KIFUNDWA 11
I Muswelo’ka Obwanya Kumwena mu Bible?
Lelo kodi mwiivwane walēmenenwa kitatyi kyokimba kushilula mwingilo mukatampe? Pa kupēleja uno mwingilo, padi ye uno waabenye’o mu bipindi bityebitye. Mo mwa kulongela ne pokimba kutanga Bible. Ino padi ye uno wiipangula’mba, ‘Le nshilwila pepi?’ Mu kino kifundwa, tusa kumona’mo bintu bimobimo bipēla bikakukwasha usangele kutanga Bible.
1. Mwanda waka tufwaninwe kutanga Bible kitatyi ne kitatyi?
Muntu utanga Bible, nansha “bijila bya Yehova” kitatyi ne kitatyi, ukekala na nsangaji kadi ne byalonga bikendeka. (Tangai Ñimbo ya Mitōto 1:1-3.) Pa kushilula, ikala utanga nansha’tu mu maminite matyutyu difuku ne difuku. Powenda wibidila Kinenwa kya Leza, Bible, po pene ukekala kosangela kutanga’ye.
2. Lelo i bika bikakukwasha umwene mu butangi bobe bwa Bible?
Pa kumwena bininge mu butangi bwa Bible, tufwaninwe kwishinkija ne kulangulukila pa bine byotutanga’bya. I byonso bibidi, kutanga ne “kulangulukila’po.” (Yoshua 1:8, kunshi kwa dyani) Potanga, wiipangule bipangujo kimfwa’mba: ‘Le bino bimfundija bika padi Yehova Leza? Le mbwanya kwibingidija namani mu būmi bwami? Le mbwanya kwingidija namani ano mavese mwanda wa kukwasha bakwabo?’
3. Le ukasokola kwepi kitatyi kya kutanga Bible?
Le ulwanga pa kusokola kitatyi kya kutanga Bible? Ye mobikadile ne ku batwe bavule. Tompa ‘kwingidija biyampe shē kitatyi kyobe.’ (Bene Efisesa 5:16) Ukabwanya enka shi witūdila’ko kitatyi kampanda kipotoloke kya kutanga Bible difuku ne difuku. Bamo bamonanga kitatyi kya kutanga Bible lubanga na futwi. Bakwabo i mu bula bwa difuku, padi i kitatyi kyobatūja pa midi. Bāngi nabo i ku kyolwa kumeso kwa kukalāla. Le abe i nsá’ka ibwanya kukupēlela?
LANGULUKA BININGE
Wifunde mwa kulongela butangi bobe bwa Bible bwikale busangaja. Tala muswelo wa kwiteakanya senene amba umwene ne pa mfulo mu kifundwa kyobe kya Bible.
Monka motwifundilanga kusangela bidibwa palapala, mo monka motubwanya kusangela ne kutanga Bible
4. Wifunde mwa kusangela butangi bobe bwa Bible
Kushilula kutanga Bible kukokeja kwikala kukomo. Inoko, tubwanya ‘kutamija mutyima wa kwabila’ kutanga’ye, monka mutamijijanga muntu mutyima wa kwabila bidibwa kampanda byawadi kayukilepo. Tangai 1 Petelo 2:2, ne kwisambila pa kino kipangujo:
Molangila, shi utange Bible difuku ne difuku, le kutanga’kwa kukekala bu kintu kyoabila bininge ne kyosangela?
Talai VIDEO mumone muswelo washilwile bantu bamo kusangela kutanga Bible. Kupwa mwisambilei pa bino bipangujo:
Mu ino video, i bikoleja’ka byanekenye bankasampe?
I bika byebakweshe balamate ku kitungo kyabo kya kutanga Bible?
I bika byobalongele pa kusaka’mba butangi bwabo bwa Bible bwikale busangaja?
Manwa a mwa kushilwila:
Tonga bwalamuni bwa Bible bwa muneneno wa panopano, kadi bukulupilwa. Tompa bidi Bwalamuni bwa Ntanda Mipya shi budi’ko mu ludimi lwenu.
Badikila kutanga bipindi bikusangaja bininge. Kimfwa, tala tabulo unena’mba “Mwa Kushilwila Kutanga Bible.”
Lemba myanda yotanga. Ingidija tabulo udi mu kino kitabo unena’mba “Lemba Byotanga mu Bible.”
Ingidija application ya JW Library®. Na ino mpangiko, ubwanya kutanga ne kuteja Bible konso kodi na kwingidija telefone nansha kintu kikwabo kya uno muswelo.
Ingidija myanda ya mbwejo idi mu Bwalamuni bwa Ntanda Mipya. Idi na tulata, matabulo, ne nshintulwilo ya bishima bine bikalengeja butangi bobe bwikale busangaja.
5. Witeakanye kumeso kwa kifundwa kyenu kya Bible
Tangai Ñimbo ya Mitōto 119:34, ne kwisambila pa kino kipangujo:
Mwanda waka i biyampe kulombela kumeso kwa kutanga Bible ne kumeso kwa kwiteakanya ku kifundwa kyenu kya Bible?
I muswelo’ka obwanya kumwena mu difuku dyonso dyomwifunda? Poteakanya kifundwa ne kifundwa, tompa kwingidija ano manwa:
Tanga misango mibajinji ya kifundwa.
Kimba bisonekwa ne kwibitanga, kadi tompa kwivwanija mobikwatañenine na myanda īsambilwa’po.
Shīka bishima bikatampe nansha milongo ilondolola ku kipangujo ne kipangujo; kino kikakukwasha uyuke bya kwisambila’po na mwine ukufundija.
Le wadi uyukile?
Batwe Batumoni ba Yehova ke tudi bengidije malamuni a Bible meshileshile. Inoko, tusangelanga bininge bwalamuni bwa Bisonekwa Bijila—Bwalamuni bwa Ntanda Mipya mwanda i bwa binebine, bupēla kwivwana, kadi i butele’mo dijina dya Leza.—Tala kishinte kya pa Entelenete kinena’mba “Lelo Batumoni ba Yehova Badi na Bible Wabo?”
BANTU BAMO BANENANGA’MBA: “Kwifunda Bible i kaji! Ami nkidipo na kitatyi ne bukomo bwa kwifunda’ye.”
Le abe ulanga’po namani?
MU KĪPI
Pa kumwena bininge mu Bible, witungile’ko kitatyi kya kutanga’ye, lombela pa kwivwanija byobya byotanga, kadi witeakanye kumeso kwa kulonga kifundwa kyenu kya Bible.
Pitulukai’mo
Le i bika bikakukwasha umwene ne pa mfulo mu Bible?
Le i kitatyi’ka kyobwanya kumona kyaba kya kutanga ne kwifunda Bible?
Mwanda waka kwiteakanya kumeso kwa kifundwa ne kifundwa kyenu kya Bible kudi na mvubu bininge?
KIMBA
Bandaula milangwe imo ibwanya kukukwasha umwene bininge mu butangi bobe bwa Bible.
“Mwa Kumwena Bininge mu Butangi bwa Bible” (Kiteba kya Mulami No. 1 2017)
Wifunde miswelo isatu ya mwa kutangila Bible.
“Le Bible Ubwanya Kunkwasha Namani?—Kipindi 1: Yuka Bible Obe” (Kishinte kya pa Entelenete)
Tala umone mwa kusangela butangi bwa Bible.
Boila ñeni ku bantu batañanga Bible pano ke myaka.