilēmeke shi watanwa na makambakano, kajokelangapo kunyuma; nansha shi kudi kintu kisansa kikimba kumujokeja kunyuma, kalekangapo kufikila pa bintu biyampe byakimba kulonga. Ino muntu wityepelwa, keye kubaija myanda. Kino kimulengejanga shi watanwa na kamwanda katyetye mu byalonga, wazoza ne kwibileka.

BYA KULONGA PA KWIPĒJA BULĒME

Tonga balunda bakukankamika. Pwana na bantu badi na bulēme, badi na mutyima wa kukukwasha wikale muntu muyampe, ne bakakukwasha utame biyampe.

“Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

Kwasha bantu. Shi ulongela bantu bintu biyampe—kubadila’mo ne boba kebadipo na bukomo bwa kukujokejeja byowibalongela—ukekala na nsangaji ya bine ne kwimona bu wa mvubu mu bwabo būmi. Kadi ukekala na nsangaji nansha shi bantu bavule kebakufwijanga’kopo pa bintu biyampe byowibalongela.

“Nsangaji ya kupāna itabukile ya kupebwa.” —Bilongwa 20:35.

Kwasha obe mwana elēmekeje. Muswelo umo bidi wa kukwasha obe mwana ekale mwilēmeke i na kumukwasha abwanye kwipwijija’ko tumakambakano tumotumo tumutana mungya lukongo lwandi. Kino kyo kikwashanga bana bakomene bantu bakimba kwibalongeja bintu bibi. Mu būmi bulēme i kwipa’bo, o mwanda shi ulonge namino ukakwasha obe mwana ekale mutame kadi wilēmekeja.

“Fundija mwana mwanuke dishinda dyafwaninwe kwenda’mo; nansha shi wanunupa kakasāsuka’mopo.”—Nkindi 22:6, kunshi kwa dyani.

Kamoni wa Yehova umo ufundija mwana-mukaji Bible kobapotejejanga kafe katēke.

BATUMONI BA YEHOVA MOBAKWASHISHANGA MUNTU EPE BULĒME

Mpangiko ya kufundija bantu Bible ikwete’ko Batumoni ba Yehova ne kupwila kwabo, bikwashanga bantu bashinte būmi bwabo ne kwibalengeja bemone bu ba mvubu.

KUPWILA KWETU KWA MU BUKATA BWA YENGA

Ku kupwila kwa mu bukata bwa yenga, tukalondanga’ko busapudi bwimanine pa Bible, mwine mobetupanga madingi a bya kulonga pa kwimona bu ba mvubu. Kutanwa ku kupwila kwetu i ku bitupu, kadi muntu yense usakile ubwanya kwiya kupwila netu. Kimfwa ku kupwila kwetu ukayuka’ko . . .

kine kyoikadile na mvubu ku meso a Leza
kine kyoikadile’ko mūmi
mwa kwikadila na balunda ne kupwana nabo bya lonso

Kadi ku kupwila kwetu ukatana’ko balunda bayampe, mwanda bonso i balunda ‘beta mutyima abo bene na bene.’—1 Bene Kodinda 12:25, 26.

Shi usaka kuyuka myanda mivule itala kupwila kwetu, nabya enda pa jw.org utale video mīpi inena’mba, I Bika Biloñwanga ku Njibo ya Bulopwe?

KWIFUNDA KOTWIFUNDANGA BIBLE NA BANTU

Tufundijanga bantu Bible ku bitupu kupityila ku dibuku Ikala Mūmi Nyeke! Pomwifunda Bible ukatana misoñanya ya kukukwasha mu būmi, kadi mukesambila’po na mwine ukufundija na kulondolola bipangujo bilembelwe mu kino kitabo. Pomwifunda mukatala ne mavideo mavule asangaja, kadi mu dino dibuku mudi ne bifwatulo biyampe mpata. Kwifunda netu Bible kukwashanga bantu belēmekeje ne kushinta mu būmi.

Shi usaka kuyuka muswelo obwanya kumwena mu kwifunda Bible na Batumoni ba Yehova, nabya enda pa jw.org ulonde video mīpi inena’mba, Mwanda Waka Twifunde Bible?